1 Bere Yile neki-ka bere ngatha dirrankupedhangime kardi kardu Noah peningime i ku wunku ngarra tharntu pardinganamardadha. Bere nhini thangunu-ka nanhthi wirrirr warda wurdanthuk yurrirrdha i kura-ka yunginiyerrdha wurrini thawath. 2-3 Kura lurruth ngala nhini ngarra putek pepe thangunu denawirnturttha wurrini-ka, manthap warda. I kura yelyel deyida manthap. I kura ngala ngarra da putek mamperdum-ka thawath da matha da merrk 5-nu-ya wurdanathuttha wurrini, 4 i ngarra tharntu pirret da mana ngarra da palyirr ngala kangkarl. Da-ka murrinh-ka Ararat palyirr-yu. 5 I kura-ka puy wangu wurdanathuttha wurrini da 74 days-nu-ya i ngarra palyirr ngala ngala da mana daniwerurtuydha wurrini.

6 Bere da 40 days thangunu mam, nukunu Noah-ka nanhthi window ngarra mampatha ngarra tharntu-ka mantharl warda 7 i ku wak wurdanthuk. Mu ku-ka mere wurdanawurldha, mu bere matha benarduy-da-dha ngatha kardi ngarra kura thathpirr yunganyerr. 8 I da 7 thangunu mam-ka ngarra ku nhini-re benarduy da-dha ngatha kardi-ka ku numi warda wurdanthuk ku bamanthamarl kura-nu bamkardu wurdannayith. 9 Mu kura-ka kuguk da ngatha ngala da ngatha pirridha i ku nhini-ka mere da ngatha ngarra pirrangittha, i nhini-ka wurdawurl deyida ngarra tharntu. I Noah-ka nithi yungannawuy wurdankarl ku nhini-yu.

10 Bere da ngarra 7 nhini thangunu kathu-ka ngana deyida wurdanthuk ku nhini da ngatha. 11 I da kungini nhini da ngatha wurdawurl nanhthi mulurn marra wanku kanthibirrdha tharra wurdannangkarl ngarra Noah-nu. I nukunu-ka the warda mammath kura-ka yunganyerr warda 12 Bere da 7 nhini thangunu-ka da numi deyida ku nhini da ngatha wurdanthuk, mu ku-ka mere wurdananawurldha ku bamanthamarl nhini-ya.

13 Bere da nhini-re ngarra nukunu Noah-re kardidha ngarra da thangku nukunu 601, da merrk numi i da numi, kura nhini-ka yunganyerr. I bere nanhthi pana ngarra ngurru kangkarl ngarra pelpith darnarrawup-ka yunganwurr warda mintherr i bamkardu nhini kura-ka yunganyerr warda. 14 I bere da merrk perrkenku nhini thangunu-ka da putek-ka tumtum thathpirr warda yudha nhini-yu.

15 I bere Yile neki kathu-ka mamna Noah, 16 “Nungewuy-warda-ngime ngarra tharntu kathu-yu 17 i ku wanku kathu thungunwurr. I ku-ka ngana deyida pawithpithnu i pubuylang-deyida-nu purru da ngarra putek ngala pana-yu.” 18 I bere Noah peningime-ka pungamkawuy-warda-ngime. 19 I ku wanku pungawurr warda, ku ngala ngala-ya, ku purrkpurrk-ya, ku parlakmenanudha wurrini-ya, ku murrirrbe-ya, ku terert warda ngatha pungawurr, i ku pumemkarart-wa nhini-yu.

20 Bere nhini thangunu Noah-ka nanhthi palyirr warda bangamkarda. I ku pana ku numi numi ku ngarra tarangka-ka menkararttha pirri puninthuktha warda pirri. I thungku ngarra palyirr numi numi ku binhi da matha ningamnapek Yile neki-nu.

21 Bere Yile neki menthingap warda kangunu patha ngarra ku thangunu kathu wurriniwuyrdarridha, i murrinh warda memnu, “Ngay-ka mere deyida mawiye nukun da putek ngala pana-yu kura ngala-re-yu, kardu thangunu da mange wiye pumebaththa pardi. Kardu-ka da mange wiye da matha pubenthengkarnirn pumpan ngarra mamay-re kathu, mu ngay-ka mere deyida ngirranparlak nukun kardu i ku, mange kanhi ngamam mani. 22 Mu ngarra da putek ngala pana pirra da-nu ngatha-ka, da ngarra ngunga-re-ya, da thipinhi-ya, da merrk-ya, mirrangan-ya, da malarnpakpak-ya i da thangku-ya, da nhini-ka da bere ngatha wangu purungkadhuknu.”