1 Kɔ Abraham ɛlɛk sɔ wəran wəlɔma, pac-we kɔ Ketura. 2 Kɔ Ketura oŋkomɛ kɔ awut arkun: Simraŋ, Yɔksaŋ, Mediyaŋ, Madiyaŋ, Yisbak, kɔ Suwah. 3 Kɔ Yɔksaŋ oŋkom Saba kɔ Dedaŋ. Awut arkun a Dedaŋ ŋanayɔnɛ afum a tɔf maas: 'Asuri, aLetusi kɔ aLeyumi. 4 Awut a Madiyaŋ ŋanayɔnɛ Hefah, Hefer, Henok, Abidah, kɔ Ɛldaha. Akaŋɛ ŋanayɔnɛ awut a Ketura.

5 Abraham ɛnasɔŋ daka dɔn fəp Isiyaka. 6 Awut a alak' ɔn, k'ompocɛ ŋa, pəsɔrɔyi doru, k'eŋkekərɛ ŋa poŋ pəbɔlɛnɛ ŋa wan kɔn Isiyaka, atɔf nŋɛ ŋeyi ntende kəca nkɛ dec dɛmpɛ mɔ. 7 Kəwon ka Abraham doru kənasɔtɔ meren 175. 8 Kɔ Abraham ontorɛ kifir, k'efi ntɛ eŋcepərɛnɛ detem dobotu mɔ, pəbɛk, pənɛmbərɛ mataka ma doru, k'ɔnɔŋkəl atem ɔn aŋɛ ŋanafi mɔ. 9 Isiyaka kɔ Səmayila awut a Abraham, ŋawup kɔ nde dəkəwupɛnɛ da Makpela, nde dalɛ da Hɛfəroŋ wan ka Sohar wəHewy, pətɛfərɛnɛ di kɔ Mamre. 10 Dalɛ dɛnayi ndɛ Abraham ɛnaway nnɔ aHewy ŋayi mɔ. Difɔ anawup Abraham kɔ wəran kɔn Sara. 11 Ntɛ defi da Abraham deŋcepər mɔ, kɔ Kanu kəmpocɛ wan kɔn Isiyaka nwɛ ɛnandɛ nde kələmp ka Lahay-Roy kəsək mɔ.

12 Awut a Səmayila ŋɔ akaŋɛ, Səmayila wan k'Abraham, nwɛ wan wəran wəMisira Akar wəcar ka Sara ɛnakomɛ Abraham mɔ. 13 Mewe ma awut a Səmayila mɛmɛ, tɔkɔ ŋanabɛkɛnɛ mɔ: Nebayɔt (coco ca Səmayila), Kedar, Adbɛl, Mibsam, 14 Misma, Dumah, Masa, 15 Hadad, Tema, Yetur, Nafis, kɔ Kedma. Awut a Səmayila ŋɔ akakɔ. 16 Mewe maŋan mɔ mamɔkɔ tɛndɛ taŋan cəgbo cəgbo. Abɛ wəco kɔ mɛrəŋ ŋanayi ŋa kiriŋ dɛlay daŋan. 17 Kəyi ka Səmayila doru kənawon meren 137. K'ontorɛ kifir, k'efi, k'ɔnɔŋkəl atem ɔn akɔ ŋanafi mɔ. 18 Afum a Səmayila ŋayi kəyɛfɛ ka Hawila haŋ Sur nsɛ səntɛfərnɛ Misira mɔ, kəkɔ ka kəca ka Asiri. Yuruya ya Səmayila ŋanandɛ ŋatɛfərnɛ awɛŋc aŋa fəp.

19 Afum a Isiyaka ŋ' aŋɛ, wan ka Abraham. Abraham okom Isiyaka. 20 Isiyaka ɛnasɔtɔ meren 40 a k'endenɛŋcɛ Rebeka, wan wəran wəka Betuhɛl wəka Aram wəka Padaŋ-Aram, wəkirɛ ka Labaŋ wəka Aram. 21 Kɔ Isiyaka ontola Kanu Kəpɔŋ teta wəran kɔn, bawo ɛnakom fɛ wan. Kɔ Kanu Kəpɔŋ kəne kətola kɔn. Kɔ wəran kɔn Rebeka ɛmbɛkəs. 22 Kɔ awut ŋayɛfərɛnɛ kɔ kor disrɛ, kɔ Rebeka eyifnɛ: «Ak' ender im tantɛ-ɛ?» K'ɔŋkɔ pəkornɛ Kanu Kəpɔŋ. 23 Kɔ Kanu kəloku kɔ: «Afum a tɔf mɛrəŋ ŋay' əm dəkor, afum mɛrəŋ akakɔ ŋandegbɛyɛnɛ kəwur əm dəkor. Afum a wəkin nwɛ ŋandetasərnɛ aka wəka mɛrəŋ. Wəbeki endeyi wəfɛt wəkɔ dəntɔf.» 24 Dəŋkom dɔn k'anəŋk fɔ cəberi cəyi kɔ dəkor. 25 Dəŋkom dɔn, kɔ wəcɔkɔ-cɔkɔ wəder ɛla cəfon ceyim dəris pəmɔ wɛsɛm, k'awe kɔ Esay. 26 Kɔ teŋcepər, kɔ wəka mɛrəŋ ender pəsumpər atek ŋa wəcɔkɔ-cɔkɔ. K'awe wəkakɔ Yakuba. Isiyaka pəsɔtɔ tɛm tatɔkɔ oŋ meren 60 a k'andekomɛ kɔ awut akaŋɛ. 27 Kɔ awut arkun aŋɛ ŋambɛk. Kɔ Esay ende pəyɔnɛ wəpɛn wətɔt, wəbɔtər kəyɛksɛ-yɛksɛ dəkulum kətɛn ka sɛm yɛpɛn, kɔ Yakuba nkɔn ɔyɔnɛ wəyi wəka dare, wətɔsimsɛ dis pəbɔtər kəndɛ d'abal. 28 Isiyaka ɛnabɔtər Esay bawo ɛnabɔtər sɛm nyɛ Esay ɛŋc-pɛn mɔ. Rebeka nkɔn pəbɔtər Yakuba. 29 Dɔsɔk dɔlɔma kɔ Yakuba oŋcoŋər mɛŋc, kɔ Esay ender pəyɛfɛ dəkulum dis dɔlɔl kɔ. 30 Kɔ Esay oloku Yakuba: «Məpoc' em, ilɛtsɛn' am idi pəyim pam papɔkɔ bawo dis dɔlɔl im.» Ti tɔ asɔŋɛ Esay tewe ta «Edɔm* «Edɔm» ti tɔ tatɔkɔ «pəyim» ». 31 Kɔ Yakuba oloku Esay: «Məwayər im mɔkɔ dəkəcəmɛ da debeki dam.» 32 Kɔ Esay oloku kɔ: «In' ɛwɛ ic-fi, ake dəkəcəmɛ da debeki dadɔkɔ dendeyɔ em-ɛ?» 33 Kɔ Yakuba oloku: «Mədɛrəm' em kərɛsna.» Kɔ Esay ɛndɛrəmɛ Yakuba k'ɛwayər kɔ dəkəcəmɛ da debeki dɔn. 34 Kɔ Yakuba ompocɛ Esay kəcom, kɔ mɛŋc mamɔkɔ. Kɔ Esay endi yeri yayɔkɔ, k'omun, k'ɛyɛfɛ k'ɔŋkɔ. Tatɔkɔ tɔ Esay ɛnagbal dəkəcəmɛ da debeki dɔn.