Naꞌ Markus Naꞌ Markus 16

Usif Jesus nmoni nfain!

(Mateus 28:1-8; Lukas 24:1-12; Joao 20:1-10)

1 Mbi in nmeu-nokaꞌ, neon neeꞌ, atoni Jahudi sin neon onen. Olas maans aa nmouf, nalali te, bi Maria naꞌko kuan Makdala, bi Maria bian antein (naꞌ Yakobus in enaf), ma nok bi Salome, sin nnaon nsosan miin foo meni, he nmeu-nokaꞌ te, sin he nnaon npoip neu Jesus In aon nitun natuin atoni Jahudi sin nonot. 2 Mbi neno ꞌnaek, fe fafai anaꞌ, sin teun sin nnaon neu bool fatu nitu nane. 3-4 Mbi lalan in aꞌtnanan, sin namoolk in mnak, “Anei! Sikau es lof nahuil naꞌaib kit fatu ꞌnaek mbi bool fatu in enoꞌ nane? Namneo, hit teun kit ii tahuil fatu ka tabeiꞌ fa, fun fatu nane ꞌnaek anneis!”

Mes olas sin ntenuk nae, sin niit fatu nane nahuil on ee. 5 Oke te, sin ntaam onuk bool fatu nane. Ma sin naskeek ma namtaun, fun sin niit liꞌaan mone meseꞌ ntook mbi sin banaapk in aꞌneꞌu. In natai sabaul muit oe meꞌu. 6 Ma liꞌaan mone nane, natoon sin mnak, “Hi kais mimtau! Au uhiin ki hi eim he maim Jesus, atoni Najaret, leꞌ sin naꞌmaet Ee mbi hau nehe. In ka es fa ije be, fun In nmoni nfani ee. Eim, hi mail kim bale leꞌ sin natupaꞌ Jesus In aon nitun. Luumn ee! 7 Hi mfain sabake nai! Mnao mitonan sin Pedru mak, Jesus nmoni nfani ee. In nnao nahunu ee, es Galilea. Lof sin naꞌeuk nok Usif Jesus mbi nae, on leꞌ unuꞌ In natonan nain neu sin. Hi mfain nai!”✡

8 Olas bifeel in niit bale nane luman, sin naskeken ma namtaun. Oke te, sin naen anpoin. Ma sin naen anfain sabake-sabakeꞌ neu ume. Sin ka natonan fa neu es-am-es mbi lalan, fun sin namtaun nneis.

[Usif Jesus naꞌeuk nok bi Maria naꞌko kuan Makdala

(Mateus 28:9-10; Joao 20:11-18)

9 Neno ꞌnaek nok-nok anaꞌ, Usif Jesus nalileꞌ nahuun In human neu bi Maria naꞌko kuan Makdala, leꞌ unuꞌ Usif Jesus nliuꞌ napoin pah-tuaf hiut naꞌko heꞌ.* 10 In nail nalail Usif Jesus, ma in nnao nfain he natoon atoni ok-okeꞌ leꞌ unuꞌ natuin Jesus. Sin fe nabuab ok nok neek susal, ma nok sin nkaen namnau Jesus In aꞌmaten. 11 Oke te, Maria natonan neu sin mnak, “Anasaaꞌ te hi neekm in fe msusal? Mileko hi neekm in nai, fun Usif Jesus nmoni nfani ee! Alelo, au uꞌeku mbi nae!”

Mes sin ok-okeꞌ natae mnak, “Huus! Ho muꞌmoel aah!”

Usif Jesus nalileꞌ In human neu atoni nua ntein

(Lukas 24:13-35)

12 Nalali te, Jesus In asium-noinaꞌ sin, atoni nua, nnaon neu kuan es. Mbi lalan tnanan, Usif Jesus nalileꞌ In human neu sin, ma In nabaij on. Mes neka ntee ꞌloo, sin nahiin Ee. 13 Nalali te, nua sin nnaon nfanin, ma natonan sin aok-biak in mnak, “Hoee! Mneen ije feꞌ! Lelo leꞌ ii, hai miꞌeuk mok Usif Jesus mbi lalan!”

Mes sin aok-biak in nataen mnak, “Huus! Hi nua ki kais miꞌmoeb kai on naan!”

Usif Jesus naꞌeuk nok In asium-noinaꞌ sin ok-okeꞌ

(Mateus 28:16-20; Lukas 24:36-49; Joao 20:19-23; Haef in sin Lasi 1:6-8)

14 Oke te, Usif Jesus nalileꞌ In human neu In asium-noinaꞌ sin boꞌes am meseꞌ, olas sin ntoko mnahan. Ma In nabokan sin mnak, “Akoi! Hi neekm in feꞌ namanun on fatu! Atoni natonan nalail ki nak, sin niit Kau neik sin maatk ini, mes hi ka mpalsaif! Hi mak sin naꞌmoen! Olas ii, Au oum aꞌmees. Namneo Au ꞌmaet, mes olas ii, Au ꞌmoni ꞌfani ee! Hi nabeiꞌ mail kim.

15 Es on nane te, hi musti mnao mipuun pah-pinan fuun am nateef, he mitoon ma msaksii Au Laes Alekot ii neu atoni ok-okeꞌ.✡ 16 Sikau es anpalsai neu Kau, ma maslaniꞌ, lofa Uisneno nfee ne ꞌhonis, he in nabala piut nok Uisneno mbi neno tunan. Mes sikau es ka npalsai neu Kau, lofa Uisneno nfee ne haꞌmuꞌit nabal-baal, ma Uisneno nliuꞌ napoi ne neu moneꞌ. 17 Ma sikau es anpalsai neu Kau, sin lofa nmoeꞌ lasi takaf humaꞌ-humaꞌ, henati atoni ok-okeꞌ nahinen mnak, sin abeiꞌk ini neem naꞌko Uisneno. Es on nane te, sin nabeiꞌ sin nliuꞌ pah-tuaf in neik Au kanak. Lof Uisneno nfee sin he namoolk in neik uab bian, leꞌ sin ka nahinen fa. 18 Nalali te, kalu sin nhuuk kaunaꞌ leꞌ mabisaꞌ, aiꞌ sin ninun ntoom laso, sin ka nsilakan fa. Kalu sin npooh atoin amenat sin ꞌnaak in, lof sin nalekon.”

Usif Jesus ansae on neno tunan

(Lukas 24:50-53; Haef in sin Lasi 1:9-11)

19 Namolok nalail nok In asium-noinaꞌ sin, Uisneno naꞌaitiꞌ nasaeb Usif Jesus on sonaf neno tunan. Mbi nane, In ntook mbi Uisneno In banapan aꞌneꞌu, ma sin nhuuk plenat nabuan.✡

20 Nalali te, In asium-noinaꞌ sin nanaoba In aplenat. Sin nnaon neu pah-pah, ma natonan Usif Jesus In Laes Alekot neu atoni ok-okeꞌ. Ma Uisneno nfee sin kuasat, henati sin anmoꞌen lasi mkakat ok-okeꞌ leꞌ Usif Jesus natoon nalail neu sin. Ma nalail, nmuiꞌ atoni namfau leꞌ npalsai neu Usif Jesus, fun sin nahinen nak, Laes Alekot nane, namneo.]

[NAꞌ MARKUS NAHEUB IN MOLOK, NATUIN LULAT UN-UNUꞌ BIAN

Olas bifeel teun in nane, nnaon ntenuk sin Pedru, sin natonan ok-okeꞌ leꞌ alelo sin niit liꞌaan munif nane, leꞌ namolok nok sin mbi bool fatu.† Oke te, Usif Jesus naplenat kuun In asium-noinaꞌ sin, he nnaon natonan In Laes Alekot ii neu pah-pah ok-okeꞌ, tal antee pah-pinan fuun am nateef. Laes Alekot ije nalekan lalan henati Uisneno nsaok atoni amfaut in naꞌko sin sanat ma penu, ma he nmonin piut nok Uisneno.

Laes Alekot ije, namneo on naan. Es nane te, Laes Alekot ii nhaek piut, tal antee nabal-baal. Amen.]

✡16:7 Mateus 26:32; Markus 14:28

*16:9 Lulat lasi Gregu (Yunani) leꞌ ahun-hunut ma leꞌ naleko nneis, naꞌtuuꞌb on es elaꞌ 8. Naꞌ Markus in tonas namsoup be neik lasi nonoꞌ nua. Es amnanu (Markus 16:9-20), ma esa naꞌpaal (Markus 16:9-10). Natuin atoin ahinet sin leꞌ nahiin maneꞌo-maneꞌo naꞌ Markus in tonas ii, sin nak lasi nonoꞌ nua in ii, leꞌ sin nluul namunib. Lasi nonoꞌ nua in nane, naletaꞌ neu Usif Jesus nmoni nfain naꞌko In aꞌmaten, ma mepu plenat neu atoni leꞌ anpalsai neu Jesus.

✡16:15 Haef in sin Lasi 1:8

✡16:19 Haef in sin Lasi 1:9-11

†16:9 Lulat lasi Gregu (Yunani) leꞌ ahun-hunut ma leꞌ naleko nneis, naꞌtuuꞌb on es elaꞌ 8. Naꞌ Markus in tonas namsoup be neik lasi nonoꞌ nua. Es amnanu (Markus 16:9-20), ma esa naꞌpaal (Markus 16:9-10). Natuin atoin ahinet sin, leꞌ nahiin maneꞌo-maneꞌo naꞌ Markus in tonas ii, sin nak lasi nonoꞌ nua in ii, leꞌ sin nluul namunib. Lasi nonoꞌ nua in nane, naletaꞌ neu Usif Jesus nmoni nfain naꞌko In aꞌmaten, ma mepu plenat neu atoni leꞌ anpalsai neu Jesus.