1 Dor dɛŋc-bɛk kəbɛk dəm dɔtɔf. 2 Ntɛ ŋalip kədi malɔ mɔkɔ ŋanakɛrɛ kəyɛfɛ Misira mɔ, kɔ Yakuba oloku awut ɔn: «Nəluksərnɛ, nəkɔ nəwayɛ su yeri yepic.» 3 Kɔ Yuda oloku kɔ: «Wəbɛ ka Misira ɛnabeŋnɛ su: ‹Ta inəŋk nu sɔ cəro, kɔ nəntɔkɛr' em wɛŋc konu wələpəs-ɛ.› 4 Kɔ məŋwosɛ kəsak wəfɛt kosu səkɔ-ɛ, səntor Misira kəkɔ-way' am yeri. 5 Kɔ məntɔwosɛ kəsak kɔ səkɔ-ɛ, səfɔtam kətor Misira kəkɔ-way' am yeri, bawo wərkun kakɔ ɛnaloku: ‹Ta inəŋk nu sɔ cəro kɔ nəntɔkɛr' em wəfɛt konu-ɛ.›» 6 Kɔ Yakuba oloku: «Ta ake tɔ nənayɔn' em pəlɛc tantɛ, kəcloku wərkun wəkakɔ a nəyɔ wəfɛt-ɛ?» 7 Kɔ awut ɔn ŋaloku: «Wərkun wəkakɔ ɛnayifət su pəlarəm te tosu kɔ tokomɛnɛ tosu, pəcyif su: ‹Papa konu ɔsɔrɔyi doru? Nəyɔ wɛŋc wəlɔma sɔ?› Kɔ səluksɛ kɔ moloku mamɔkɔ. Sənatam kəcərɛ ba, a endeloku su: ‹Nəkɔ nəkɛr' em wəfɛt konu!›?» 8 Kɔ Yuda oloku papa kəŋan Yakuba: «Məsak wəfɛt səkɔ kɔ ina. Səndeyɛfɛ səkɔ, tɔsɔŋɛ su kədeyi doru ta səfi-ɛ, məna papa, awut asu kɔ səna. 9 In' ɔsɔŋ əm temer, teta wəfɛt: In' ɔ məndewer kɔ, kɔ intɔkɛr' am kɔ-ɛ, ta iluksɛ kɔ ider ibɛr əm kɔ dəwaca-ɛ, tɛm tatɔkɔ in' endesɔŋ' am kətɔnəŋk sɔ wan kam. 10 Patɔbɔlsɛnɛ moloku-ɛ, kɔ səntam ntɛ kəkɔ kəmɛrəŋ səlukus.» 11 Kɔ papa kəŋan Yakuba oloku ŋa: «Bawo teyi tantɛ, nəkɔ nəyɔ ntɛ. Nəlɛk ca ya atɔf ŋaŋɛ yɔlɔma nətɔmpərɛnɛ wərkun wəkakɔ, pəmɔ: Dɔni, mɛsɛ ma cəme mepic, cigbili, yamaku kɔ mɛgbɛn ma yalakɛ kɔ cola.* Ti tɔ tatɔkɔ mɛgbɛn mɛyɛŋk kəway 12 Nəlɛk pəsam pɔkɔ nənakekərɛ tɔcɔkɔ-cɔkɔ mɔ kəmɛrəŋ. Nəluksɛ pəsam pɔkɔ anabɛrɛ nu dəlɔba mɔ, tɔlɔma ŋanaciya kəciya dəm. 13 Nəlɛk wəfɛt konu nəkɔ ndena wərkun wəkawe. 14 Intola Kanu Kəpɔŋ nkɛ kəntam mes ma doru fəp mɔ, kəsɔŋɛ wərkun wəkakɔ pəkɔ pəyɔnɛ nu nɔnɔfɔr pəsak wɛŋc konu wəkɔ osumpər mɔ nəder, nəkɛrɛnɛ sɔ Beŋyamin! Kɔ ina kɔ pəyi fɔ awut em ŋandewur im dəwaca-ɛ, awa ŋawur im dəwaca!»

15 Kɔ awut a Yakuba ŋalɛk yɔtɔmpərɛnɛ kɔ pəsam pɔkɔ ŋanakekərɛ tɔcɔkɔ-cɔkɔ mɔ kəmɛrəŋ, kɔ Beŋyamin. Kɔ ŋayɛfɛ, kɔ ŋantor Misira. Kɔ ŋaŋkɔ ŋamentərnɛ Isifu. 16 Ntɛ Isifu ɛnəŋk Beŋyamin kɔ awɛŋc aŋa mɔ, k'oloku wəcamsɛ kɔn: «Məbɛrsɛ afum akaŋɛ dɛkɛr, mədif pɔcɔl, məcoŋ, bawo afum akaŋɛ ŋɔ sən' endenadi mɔkɔ yeri tofo tin daŋana.» 17 Kɔ fum wəkakɔ ɔyɔ tɔkɔ Isifu ɛnaloku kɔ mɔ, k'ɛmbɛrsɛ afum aŋɛ dɛkɛr ndena Isifu. 18 Kɔ awɛŋc a Isifu ŋanesɛ ntɛ anabɛrsɛ ŋa ndena Isifu mɔ, kɔ ŋaloku: «Teta pəsam pɔkɔ anasak lɔba yosu disrɛ mɔ ti t' aŋkɛrɛ su nnɔ. Aŋkɛrɛ su nnɔ, ŋadewɛkərnɛ su ŋacəmbər su dacar kɔ sɔfale sosu.» 19 Kɔ ŋalɔtərnɛ wəcamsɛ ka Isifu, kɔ ŋaloku kɔ moloku mmɛ dəkusuŋka: 20 «Nəŋaŋnɛ Wəbɛ! Sənader tɔcɔkɔ-cɔkɔ kədeway yeri. 21 Ntɛ səŋc-lukus mɔ, kɔ səŋkɔ sikəli lɔba yosu karwaŋse, kɔ sənəŋk nwɛ o nwɛ pəsam pɔn nde alɔba ŋɔn. Mba səŋkɛrɛnɛ sɔ pi. 22 Səŋkɛrɛnɛ sɔ pəsam pɔlɔma kədeway yeri. Səŋcərɛ fɛ nwɛ ɛnabɛr pəsam papɔkɔ nde lɔba yosu disrɛ mɔ.» 23 Kɔ wərkun nwɛ oloku ŋa: «Ta nənesɛ bəkəc yɔfɔr nu! Kanu konu kɔ, Kanu ka papa konu kənasɔŋ nu pəsam nde lɔba yonu. Pəsam ponu pɛnader im.»

Kɔ wəcamsɛ ka Isifu owurɛnɛ Simɔŋ nnɔ awɛŋc aŋa ŋayi mɔ. 24 Kɔ fum wəkawɛ ɛmbɛrsɛ ŋa nde kəlɔ ka Isifu disrɛ. K'ɔsɔŋ ŋa domun, kɔ ŋambikɛnɛ wɛcək. K'ɔsɔŋ sɔ sɔfale səŋan yika. 25 K'olompsɛ ŋa yeri haŋ tɛm ntɛ Isifu ɛnakɔ der daŋ mɔ, bawo ɛnanenɛ Isifu pəc-loku: «Sən' endedi yeri daŋ dɔmɔkɔ kɔ ŋa.» 26 Ntɛ Isifu ender dɛkɛr daŋ mɔ, kɔ awut a Yakuba ŋasɔŋ Isifu ca yɔkɔ ŋanatɔmpərɛnɛ kɔ mɔ, kɔ ŋantontnɛnɛ kɔ dəntɔf. 27 Kɔ Isifu eyifət ŋa teta dis daŋan, k'eyif ŋa: «Papa konu wətem wəkɔ nəŋle mɔ, ɛntamnɛ? Ɔsɔrɛyi doru?» 28 Kɔ awɛŋc aŋa ŋaloku: «Wəcar kam, papa kosu ɛntamnɛ, ɔsɔrɔyi doru.» Kɔ ŋantontnɛnɛ Isifu. 29 Kɔ Isifu eyekti fɔr. Ntɛ ɛnəŋk Beŋyamin wəpaŋnɛ kɔn kɛrɛ mɔ, k'eyif ŋa: «Wəkawɛ ɔyɔnɛ wəfɛt konu wələpəs, wəkɔ nənalok' im tetɔn mɔ?» K'ɔnɔcər: «Kanu kəmar əm wan kem!» 30 Kɔ Isifu oŋcopər moloku, bawo ɛŋctɛyɛ-tɛyɛ pəbotu pa kənəŋk ka wɛŋc, ɛnafaŋ kəbok. Kɔ Isifu ɛmbɛrɛ dəkulɔ dɔn, k'ombok di haŋ. 31 Kɔ Isifu ɛsak kəbok, k'ombufərnɛ kəro, k'owur. K'ɛsɛp kətɔbok sɔ fɔr ya awɛŋc aŋa kiriŋ. K'oloku: «Nəwurɛnɛ su yeri.» 32 K'ambɛrɛ Isifu yeri taciŋa, awɛŋc aŋa taciŋa, kɔ aMisira ŋa ŋayi sɔ taciŋa. Bawo aMisira ŋaŋcwosɛ fɛ kəpaŋnɛ dap da yeri kɔ aHebəru. 33 Kɔ awɛŋc a Isifu ŋandɛ fɔr yɔn kiriŋ. Kəyɛfɛ ka coco ca papa kəŋan haŋ wəfɛt kəŋan nwɛ o nwɛ kɔ dəkəndɛ dɔn. Kɔ ŋayɛfɛ kəlokɛnɛ kəciyanɛ nkɛ kəyi ŋa ntɛ Isifu osumpər ŋa mɔ. 34 Kɔ Isifu ɛmbɛrɛnɛ ŋa yeri yɔn nyɛ nkɔn eŋc-di mɔ. Mba pɛbɛrɛnɛ mpɛ ɛnasɔŋ Beŋyamin mɔ pɛnala kəcamət, pɛtas pa akɔ. Kɔ ŋamun haŋ kɔ pəntəŋnɛ ŋa kɔ nkɔn Isifu.