1 Abraham ɛnasikər, meren mɔn mɛnabɔlɛ kətɛŋc, Kanu Kəpɔŋ kənapocɛ kɔ pətɔt fəp. 2 Kɔ Abraham oloku wəcar kɔn nwɛ ɛnanaŋkanɛ kəwon nnɔ ndɔrɔn mɔ, nwɛ oŋclompəsɛ kɔ ca yɔn mɔ: «Mədeŋ kəca kam aləŋk ŋem tantɔf, 3 Indesɔŋ' am kədɛrəm Kanu Kəpɔŋ, Kanu nkɛ kəyi dareŋc kɔ dəntɔf mɔ, ta məlɛkɛ wan kem wəran wəKanahan, afum akaŋɛ indɛ dacɔ mɔ. 4 Mba məde məkɔ atɔf ŋem nde dəŋkom dem, məlɛkɛ di wan kem Isiyaka wəran.» 5 Kɔ wəcar kɔn oloku kɔ: «Tɔlɔma ta wəran ɔŋkɔ-wosɛ kəcɛps' em darəŋ kəder ka nnɔ-ɛ, tɛm tatɔkɔ iluksɛ wan kam atɔf nŋɛ məyɛfɛ mɔ ba?» 6 Kɔ Abraham oloku: «Ta məluksɛ wan kem dəndo de! 7 Kanu Kəpɔŋ nkɛ kəyi dareŋc mɔ, nkɛ kəsɔŋ' em kəsak afum em kɔ dəŋkom dem mɔ, nkɛ kəlok-lokər im a kədɛrəm' em kəsɔŋ ka atɔf ŋaŋɛ afum em mɔ, nkɔn sərka endesom mɛlɛkɛ mɛcəm' am fɔr kiriŋ, dəndo məndekɔ-lɛkɛ wan kem wəran mɔ. 8 Kɔ wəran ɔntɔkɔwosɛ kəcəm' am darəŋ-ɛ, iŋaŋnɛn' am kədɛrəm nkɛ isɔŋ' am kədɛrəm mɔ. Mba ta məluksɛ wan kem dəndo de!» 9 Kɔ wəcar endeŋ kəca wəbɛ kɔn Abraham aləŋk tantɔf, k'ɛndɛrəmɛ kɔ teta moloku mamɔkɔ. 10 Kɔ wəcar ɛlɛk yɔkɔmɛ wəco yɔkɔmɛ ya wəbɛ kɔn dacɔ, k'ɔŋkɔ. Tɛnatəŋnɛ pətɔmpər mes ma daka da wəbɛ kɔn. 11 Ntɛ ɛmbɛrɛ Mesopotami nde dare da Nahor mɔ, k'ɛŋcəp yɔkɔmɛ suwu dare kəsək ta ɔmbɔlɛ kələmp ka domun-ɛ, dec dɔrɔfɔy tɛm tɔkɔ aran ŋaŋwur kəkɔ-kɛt domun mɔ. 12 K'ontola: «Məna Kanu Kəpɔŋ, Kanu ka wəbɛ kem Abraham, məmar im kənəŋk ka paka mpɛ intɛn mɔ, ilɛtsɛn' am. Kɔ məyɔ ti-ɛ, məlasɛ wəbɛ kem Abraham layidi dɔkɔ mənasɔŋ kɔ mɔ. 13 In' ɛwɛ iŋcəmɛ nnɔ kələmp kəsək mɔ, k'ayecəra a afum a dare ŋawur kədekɛt domun-ɛ. 14 Pəyɔnɛ fɔ wəyecəra nwɛ indeloku fɔ: ‹Ilɛtsɛn' am məti tɔbɔl tam imun,› a wəkayi pəlok' im: ‹Məmun, isɔŋ sɔ yɔkɔmɛ yam yomun,› pəyɔnɛ a wəkakɔ məmpocɛ wəcar kam Isiyaka! Tɛm tatɔkɔ indecərɛ a məlasɛ wəbɛ kem Abraham layidi dɔkɔ mənasɔŋ kɔ mɔ.» 15 Ɛnalip fɛ moloku, kɔ Rebeka wan ka Betuhɛl, wan-sɔ ka Milka kɔ Nahor wɛŋc ka Abraham oŋwur pəgbaŋnɛ tɔbɔl tɔn. 16 Wəyecəra wətɔt teyi ɛnayi, ta ɛntacərɛ wərkun-ɛ, ali wərkun wəkin ɛnacərɛ fɛ kɔ dɛran. K'ontor dəkələmp k'ɛlas tɔbɔl tɔn k'ɛmpɛ. 17 Kɔ wəcar ɛyɛksɛ kəkɔ-faynɛ kɔ, k'oloku kɔ: «Məpoc em domun depic da tɔbɔl tam, ilɛtsɛn' am.» 18 Kɔ Rebeka oloku: «Məmun, wəbɛ kem!» K'ɛmbɛlkər kətinɛ kɔ tɔbɔl tɔn, k'ɔsɔŋ kɔ domun, k'omun. 19 Ntɛ elip kəsɔŋ wəcar ka Abraham k'omun mɔ, k'oloku kɔ sɔ: «Indekɛtɛ yɔkɔmɛ yam domun yi sɔ yomun haŋ pətəŋnɛ yi.» 20 K'ɛmbɛlkər kəneŋkəli domun dɛləpəs dəkəsamp, k'ɛyɛksɛ sɔ kəkɔ-kɛt domun dɔlɔma dəkələmp, k'ɛŋkɛtɛ yɔkɔmɛ fəp domun. 21 Kɔ wəcar ka Abraham eyifnɛ teta wəyecəra nwɛ dɛbəkəc, kɔ pəyɔnɛ fɔ Kanu Kəpɔŋ kəyi kəlompsɛ kɔ pɔkɔt pɔn-ɛ.

22 Ntɛ yɔkɔmɛ yelip kəmun mɔ, kɔ wərkun nwɛ ɛlɛk kurundɛ ka kɛma ka tɛŋcəmbəl dacɔ,* Delel da kurundɛ ka kɛma kaŋkɔ dɛnayɔnɛ ‹grammes› camət-tin. kɔ cəsora ca dəkəca mɛrəŋ ca kɛma ka mɛŋcəmbəl wəco,† Delel da kəsora kin dɛnayɔnɛ ‹grammes› tasar tin kɔ tɔlɔma. kəsora kin o kin k'ɔsɔŋ Rebeka. 23 Kɔ wərkun nwɛ eyif Rebeka: «An' okom əm-ɛ wəyecəra? Məlok' im ti ilɛtsɛn' am. Səntam kəsɔtɔ kəfo dəkəcepərɛnɛ pibi, nde kəlɔ ka papa kam?» 24 Kɔ Rebeka oloku: «Wan ka Betuhɛl iyɔnɛ, nwɛ Milka ɛnakomɛ Nahor mɔ.» 25 K'endeŋər: «Mɛmpəlɛ kɔ yika yɛlarəm yeyi nnɔ ndorosu kɔ tofo tecepərɛnɛ pibi teyi sɔ di.» 26 Kɔ wərkun nwɛ ontontnɛnɛ Kanu Kəpɔŋ nkɛ, 27 pəcloku: «Iŋkorkor əm məna Kanu Kəpɔŋ nkɛ, Kanu ka wəbɛ kem Abraham. Məna nwɛ məntɔsak kəlas layidi ndɛ mənasɔŋ kɔ mɔ, məcyɔnɛ wəbɛ kem mɛfaŋ mɔn fəp mɔ! Kanu Kəpɔŋ məsol' em kɔ məŋkɛr' em haŋ nnɔ kəlɔ ka awɛŋc a wəbɛ kem Abraham.» 28 Kɔ wəyecəra ɛyɛksɛ k'ɔŋkɔ pəlɔmər mes mamɔkɔ fəp kɛrɛ nde ndɔrɔn. 29 Rebeka ɛnayɔ wɛŋc wərkun pacwe kɔ Labaŋ. Kɔ wəkakɔ ɛyɛksɛ kəkɔ-mɔmən wərkun nwɛ, nde dəkələmp. 30 Labaŋ ɛnanəŋkɛ Rebeka kurundɛ kɔ cəsora dəwaca, k'ɛnanenɛ kɔ pəcloku: «Ti tɔ wərkun wəkakɔ olok-lokər əm.» Kɔ wɛŋc wərkun wəka Rebeka ender nda wərkun nwɛ, ɛnayi kələmp kəsək kɔ yɔkɔmɛ yɔn mɔ. 31 Kɔ Labaŋ oloku: «Məder məna nwɛ Kanu kəmpocɛ mɔ! Ta ake tɔ məndeyinɛ dabaŋka-ɛ? Ifɛŋ dəkəlɔ k'ilompsɛ yɔkɔmɛ yam tofo.» 32 Kɔ wərkun nwɛ ɛmbɛrɛ dəkəlɔ. Kɔ Labaŋ ontorɛ yɛsarɛ ya yɔkɔmɛ, k'ɔsɔŋ yi yika kɔ mɛmpəlɛ. K'ɔsɔŋ wərkun nwɛ kɔ afum aŋɛ ɛnasolɛ mɔ domun debikɛnɛ wɛcək. 33 Kɔ tɛyɛfɛ dənda k'aŋcəmbərɛ kɔ yeri. Mba k'oloku: «Ifɔdi kərɛsna paka, mɛnɛ iloku toloku ntɛ inder kəloku mɔ.» Kɔ Labaŋ oloku kɔ: «Məloku!»

34 K'oloku: «Awa. Wəcar ka Abraham iyɔnɛ. 35 Bel-bel bɔ Kanu kəmpocɛ wəbɛ kem pətɔt nwɛ ɔyɔnɛ fum wəlel mɔ. Kanu kəmpocɛ kɔ yɔcɔl yɔpɔŋ kɔ yɛfɛt, gbeti kɔ kɛma, acar arkun kɔ aran, yɔkɔmɛ kɔ sɔfale. 36 Sara wəran ka wəbɛ kem ende pəkomɛ kɔ wan wərkun detembəra dɔn disrɛ. Wan wərkun wəkakɔ, nkɔn wəbɛ kem ɔsɔŋ daka dɔn fəp. 37 Wəbɛ kem Abraham ɔsɔŋ' em kədɛrəm, kəc-loku: ‹Məfɔdetɛnɛ wan kem wəran ayecəra a Kanahan dacɔ atɔf nŋɛ iyi mɔ, 38 mba məde məkɔ nde iyɛfɛ mɔ, kor kosu disrɛ, mətɛnɛ di wan kem wəran.› 39 K'iloku wəbɛ kem: ‹Tɔlɔm ta wəran ɔŋkɔ-wosɛ kəcɛps' em darəŋ kəder nnɔ-ɛ.› 40 Kɔ wəbɛ kem olok' im: ‹Kanu Kəpɔŋ nkɛ iŋkɔt fɔr kiriŋ mɔ, kəndesom mɛlɛkɛ mɔn mɛbaŋ əm pɔkɔt pam. Məlɛkɛ wan kem wəran nde kusuŋka kosu, pəyɔnɛ sɔ wəka kor kosu.› 41 Kɔ Abraham olok' im: ‹Indewur' am kədɛrəm kaŋkɛ imbɛrs' am fɔ mədɛrəm mɔ, kɔ pəyi fɔ məŋkɔ nde kor kosu a ta awos' am, kəsɔŋ ka wan wəran-ɛ iŋŋaŋnɛn' am kədɛrəm kaŋkɛ.› 42 Ntɛ imbəpna mɔkɔ nde dəkələmp mɔ, k'iloku: ‹Kanu Kəpɔŋ, Kanu ka wəbɛ kem Abraham, kɔ məŋwosɛ kəlompəs em pɔkɔt-ɛ, 43 in' ɔfɔ nwɛ iyi kələmp ka domun kəsək mɔ.› Wəyecəra nwɛ endewur kədekɛt domun mɔ, nwɛ indeloku: ‹Məpoc em domun depic da tɔbɔl tam imun,› 44 a wəkayi pəlok' im: ‹Məbaŋ məmun məna sərka, indesɔkɛtɛ yɔkɔmɛ yam!› Wəyecəra wəkakɔ pəyɔnɛ nwɛ Kanu Kəpɔŋ kəŋcəmbərɛ wan ka wəbɛ kem Abraham mɔ! 45 Ilipna fɛ ti kəlokunɛ dɛbəkəc, kɔ Rebeka oŋwur pəgbaŋnɛ tɔbɔl dəkəbaŋca. K'ontor dəkələmp k'ɛŋkɛt domun. K'iloku kɔ: ‹Ilɛtsɛn' am məpoc' em imun.› 46 K'ɛmbɛlkər kətin' em tɔbɔl tɔn tɔkɔ ɛŋgbaŋnɛna mɔ, k'olok' im: ‹Məmun, indepocɛ sɔ yɔkɔmɛ yam yomun.› K'imun, k'ompocɛ sɔ yɔkɔmɛ yem kɔ yomun. 47 K'iyif kɔ: ‹An' okom əm-ɛ wəyecəra?› K'olok' im: ‹Wan ka Betuhɛl iyɔnɛ, wan-sɔ ka Nahor kɔ Milka.› K'imbɛr kɔ kurundɛ dololəm kɔ cəsora dəwaca. 48 K'intontnɛnɛ Kanu Kəpɔŋ, k'iyekyekəs ki, Kanu ka wəbɛ kem Abraham, nkɛ kəsol' em kədelɛk wan ka wɛŋc idesɔŋ kɔ Isiyaka wan ka nkɔn Abraham mɔ. 49 Ndɛkəl oŋ kɔ pəyɔnɛ fɔ məwosɛ kəlasɛ wəbɛ kem Abraham pəsoku disrɛ, layidi ndɛ mənasɔŋ kɔ mɔ, məsɔŋ' em ti kəcərɛ, kɔ pəyɔnɛ fɛ ti-ɛ, ikɔ kəca kəmeriya, kɔ pəyi fɛ ti-ɛ, kətɔt.»

50 Labaŋ kɔ Betuhɛl ŋaloku: «Tes tantɛ nda Kanu Kəpɔŋ tɛyɛfɛ, səfɔtam kəloku ti tɔlɔm o tɔlɔm. 51 Rebeka ɔfɔ wəkawɛ fɔr yam kiriŋ, məlɛk kɔ nəkɔ. Pəkɔ pəyɔnɛ wəran ka wan ka wəbɛ kam pəmɔ tɔkɔ Kanu Kəpɔŋ kəloku ti mɔ.»

52 Ntɛ wəcar ka Abraham ene moloku mamɔkɔ mɔ, k'ontontnɛnɛ Kanu Kəpɔŋ dəntɔf. 53 Kɔ wəcar k'Abraham owurɛ ca ya gbeti, ca ya kɛma, kɔ yamos k'ɔsɔŋ yi Rebeka, k'ompocɛ sɔ Labaŋ wɛŋc wərkun wəka Rebeka kɔ kɛrɛ kəŋan pəlarəm. 54 Ntɛ mes mamɔkɔ melip mɔ, wərkun nwɛ kɔ asol ɔn, kɔ ŋandi yeri kɔ ŋamun, kɔ ŋaŋcepərɛnɛ pibi. Dec dendesɔk, ntɛ ŋayɛfɛ mɔ, kɔ wəcar nwɛ oloku: «Nəsak im iluksərnɛ nda wəbɛ kem.» 55 Kɔ Labaŋ ŋaloku kɔ kɛrɛ: «Wan wəran pəyi nnɔ kərɛsna mata wəco kɔ səna. Kɔ teŋcepər-ɛ, məntam kəkɔ.» 56 Kɔ wərkun nwɛ oloku ŋa: «Ta nəsɔŋ' em kəwon ka nnɔ, bawo Kanu Kəpɔŋ kəlompəs em pɔkɔt. Nəsak im ilukus ndena wəbɛ kem.» 57 Kɔ Labaŋ ŋaloku kɔ kɛrɛ: «Səwe wan wəran, səyif kɔ tɔkɔ ɛfaŋ mɔ.» 58 Kɔ ŋawe Rebeka kɔ ŋayif kɔ: «Məfaŋ kəkɔ kɔ wərkun nwɛ ba?» Kɔ Rebeka owosɛ: «Ɛy.»

59 Labaŋ kɔ kɛrɛ ŋasak Rebeka kɔ wəran nwɛ ɛnabaŋ kɔ mɔ, wəcar ka Abraham kɔ asol ɔn kɔ ŋaŋkɔ. 60 Kɔ ŋantolanɛ Rebeka kɔ ŋaloku kɔ:

62 Tɛtəŋnɛ Isiyaka pəlukus kəyɛfɛ ka kələmp ka Lahay-Roy, pəndɛ nde atɔf ŋa Nɛkɛf. 63 Dɔfɔy dɔlɔma kɔ Isiyaka ɔŋkɔ dəŋkɔtəs dəkulum, endeyekti fɔr k'ɛnəŋk yɔkɔmɛ yec-der. 64 Rebeka endeyekti sɔ fɔr k'ɛnəŋk Isiyaka, k'ontor yɔkɔmɛ kəroŋ. 65 K'eyif wəcar ka Abraham: «Wərkun wəre ɔfɔ wəkawɛ nnɔ dəkulum nwɛ ender kəfaynɛ su mɔ?» 66 Kɔ wəcar oloku kɔ: «Wəbɛ kem ɔfɔ.» K'ɛlɛk kəloto kɔn k'ɛŋgbalərnɛ. Kɔ wəcar ka Abraham ɔlɔmər Isiyaka mes mɔkɔ ɛnacepərɛnɛ mɔ fəp. 67 Kɔ Isiyaka eŋkekərɛ Rebeka abal ŋa kɛrɛ Sara disrɛ. K'ɛlɛk Rebeka k'ɔyɔnɛ wəran kɔn, k'ɔmbɔtər kɔ. Ti t' ɛnasɔŋɛ Isiyaka pəwak kəpəl-pələs defi da kɛrɛ.