1 Benu tub mbecy wagad lagy nap yu de coz ni Crisht, orzeꞌ “O” mnii der nu chuꞌy lat der. Cueꞌ zi go nu der yu riidz nu nac de coz nu rnii tooy. 2 Gun yuꞌ mbecy, rnii tooy nu gac gow mbecy la ziꞌl coz. Zeꞌ yuꞌ gaꞌ mbecy, yu nu wagad lagy nap, rnii tooy nu tub lo ziꞌl coz gac goy, ndeꞌ coz nu rbic ya mni ziꞌl. 3 Mbecy nu row la ziꞌl coz, walagy ñi nu güii naañ yu lo mbecy nu wagow. Zeꞌ de mbecy nu wagow, walagy ñi nu nii ziy ni de yu nu row, gun Ñgyoozh shet ic mi nu chuꞌ de yu zeꞌ lom. 4 ¿Cyu guc ru par nu niir nu yuꞌ falt ni moz ni reñaꞌ mbecy? Ndeꞌ cuen ni patro̱o̱ niy nu gniiy ti gruu nap moz niy o nu waruu nap yu. Nunu segur la gruu nap yu, gun Ñgyoozh cyiiñ mi nu locyuub mi dey nu gruu nap yu.

5 Na yuꞌ mbecy nu ricy zily zir dey ca na tub dzi gazeꞌ deꞌ zir dzi. Zeꞌ yuꞌ gaꞌ mbecy nu rnii too dey nu tub ziꞌl na dela dzi. Tub ga la mbecy rlagy ñi nu nap gad lagy yu mod nu ricy ub yu. 6 Mbecy nu ricy zily tub dzi, ni mod ricy yu par nu rca lagy yu lo Shuaan den. Yu nu row la ziꞌl coz, yu zeꞌ laabaꞌ nu rca lagy yu lom, gun rbic yu gras nim nu nac de coz nu row yu. Mbecy nu walagy gow de coz zeꞌ, ni ricy yu par nu rca lagy yu lo Ñgyoozh, nunu niꞌ rbic yu gras nim.

7 Gun sac ni tub la mbecy lat den nu cui mbañ yu nu nac de nu ndeꞌ, gun ndeꞌ coz nu rlagy ub ziꞌl dey. Nunu sac ni tub mbecy lat den nu gat yu nu nac de nu ndeꞌ, gun ndeꞌ coz nu rlagy laab ubaꞌ ziꞌl dey. 8 Benu cui mbañ den, orzeꞌ ndeꞌ par nu gyicy den coz nu rlagy Ñgyoozh. Nunu benu gat den, orzeꞌ gat na gun ndeꞌ coz nu rlagy mi. Orzeꞌ mas mbañ den o nu gat den, tees nac naa nim. 9 Gun Crisht gut mi. Orzeꞌ byabañ mi, gun orzeꞌ mi zeꞌ nac mi Shuaan de mbecy mbañ nunu nac mi Shuaan de mbecy nu bi gut.

10 Orzeꞌ a̱ꞌ nap benu nii der nu yuꞌ falt ni de bicy ru. Nunu niꞌ a̱ꞌ nap benu güii naañ der lo dey. Gun dela den rlagy ñi nu gyechaꞌn lo Ñgyoozh par nu gri beem ni den. 11 Gun riidz ni Ñgyoozh rniiñ: “Shuaan den nam, segur la ya̱ naca̱ biñ nu mbañ. Orzeꞌ dela mbecy zu tib dey lo̱, nunu dela mbecy gnii dey nu ya̱ naca̱ Ñgyoozh, nam”, rnii riidz nim. 12 Orzeꞌ dela den rlagy ñi nu zeed cuen na lo Ñgyoozh dela coz nu bicy na.

13 Ndeꞌ nu na rlagy ñi nu cueꞌ nii den nu yuꞌ falt ni losaꞌn, sinu rlagy ñi nu gzu fert den nu cueꞌ gyicy den ni tub la coz nu gyicy ñi nu gyaꞌ ich de bicy na, ni cueꞌ gyicy den ni tub la coz nu gyicy ñi nu gyicy de bicy na coz cyi. 14 Ya̱ rad lagya̱ nu sac la coz nu row mbecy nu nil nac ñii coz nu a̱ꞌ caacy. Bguugy nap la lardo̱o̱ nu caacy dela coz nu row mbecy, gun ya̱ nac du̱ Shuaan na Jesuuz. Tees benu tub mbecy rnii tooy nu a̱ꞌ caacy la coz, orzeꞌ par yu zeꞌ ziꞌl a̱ꞌ caacy ñi. 15 Orzeꞌ benu de ru shiꞌñ der baloor ni de bicy ru, orzeꞌ wagyicy der mod ni mbecy nu rca losaꞌ, gun niꞌ par de yu zeꞌ gut Crisht. Orzeꞌ cueꞌ zaan der nu gnuy nu nac de coz nu row der. 16 Orzeꞌ cueꞌ cuic der lugaar nu gzat zi mbecy de coz nu nap par de ru. 17 Gun asunt ni gyel gubier ni Ñgyoozh, ndeꞌ walab nu rzat ñi de coz nu dow den o coz nu doꞌn, sinu asunt ni gyel gubier nim, ndeꞌ nu rlagy ñi nu gyicy den coz nu laab ñi. Rlagy ñi nu nap chuꞌ den nu de losaꞌn. Rlagy ñi nu zu cyit lagy den nu nac Espiriit Yon ni Ñgyoozh. 18 Gun cyu ziꞌl mbecy nu ni mod ricy de coz gal nu rlagy Crisht, yu zeꞌ ricy yu mod nu yet lagy Ñgyoozh. Nunu ricy yu nu nap rnii de losaꞌy niy.

19 Orzeꞌ rlagy ñi nu dub laa tiem yub den mod nu nap chuꞌ dun losaꞌn, nunu rlagy ñi nu yub den mod nu gyafert zir dey nu nac de coz ni Crisht. 20 Cueꞌ gnu der de riiñ nu ricy Ñgyoozh lat losaꞌr nu nac coz nu row der, gun la ziꞌl coz nu gow mbecy caacy ñi. Orzeꞌ gac gow der, tees a̱ꞌ nap nu gow der ñii, benu gyicy ñi nu gyicy de losaꞌr coz cyi. 21 Mod nu rlagy ñi, ndeꞌ nu cueꞌ gow der beel, ni cueꞌ goꞌ der ñup ni urbyay, ni cueꞌ gyicy der ni tub la coz benu ndeꞌ gyicy ñi nu gnu bicy ru. (Cueꞌ zaan der nu gyicy cyi gan yu. Ni cueꞌ zaan der nu gyaꞌ ich yu nu nac coz nu gyicy der.) 22 Mas rad lagy der nu par lo Ñgyoozh gac gyicy der mod zeꞌ, tees cueꞌ nii der lo losaꞌr. ¡Gun dzi ni mbecy benu rad lagy yu nu sac falt niy nu nac coz nu ricy yu! 23 Tees benu tub mbecy wagad lagy yu ti nap uti a̱ꞌ nap nu gow yu tub coz, o nu goꞌy, orzeꞌ Ñgyoozh niim nu yuꞌ falt niy ornu goy ñi nunu ornu goꞌy ñi, gun wagad lagy yu ti gyicy yu coz nu wayet lagy Ñgyoozh. La ziꞌl coz nu gyicy den, benu rnii toon nu cyup ridz ndeꞌ coz nu walagy Ñgyoozh, orzeꞌ ndeꞌ cyi na.