1 Bere Yile neki kathu-ka murrinh patha nimin-ya mampirruneme Noah i wakal nukunu. “Nga. Nanki-ka wakal terert nubuymanguthputhnu nuru i ngana deyida pawithpithnu i pubuylangnu puru da pana ngangka-re. 2 I ku terert-ka penanmanhamnu puru, ku ngala ngala-ya, ku purrkpurrk-ya, ku murrirrbe-ya i ku ngurlmirl-ya. I ngay-ka kardu pule ngala bunanpaknu narnirranu ngarra ku wurnangat warda ngatha. 3 I ku nhini-ka ku-ka dhepdhep nanki nhini-yu. Ngay-ka mi ngamnarramut da marra-re-yu, mu marra-ka ku wanku i mi dhepdhep nurumurrknu-yu. 4 Mu ku ngen-ka mere nullath ngarra kumulung wanku da ngatha dim-yu, mu kumulung warra ngadha pirriwu i panirikerdek-da-nu mana. Kumulung-ka nanhthi ngala-wa, nanhthi ngarra nginipunh birnu nukunu.

5 “Mu ku-re ngatha kardu balelenu i purdurinuminu ngatha-ka nhini ngay-ka ngurdunawerl-deyida-nu ku nhini-yu. I kardu numi-re ngatha kardu pubatnu purdurinuminu-ka nhini ngay-ka ngurdunawerl-deyida-nu kardu nhini-yu. 6 Ngay mamnanpatha nanki-ka mangini ngay deyida mani. I nhini kardu nangkal ngatha thu pubat i kurdurinumi kardu numi, nhini-ka kardu ngamere deyida-ka thu puddunawelnu puddurinuminu kardu nhini-yu. 7 Bere nanki-ka wakal terert nubuymanguthputh nuru i ngana deyida pawithpithnu i pubuylangnu puru da pana nganka-re.”

8 Bere Yile neki kathu-ka mampirru-deyida-neme Noah i wakal nukunu-re, 9 “Mu nga. Murrinh ngay murrinh patha nimin-ya nganarrumutnuneme. Murrinh kanhi-ka nankuneme-nu i kardu pumpan deyida kathu tiduk, 10 i ku deyida wanku ku terert nhini ngarra tharntu kathu pungawurr. 11 I kanhi-wa murrinh-yu nganarrumutnuneme-yu. Ngay-ka mere deyida ngurduthuk nukun kura ngala thathpirr kanhi mani-yu i mere deyida ngirranparlak nukun kardu wurnangat-yu i ku wanku-yu. I ngay-ka mere deyida mawiye nukun da putek ngala pana-yu kura ngala-re-yu.

12-13 “I mange kanhi-wa the numabathnemenu-yu murrinh ngarra ngay thangunu ngamnarrumutneme-yu. Ngay-ka ku kanamkek ngay bupaknu ngarra kalakkalak. I da-ka nhini-re-wa the numabathnemenu-yu murrinh ngay punu da bere matha wangu nankuneme-nu i kardu pumpan deyida tiduk kathu i ku wanku. 14 I ngarra ngurduthuknu-re nanhthi kalakkalak-ka i nhini-re-ka nubangkardunemenu ku kanamkek wunku 15 ngay-ka the da ngatha mabathnu murrinh nhini ngarra ngay thangunu ngamnarrumutneme-yu murrinh pana ngamam mere deyida ngurduthuk kura ngala thathpirr-ya, i mere nukun deyida ngirranparlak kardu i ku. 16-17 I ngarra ku kanamkek nhini-re pinthanu ngarra kalakkalak, ngay-ka bangkardu i the da ngatha mabathnu murrinh patha nhini ngay thangunu ngamnarramut-yu i ku wunku da bere matha wangu-yu. Ngarra ku kanamkek-te nubangkardunu-ka nhini-wa da-yu the numabathnu-yu murrinh ngay thangunu ngamnarramut-yu.” Yile neki kathu-yu mampirruneme.

Bere wakal nukunu Noah-ka Shem, Ham i Japheth. Bere da ngarra kura ngala-re thangunu kathu-ka i kardu-ka kanhi-wa pigunu thangunu-yu pubammanguthputh-yu kardu wurnangat thurran kanhi warda ngatha ngarra da putek ngala kanhi-yu.