1 Kɔ dor dende deyi dɔtɔf, ndɛ dɛnaciyanɛ kɔ dor dɔcɔkɔ-cɔkɔ dɔkɔ dɛnayi di tɛm ta Abraham mɔ. Kɔ Isiyaka ɔŋkɔ nda Abimɛlɛk, wəbɛ ka aPɛlɛsɛt nde Kerar. 2 Kɔ Kanu Kəpɔŋ kəwurər Isiyaka, kɔ kəloku kɔ: «Ta mətor Misira, məyi atɔf nŋɛ indeboŋcər əm mɔ. 3 Məndɛ atɔf ŋaŋɛ. Isol' am, indepoc' am pətɔt, bawo məna kɔ yuruya yam * dɛlay dam ŋ' indesɔŋ antɔf ŋaŋɛ fəp. Iŋlas tɛm tatɔkɔ dim ndɛ inasɔŋ papa kam Abraham mɔ. 4 Indeyɔ yuruya yam yɛla pəmɔ cɔs ca dareŋc. Indesɔŋ yuruya yam tɔf yayɛ fəp. Afum a doru fəp ŋade kəctɛn kətola nnɔ yuruya yam yeyi mɔ. 5 Abraham ɛnacəŋkəl dim dem, pəcəmɛ dɔpɔ dem darəŋ, pəsumpər moloku mem, pəleləs mɛfaŋ mem kɔ sariyɛ sem.»

6 Kɔ Isiyaka ɛndɛ Kerar. 7 Ntɛ afum a tofo tatɔkɔ ŋaŋcyifət teta wəran kɔn mɔ, pəc-loku ŋa: «Wəkirɛ kem ɔfɔ.» Pəc-nesɛ kəloku fɔ wəran kɔn ɔfɔ, ta afum a tofo tatɔkɔ ŋadif kɔ, bawo Rebeka ɛnatesɛ. 8 Ntɛ kiyi kɔn kəŋc-won di mɔ, kɔ tosurɛnɛ Abimɛlɛk wəbɛ ka aPɛlɛsɛt pəwurɛ kəro dəwundɛr pəc-mɔmən, k'ɛnəŋk Isiyaka pəc-cɛcɛnɛ kɔ wəran kɔn Rebeka. 9 Kɔ Abimɛlɛk ewe Isiyaka k'eyif kɔ: «Wəran kam ɔyɔnɛ wəran nwɛ! Ake 'sɔŋɛ ntɛ məloku su a wəkirɛ kam ɔfɔ mɔ?» Kɔ Isiyaka oloku kɔ: «Iloku ti kənesɛ disrɛ ta idefinɛ tetɔn.» 10 Kɔ Abimɛlɛk oloku kɔ: «Cəke məyɔ su tantɛ? Pəpic pɛcəmɛ wəlɔma su dacɔ ŋafəntərɛ kɔ wəran kam, kɔ mən' ɔsɔŋɛ su ti kəciya.» 11 Kɔ Abimɛlɛk ɔsɔŋ dim dadɔkɔ afum ɔn fəp, ntɛ: «Məna nwɛ məŋgbuŋɛnɛ wərkun nwɛ kɔ wəran kɔn mɔ, andeŋər əm sariyɛ sa defi.»

12 Kɔ Isiyaka ɔmbɔf kəren kaŋkɔ dɔtɔf k'ɛntɛl 100 ta tɔkɔ ɛnabɔf mɔ, bawo Kanu Kəpɔŋ kənapocɛ kɔ pətɔt. 13 Kɔ wərkun nwɛ ɔsɔtɔ daka, k'ɛmbɛrɛnɛ kəsɔtɔ daka haŋ k'ɛnaŋkanɛ kəyɔnɛ wəka daka wəpɔŋ. 14 Isiyaka ɛnayɔ yɔcɔl yɛlarəm: Cəna, cir, ŋkesiya, kɔ acar alarəm, tɔsɔŋɛ aPɛlɛsɛt ŋayɔnɛ kɔ kəraca.

15 Cələmp ncɛ acar a kas Abraham ŋanakay kiyi kɔn doru mɔ, kɔ aPɛlɛsɛt ŋaməntən ci, kɔ ŋalas ci kəbof. 16 Kɔ Abimɛlɛk oloku Isiyaka: «Məyɛfɛ ndorosu məkɔ bawo məmbɛk su fənɔntər.» 17 Kɔ Isiyaka ɛyɛfɛ di, k'ɔŋkɔ pəyi nde mɔrɔ dacɔ nde Kerar, nde ɛnandɛ cɔkɔ-cɔkɔ mɔ. 18 Kɔ Isiyaka ɔŋgbɔkərɛ sɔ kəkay cələmp ncɛ anakay tɛm ta kas Abraham, a kɔ aPɛlɛsɛt ŋaməntən ci kəcepər ka defi da Abraham mɔ. K'ewe sɔ ci mewe mɔkɔ kas ɛnawe ci mɔ. 19 Kɔ acar a Isiyaka ŋaŋkay sɔ kələmp kəlɔma, dəndo mɔrɔ dacɔ, kɔ ŋambəp ki disrɛ domun dɔtɔt. 20 Akɛk a yɔcɔl ya dare da Kerar ŋaŋcaŋ akɛk a yɔcɔl ya Isiyaka kəcɔp, ŋac-simsɛ kələmp, kɔ ŋaloku: «Kələmp kaŋkɛ kosu kɔ.» Kɔ Isiyaka ewe kələmp kaŋkɔ Esɛk, bawo afum ŋanagbɛkəlɛnɛ ta ki kɔ nkɔn. 21 Kɔ acar a Isiyaka ŋaluksərnɛ sɔ kəkay kələmp kəlɔma nkɛ anagbɛkəlɛnɛ sɔ taka ki mɔ, k'ewe ki Sitna. 22 K'eliŋ saŋka sɔn dəndo, k'ɔŋkɔ pəkay sɔ kələmp kəlɔma nkɛ anatɔgbɛkəlɛnɛ ta ki mɔ, k'ewe ki Rehobɔt, bawo, oŋcloku: Kanu Kəpɔŋ kəyac su, kəsikəli su, kədesɔtɔ fənɔntər atɔf ŋaŋɛ. 23 Kɔ Isiyaka ɛmpɛrnɛ Bɛrseba. 24 Kɔ Kanu Kəpɔŋ kəwurər kɔ pibi papɔkɔ, kɔ kəloku kɔ: «In' ɔyɔnɛ Kanu ka papa kam Abraham. Ta mənesɛ, bawo isol' am, indepoc' am pətɔt, indeyɔ sɔ yuruya yam ŋala, teta wəcar kem Abraham.» 25 Kɔ Isiyaka ɛŋcəmbər di dəkəloŋnɛ k'okornɛ tewe ta Kanu Kəpɔŋ. K'ɛŋcəmbər sɔ di abal, kɔ acar ɔn ŋaŋkay sɔ di kələmp.

26 Kɔ Abimɛlɛk ɛyɛfɛ Kerar kəkɔ-nəŋk nkɔn Isiyaka ŋasol kɔ Ahusat wanapa kɔn, kɔ Pikɔl wəbɛ wəka asɔdar ɔn. 27 Kɔ Isiyaka eyif ŋa: «Ta ake tɔ nənderɛnɛ nnɔ nderem-ɛ, bawo nənter im, kɔ nəmbɛləs im nde ndoronu?» 28 Kɔ ŋaloku kɔ: «Sənəŋk bel-bel fɔ Kanu Kəpɔŋ kəsol am. Ti tɔ səlokɛ: Fɔ padɛrəmɛnɛ, ti tɔ tatɔkɔ məna kɔ səna, patəŋnɛ pacaŋəs danapa. 29 Ntɛ tendesɔŋɛ ta məyɔ su ali pəlɛc pin, pəmɔ tɔkɔ sənatɔyɔ əm pəlɛc, kɔ səyɔ əm pətɔt haŋ kɔ səsak əm kɔ məŋkɔ pəforu disrɛ mɔ. Ndɛkəl oŋ Kanu Kəpɔŋ kəmpoc' am.» 30 Kɔ Isiyaka ombocɛ ŋa kəsata, kɔ ŋandi yeri kɔ ŋamun. 31 Kɔ ŋayɛfɛ bət-bət suy kɔ ŋandɛrəmɛnɛ. Kɔ Isiyaka ɛsak ŋa kɔ ŋalukus kɔ ŋasak Isak pəforu disrɛ.

32 Dɔsɔk din dadɔkɔ dɔ acar a Isiyaka ŋander ŋaloku kɔ teta kələmp kəŋkɔ ŋanakay mɔ, kɔ ŋaloku kɔ: «Səsɔtɔ domun.» 33 Kɔ Isiyaka ewe kələmp kaŋkɔ Sibeya. Ti tɔsɔŋɛ ntɛ aŋwenɛ dare dadɔkɔ Bɛrseba haŋ mɔkɔ mɔ.

34 Esay kəsɔtɔ kɔn meren 40, k'ɛlɛk aran aHewy, pac-we ŋa Sudit wan ka Beri kɔ Basmat wan ka Elɔn. 35 Kɔ aran aHitara akaŋɛ mɛrəŋ ŋawonəs Isiyaka kɔ Rebeka dis.