1 دَوُدَ نَشَ سَ عَ نْشُن عَدُلَمَ قْنمّ كُي. عَ تَارَيٍ نُن عَ بَرٍنيِيٍ تٌ نَ كٌلٌن، عٍ نَشَ سِفَ عَ قْشْ رَ. 2 مِشِ نَشٍيٍ نُ نَ تْورّ ندٍ كُي عَلْ دٌنِ كَنيِيٍ، عٍ نَشَ لُ عَ قّ مَ، عٍ عَ قِندِ عٍ شَ مَنفّ رَ. مِشِ كّمّ نَانِ حْندْن نُ نَ عَ قْشْ رَ.

3 دَوُدَ نَشَ كٍلِ مّننِ، عَ نَشَ سِفَ مِسِثَ مٌوَبَ بْشِ مَ. عَ نَشَ عَ قَلَ مٌوَبَ مَنفّ بّ، عَ نَشّ، «يَندِ، عَ لُ ﭑ بَبَ نُن ﭑ نفَ شَ سَبَتِ بٍ سِندٍن، هَن ﭑ شَ عَ كٌلٌن عَلَتَلَ وَ مَ نَشَن شْن ﭑ بّ.» 4 دَوُدَ نَشَ عَ شَ مِشِيٍ شَنِن نَ مَنفّ شْنيِ، عٍ نَشَ لُ مّننِ دَوُدَ قّ مَ. 5 عَننَبِ فَدِ نَشَ عَ قَلَ دَوُدَ بّ، عَ نَشّ، «عِ نَشَ لُ يِ مَنفّ شْنيِ. عِ شَ فبِلٍن يُدَيَ.» دَوُدَ نَشَ كٍلِ، عَ سٌ شّرّتِ قْتْنيِ يِرٍ.

6 سْلُ تٌ دَوُدَ نُن عَ قْشِرَبِرّيٍ شَ شِبَارُ مّ، عَ نُ نَ فِبٍيَ، تَمَرٍ بِلِ بُن مَ، فٍيَ قَرِ. عَ شَ تَنبّ نُ سُشُشِ عَ يِ رَ، عَ شَ مِشِيٍ نُ نَ عَ قّ مَ. 7 عَ نَشَ عَ قَلَ عٍ بّ، عَ نَشّ، «وٌ وٌ تُلِ مَتِ، وٌ تَن بُنيَمِن بْنسْييٍ. يِسَيِ شَ دِ قَمَ نّ وّنِ يِرٍيٍ نُن شّيٍ قِدٍ وٌ مَ؟ عَ وٌ قِندِ سْورِ وُلُ شُنيِيٍ رَ، شَ نَ مُ سْورِ كّمّ شُنيِيٍ رَ؟ 8 وٌ بِرِن بَرَ ﭑ يَنقَ. مِشِ يٌ مُ ﭑ نَكٌلٌنشِ ﭑ مَ دِ نُن يِسَيِ شَ دِ بَرَ سَاتّ شِرِ. وٌ مُ كِنِكِنِ ﭑ مَ، وٌ مُ عَ قَلَ ﭑ بّ ﭑ مَ دِ وَ مَ ﭑ مَ كٌنيِ شُنيِ عِكٍلِقٍ ﭑ شِلِ مَ، عَلَكٌ نَ شَ فَنتَنيِ سَ ﭑ يَ رَ عَلْ عَ قَ نَ كِ نَشّ يِ كِ تٌ.»

9 سْلُ شَ شُرُ سٍ كَنتّيٍ شُنيِ، عٍدٌنكَ دٌوٍفٍ، نَ نَشَ عَ قَلَ سْلُ بّ، «ﭑ تَن يِسَيِ شَ دِ تٌ نّ نٌبٌ، عَشِتُبَ شَ دِ عَشِمٍلٍكِ شْنيِ. 10 عَشِمٍلٍكِ نَشَ عَلَتَلَ مَشَندِ عَ بّ، عَ دٌنسٍيٍ سٌ عَ يِ رَ، عَ نُن فٌلِيَتِ قِلِسِتَكَ شَ سَنتِدّفّمَ.»

11 مَنفّ نَشَ شّيرَيٍ شّي سّرّشّدُبّ عَشِمٍلٍكِ شِلِدٍ، عَ نُن عَ شَ دٍنبَيَ نُن سّرّشّدُبّ نَشٍيٍ بِرِن نُ نَ نٌبٌ. عٍ تٌ قَ مَنفّ يِرٍ، 12 سْلُ نَشَ عَ قَلَ عٍ بّ، عَ نَشّ، «عَشِتُبَ شَ دِ، عِ تُلِ مَتِ ﭑ نَ.» عَ نَشَ عَ يَابِ، «ﭑ مَرِفِ، ﭑ تُلِ مَتِشِ عِ رَ.» 13 سْلُ نَشّ، «مُنقٍ رَ عِ يَنقّ مَشِرِشِ ﭑ شُن مَ، وٌ تَن نُن يِسَيِ شَ دِ؟ مُنقٍ رَ عِ تَامِ نُن سَنتِدّفّمَ سٌشِ عَ يِ رَ، عِ مَن قَ عَلَتَلَ مَشَندِ عَ بّ، عَلَكٌ عَ شَ عَ يَ رَقِندِ ﭑ مَ، عَ شَ فَنتَنيِ تٍ ﭑ بّ عَلْ عَ قَ نَ كِ نَشّ يِ كِ تٌ.»

14 عَشِمٍلٍكِ نَشَ وْيّنيِ تٌنفٌ، عَ نَشّ، «ندٍ تِنشِن عِ بِتَنيِ دَوُدَ بّ عِ شَ مِشِيٍ يَ مَ؟ ندٍ شَ بِنيّ دَنفِمَ عَ رَ عِ شَ بَنشِ كُي؟ 15 ﭑ بَرَ عَلَتَلَ مَشَندِ عَ بّ سَنيَ وُيَشِ. مَنفّ، عِ نَشَ يِ كَلَمُي سَ عِ شَ كٌنيِ نُن عَ شَ دٍنبَيَ شُن مَ، بَرِ مَ ﭑ مُ سٍسٍ كٌلٌن يِ قٍ كُي.» 16 مَنفّ نَشَ عَ قَلَ، «عَشِمٍلٍكِ، ﭑ عِ تَن نُن عِ شَ دٍنبَيَ قَشَمَ تٌ.» 17 مَنفّ نَشَ عَ قَلَ عَ شَ سْورِيٍ بّ، نَشٍيٍ نُ تِشِ عَ قّ مَ، عَ عٍ شَ عَلَتَلَ شَ سّرّشّدُبّيٍ قَشَ، بَرِ مَ عٍ مُ عَ رَكٌلٌن عَ دَوُدَ نَ فِقٍ عَ مَ. كْنْ سْورِيٍ تَن مُ تِن نَ رَبَدٍ.

18 نَ كُي مَنفّ نَشَ عَ قَلَ دٌوٍفٍ بّ، «عِ تَن شَ يِ سّرّشّدُبّيٍ قَشَ.» عَوَ دٌوٍفٍ عٍدٌنكَ نَشَ عٍ قَشَ. نَ لْشْي عَ مِشِ تٌنفٌ سٌلٌمَسَشَن نُن سُولِ نَن قَشَ، سّرّشّدُبّ دٌنمَ رَفٌرٌشِ نَشٍيٍ مَ. 19 عَ نَشَ عٍ شَ تَا مِشِيٍ قَن قَشَ سَنتِدّفّمَ رَ، شّمّيٍ يٌ، فِنّيٍ يٌ، دِ مّيٍ يٌ، دِيْرّيٍ يٌ. هَلِ نِنفٍيٍ بَ، سٌقَلٍيٍ بَ، يّشّييٍ بَ، عٍ نَشَ عٍ بِرِن قَشَ سَنتِدّفّمَ رَ.

20 عَشِمٍلٍكِ شَ دِ شّمّ عَبِيَتَرِ، عَشِتُبَ شَ مَمَدِ، نَ نَن كٍرٍن نْ عَ فِدٍ. عَ نَشَ سِفَ عَلَكٌ عَ شَ بِرَ دَوُدَ قْشْ رَ. 21 عَ نَشَ عَ قَلَ دَوُدَ بّ عَ سْلُ بَرَ عَلَتَلَ شَ سّرّشّدُبّيٍ قَشَ. 22 دَوُدَ نَشَ عَ يَابِ، «نَ لْشْي ﭑ نُ بَرَ عَ مَحْشُن عَ دٌوٍفٍ عٍدٌنكَ قَمَ نّ ﭑ مَ قٍ قَلَدٍ سْلُ بّ. ﭑ تَن نَن عَ نِيَشِ عِ شَ مِشِيٍ شَ قَشَ. 23 هَلِ عِ مُ فَاشُ. لُ ﭑ سّيتِ مَ، بَرِ مَ نَشَن وَ مَ ﭑ قَشَقٍ، عَ وَ مَ عِ قَن قَشَقٍ. عِ نَ كَنتَرِ نَن كُي ﭑ قّ مَ.»