1 Kɔ Yakuba ene a malɔ* bəle = f. «blé» mɛgbɛn mmɛ aŋcɔ pəsɔtɔ farin mɔ beyi Misira. Kɔ Yakuba oloku awut ɔn: «Ta ake tɔ nəndeyinɛ nnɔ nəc-mɔmənɛnɛ fɔr disrɛ-ɛ?» 2 Kɔ Yakuba oloku: «Ine a malɔ meyi Misira. Nətor nəkɔ nəwayɛ su dəndo malɔ, ta padefinɛ dor.» 3 Kɔ awɛŋc a Isifu wəco ŋantor kəkɔ-way malɔ Misira. 4 Mba Yakuba ɛnasak fɛ Beŋyamin wəkɔ ɛnapaŋnɛ kɛrɛ kɔ Isifu mɔ pəcɛpsɛ awɛŋc aŋa darəŋ, bawo Yakuba ɛnaloku: «Beŋyamin ɔfɔkɔ ta tes tɛlɛc tɔlɔma tɔkɔsɔtɔ kɔ.» 5 Kɔ awut a Yakuba ŋaŋkɔ Misira kəkɔ-way malɔ pəmɔ tɔkɔ afum alarəm ŋaŋckɔ Misira dəkəway malɔ mɔ, bawo dor dɛnayi atɔf ŋa Kanahan fəp.

6 Tɛm tatɔkɔ Isifu pəyɔnɛ wəbɛ atɔf ŋa Misira. Nkɔn ɛŋcwayər afum a Misira fəp malɔ. Kɔ awɛŋc a Isifu ŋander ŋatontnɛnɛ Isifu fɔr yɔn kiriŋ, ŋacəp mobu dəntɔf. 7 Kɔ Isifu ɛnəŋk awɛŋc aŋa. K'ɛnɛpəl ŋa. Mba owurər fɛ ŋa kəcərɛnɛ. K'olok-lokərɛ ŋa dim deyeŋki, k'eyif ŋa: «Deke nəyɛfɛ-ɛ?» Kɔ awɛŋc aŋa ŋaloku kɔ: «Atɔf ŋa Kanahan ŋɔ səyɛfɛ, kɔ sənder kəway nnɔ yeri.» 8 Kɔ Isifu ɛnɛpəl awɛŋc aŋa. Mba awɛŋc aŋa ŋananɛpəl fɛ kɔ. 9 Kɔ Isifu ɛŋcɛm-cɛmnɛ mere mɔkɔ ɛnawɛrəp te taŋan mɔ. K'oloku ŋa: «Atɛn mes ŋɔ nəyɔnɛ! Mes ma atɔf ŋaŋɛ mɔ nənder kətɛn, nəkɔ nəloku mi aka atɔf ŋonu.» 10 Kɔ ŋaloku Isifu: «Ala, wəbɛ, dəkəway yeri sənder bafɔ atɛn mes ŋɔ acar am ŋayɔnɛ. 11 Dɛwɛŋca dɔ səyɔ fəp fosu, wərkun wəkin okom su. Səsɔkɛnɛ bəkəc! Səclok' əm a dəkətɛn yeri gbəcərəm sənder.» 12 Kɔ Isifu oloku ŋa: «Kəbupərɛ ti kɔ nəndɛ, mɛtambər ma atɔf ŋaŋɛ mɔ nənder kətɛn nəkɔloku mi ndoronu.» 13 Kɔ awɛŋc aŋa ŋaloku Isifu: «Wəco kɔ mɛrəŋ wɔ sənayi kas kosu kəkom nde Kanahan. Mba wəkɔ ɛfɛtɛ su dacɔ mɔ eyi mɔkɔ dɛkɛr kɔ papa kosu, kɔ wəkin ɛnafi.» 14 Kɔ Isifu oloku ŋa: «Tɔkɔ iloku nu mɔ, ti tɔyɔnɛ kaŋce: Atɛn mes ŋɔ nəyɔnɛ! 15 Awa, yɛbəc nyɛ y' indecəmbər nu: Indɛrəmɛ nu tewe ta Firawona, nəfɔwur nnɔ ta wəfɛt konu wələpəs wəkakɔ nəsak dɛkɛr mɔ ender-ɛ. 16 Nəsom wɛŋc konu wəkin pəkɔkɛrɛ wɛŋc konu wəkakɔ nəsak dɛkɛr mɔ. Kɔ nəna aŋɛ endesak nnɔ mɔ, dəbili andebɛr nu. Andemɔmən moloku monu, pacərɛ kɔ pəyɔnɛ kaŋce kɔ nəloku-ɛ. Kɔ pəyɔnɛ fɛ ti-ɛ, indɛrəmɛ nu tewe ta Firawona atɛn mes ŋɔ nəyɔnɛ!»

17 Kɔ Isifu ɛmbɛr ŋa dəbili mata maas. 18 Tataka ta maas, kɔ Isifu oloku ŋa: «Nəyɔ ntɛ, tɔsɔŋɛ nu kəyi doru. Iŋnesɛ Kanu! 19 Kɔ pəyɔnɛ fɔ nəsɔkɛnɛ bəkəc-ɛ, nəsak wɛŋc konu wəkin dəbili. Nəna aləpəs aŋɛ nəkenɛ afum anu yeri kərɛs bawo dor deyi. 20 Nəkɛrɛn' em wəfɛt konu wəkɔ nəsak dəndo mɔ ntɛ tɔŋsɔŋɛ pamɔmən moloku monu kɔ pəyɔnɛ fɔ kaŋce kɔ-ɛ, ta nədefi.» 21 Ti tɔ ŋanayɔ, ŋaclokɛnɛ: «Ɛy. Sən' ɛnayɔ ti wɛŋc kosu. Bawo anəŋk ayɛk ŋɔn, tɛm ntɛ oŋcloku su a paŋaŋnɛnɛ kɔ mɔ, ta aŋcəŋkəlɛ kɔ-ɛ. Ti tɔ ayɛk ŋɔn ŋeyi kəsutɛ su tantɛ.» 22 Kɔ Ruben ɛlɛk moloku, k'oloku ŋa: «Inaloku fɛ nu ti ba, fɔ ta nəyɔ wan nwɛ pəlɛc? Mba nənacəŋkəl f' em. Ndɛkəl oŋ awer su mecir mɔn.» 23 Awɛŋc a Isifu ŋanacərɛ fɛ a Isifu eŋne kusu kəŋan bawo wəcepərɛnɛ moloku ɛnayi kɔ dacɔ kɔ awɛŋc aŋa. 24 Kɔ Isifu ɔmbɔlɛ awɛŋc aŋa, k'ɔŋkɔ pəbok.

Ntɛ elip mɔ, k'oluksərnɛ kədelok-lokər ŋa. K'ɛlɛk Simɔŋ awɛŋc aŋa dacɔ, k'ɛmbɛr kɔ dəbili fɔr ya awɛŋc aŋa kiriŋ. 25 Kɔ Isifu osom a palasɛ ŋa yeri dəlɔba, paluksɛ nwɛ o nwɛ pəsam pɔn nde alɔba ŋɔn, pasarəsər ŋa yeri yayɔkɔ. Ti tɔ anayɔnɛ ŋa. 26 Kɔ awɛŋc ɔn ŋasarəsər sɔfale səŋan yeri. Kɔ ŋasumpər dɔpɔ kɔ ŋaŋkɔ. 27 Kɔ wɛŋc ka Isifu wəkin ende pəsikəli alɔba ŋɔn nde dəkarwaŋse pəfaŋ kəwurɛ sɔfale sɔn yika yɔsɔm, kɔ wəkakɔ ɛnəŋk pəsam pɔn alɔba ŋɔn disrɛ. 28 K'oloku awɛŋc aŋa: «Aluks' em pəsam pem. Ipɛmpɛ nnɔ alɔba ŋem.» Kɔ mera yeyi ŋa yama-yama kəcərɛ fɔ a ŋaŋkɔ dəkəway paluksɛ ŋa sɔ pəsam paŋan. Kɔ ŋayifnɛ: «Cəke cɔ Kanu kəyɔ su tantɛ-ɛ?» 29 Kɔ ŋambɛrɛ ndena papa kəŋan Yakuba nde atɔf ŋa Kanahan. Kɔ ŋalɔmər kas kəŋan mes mɔkɔ mɛnasɔtɔ ŋa mɔ fəp. 30 Kɔ ŋaloku kas kəŋan: «Fum wəkɔ ɔyɔnɛ wəbɛ wəka Misira mɔ, olok-lokərɛ su dim deyeŋki, k'endeŋɛ su kəyɔnɛ atɛn mes ma Misira mmɛ səndeloku aka nnɔ mɔ. 31 Kɔ səloku kɔ fɔ səsɔkɛnɛ bəkəc, bafɔ atɛn mes ŋɔ səyɔnɛ. 32 Kɔ Səloku kɔ sɔ fɔ wəco kɔ mɛrəŋ wɔ sənayi kas kosu kəkom, mba wəfɛt kosu eyi dɛkɛr, kɔ wəkin ɛnafi su dacɔ. 33 Kɔ wəbɛ wəka Misira oloku su: ‹Ntɛ tɔ nəndeyɔ a itam kəcərɛ a nəsɔkɛnɛ bəkəc. Nəsak wɛŋc konu wəkin nnɔ, nəkenɛ afum anu yeri kərɛsna bawo dor deyi. 34 Nəkɔ, nəkɛr' em wəfɛt konu. Tɛm tatɔkɔ, indecərɛ a bafɔ atɛn mes ŋɔ nəyɔnɛ, kɔ nəsɔkɛnɛ bəkəc. Indeluksɛ nu wɛŋc konu, tɛm tatɔkɔ nəcəmɛ sɔ kəcaməs konu darəŋ dɔtɔf.›»

35 Ntɛ ŋambɛrɛ ndaraŋan akɔ ŋayuk malɔ mɔkɔ ŋanakɛrɛ mɔ, kɔ fəp faŋan ŋanəŋkəs-nəŋkəs pəsam paŋan nde lɔba yaŋan disrɛ. Ŋa kɔ kas kəŋan ntɛ ŋanəŋkəs pəsam nde lɔba yaŋan disrɛ mɔ, kɔ kənesɛ kənder ŋa. 36 Kɔ kas kəŋan Yakuba oloku ŋa: «Awut em ŋɔ nəfaŋ kəbaŋsər im! Isifu eyi fɛ sɔ doru, Simɔŋ eyi fɛ sɔ doru, kɔ nəfaŋ sɔ kəlɛkər im Beŋyamin-ɛ! In' ɔ mamɔkɔ fəp mendetɔrəs.» 37 Kɔ Ruben oloku papa kɔn: «Məde məyɔ padif awut em mɛrəŋ k'intɔkɛr' am Bɛnsamɛŋ. Məbɛr im kɔ dəwaca, indekɛr' am kɔ.» 38 Kɔ Yakuba oloku: «Wan kem ɔfɔtor kɔ nəna, bawo wəbek' ɔn Isifu efi. Sona s' eyi oŋ. Kɔ tɛlɛc tɔsɔtɔ kɔ dɔpɔ-ɛ, cəke cɔ nəndeyɔ-ɛ, tɛm tatɔkɔ nəŋsɔŋ' em kətorɛ cəfon cem cəfer dabiya kɔ abəkəc ŋocuy nde afi ŋayi mɔ.»