1 Te dxe ne nuu Jesus lenxeydoo Dëdyuzh, kaneluu Ne xdiznzoon Dëdyuzh lo mén, wdxiin yra fxuz ne rnebééy lo yra fxuz yra men maxter ley no le yra men men ne rnebééy lo men-Israel. 2 Lex re men lo Ne:

―Guzëët gan txu wkyeen de ne rlaa de negwa. ¿Txu wnebééy lo de ne rlaa do?

3 Wke Ne re Ne lo men:

―Laake no ke noo ynabdiiz lo de yra de, per guke: 4 ¿txuzh wxaal Xwa ne wtxobnis Xwa mén, Dëdyuzh u noze mén?

5 Lex wzelo men rulsaa men diiz, re men:

―Belne gue be ne Dëdyuzh wxaal Xwa, naap yna zhaa: “¿Penak wlaleedxdet de Xwa cheguin?” 6 Belne gue be noze mén wxaal Xwa, sket yrandxee mengyëz be kon gye porke yrandxee men nan ne te profet nak Xwa.

7 Lex wke men re men ne nandet men gan txuzh wxaal Xwa ne rtxobnis Xwa mén. 8 Wke Ne re Ne lo men:

―Laake ni noo yzëëdet gan txuzh wkyeen noo ne rlaa noo neree.

9 Zhich guin wzelo Jesus wuu Ne zegnak te kwent lo yra mén guin, re Ne:

―Wuu te mgyeey ne wlabni blag ub, lex wbodiin meno lo tebëd mén ne rapkwent blag ub. Zhich guin wruu men nga, za men xchese. 10 Le chene wdxiin tyemp ne le ub wal gyët, wxaal xpexwaan blag ub guin te xmos men lo yra men ne rapkwento, zaxii xmos men ub ne ryal xpexwaan blag ub guin. Per lel wnëëz yra men ne rapkwent blag ub mos guin, wdee men xkwent men, wzanëz men men nonchee zenga. 11 Zhich guin wxaal xpexwaan blag ub ste xmos men; per zenga ke wdee men xkwent mos guin no wninyaan men lo men, wxaal men men nonchegue zenga. 12 Wxaalgue xpexwaan blag ub ste xmos men; per zenga ke wlaa yra mén guin, wdee men xkwent mos guin axtegue wsewee men men, lex wboo men men lo lyu guin.

13 ’Wyal wdebo, re xpexwaan blag ub: “¿Pezee ylaa noo? Mazdee yxaal xpee noo ne ryaan noo; pazer zaknzebnëz men lo mee.” 14 Per chene wii yra mén guin xpee men, wulsaa men diiz, re men: “Laa ménree nak ne gyanno blag ubree; yoo yket be men, chen gyanno bo laa be.” 15 Lex wboo yra mén guin mee guin lo lyu guin, wket men mee.

’Naaree naa, ¿pagox ylaa xpexwaan blag ub yra mén guin? 16 Yna noo lo de ne chiid men yket men yra mén guin, lex ydee men blag ub lo stebëd mén.

Chene won yra mén guin zenga, re men:

―¡Naleg Dëdyuzh gakdet zenga!

17 Per wii Jesus lo men, lex re Ne:

―¿Pagox rna ne re lo xgyiich Dëdyuzh cheguin? Nga re:

19 Wlaan yra maxter ley yra men fxuz ne rnebééy lo yra fxuz nguu men Jesus chegyiib orgueguin, porke wyenen men ne por laa por laandxee men wzëët Ne yra diiz guin, per wdxe men mén. 20 Lex wxaal men tebëd mén ne noze rkanlo wen, za men gwleedx, chen gan pe gue Ne chen tsël gan pezee ydekwent men Ne lo gobernador. 21 Por neguin re men lo Ne:

―Maxter, nan noo yra noo ne ryal ne rnii de no ne rneluu de no ne zadet lextoo de gan txu nak mén, sinke nli ne rneluu de ne ybán mén zegne rlaan Dëdyuzh. 22 Guna gan ¿pe wen gyizh noo zeg impwest lo rrey-Roma u wendeto?

23 Per kom wyenen Ne ne ngyidet ne rlebleedx men, lex re Ne lo men:

―¿Penak rye de gan pezee gyab noo lo xetramp de? 24 Guluu te med lo noo. ¿Txu lo wa no txu la wa ka lo we?

Wke men re men:

―Lo rrey-Roma we no le la rrey-Roma we.

25 Lex re Ne lo men:

―Guex gudee ne nak xen rrey lo rrey, le ne nak xen Dëdyuzh gudee lo Dëdyuzh.

26 No delo lo yrandxee diiz ne re Ne nes lo yrandxee mén, axtegue bet wzëldet gan pe nkanlo men chen nkagyii men Ne, lel rzee rzak men yra ne rke Ne. Noze chi wbiin men.

27 Wa tebëd men ne nak sadusew lo Jesus. Kom rlaleedxdet men ne sban mengut, por neguin re men lo Ne:

28 ―Maxter, lo ley ne wdee Dëdyuzh lo Moises zëëd ne belne guet te mén, per wapdet xewnaa men mëëd, bech men rap degne ytsëlnyano wnaa guin, chen gap men mëëd ne gak zegnak zhiin mén guin ne wet. 29 Tebtir wuu guedx mén, tese bech men yra men; lex wtsëlnya men ne nak mengoldee lo men yra men, per wet men; wuudet zhiin men. 30 Lex wtsëlnya men ne wrup yrup men xewnaa men guin. Laake wet ke men; wuudet ke zhiin men. 31 Lex wtsëlnya men ne wyon yrup men wnaa guin, zenga ke wzak men. Zenga wlaa men yra men axtegue ne wzaa men guedx, yra men wet; ni te men wuudet zhiin. 32 Wyal wdebo, wet ke no wnaa guin. 33 Orrenaa, chene yban mengut, ¿txu xewnaapee gak wnaa guin ne yrandxee guedx mén guin wtsëlnyano men?

34 Wke Ne re Ne lo men:

―Nee gyëzlyuree, rtsëlnya mgyeey, rtsëlnya wnaa. 35 Per le men ne yban no ne ryal gap ste gyelembán, che ytsëlnyadetre men, ni mgyeey ni wnaa, 36 porke guetetre men, sinke zegnak angel gak men no zhiin Dëdyuzh nak men por ne wban men. 37 Si laake Moises wkaa ne sban mengut, ledne wkaa Moises xkwent gyëtsbne ne kayeeky. Nga wkaa Moises ne XDëdyuzh Abraham nak Dëdyuzh, XDëdyuzh Isaac, XDëdyuzh Jacob. 38 Nakdet Dëdyuzh XDëdyuzh mengut, sinke le Dëdyuzh nak XDëdyuzh menmbán, porke por Dëdyuzh yrandxee mén mbán.

39 Lex re tebëd maxter ley lo Ne:

―Wen wnii de, Maxter.

40 Wyezhdetre men nnabdiizre men lo Ne.

41 Lex wnabdiiz Jesus lo men yra men, re Ne:

―¿Penak re mén ne xpee David nak Crist? 42 Si laake David wkaa lo liber Salmos ledne re:

45 Yrandxee mén ndxin ron chene re Jesus lo xpén Ne:

46 ―Gugap maxter ley kwent, porke rtseleedx men gak men lërngool, no rtseleedx men ne kon gyelenzebnëz gabtyuzh mén men nes lgyeey, no rye men lo yagzhil ne rzob mennon lenydoo chen sob men; zenga ke rlaa men chene ra men gwdu, 47 no rgyitxee men xyuu wnabyud, per por ne gyendeto, kesentyent xche rnab men lo Dëdyuzh, per laa men yra men nak ne ntozdee sakzi.