1 Dxejc, che dirunu nutijp lajznu, biennu xhigab bianxtebä guedx Atenas. 2 Dxejc baxhaḻä Timoteu, bejtznu nez loj Jesucrist, te biädhuiini la'tu, sa'csi laani najcni te xpeṉ Dios ni runnäj nuurnu dzuun, rniini xtidx Jesucrist, te guscuecdxini lajztu, guzudzu'tzni xcäḻrililajztu. 3 Te nicla tejtu di guidxejb che jiääd reyäḻhuin sa'csi la'tu anajntu agule Dios nuurnu ni'c sidejdnu trabajw. 4 Cheni yusijcnu lojtu, rnixgaanu lojtu sidejdnu trabajw; niluxh si'cni agusojb diidxga ṉaj. 5 Ni'cni diruna nutiplazä, baxhaḻä chu jiädnä diidx xho najc xcäḻrililajztu, sa'csi cadxebä andi abasguee beṉdxab la'tu, luxh xlia'si biennu dzuun guyu'nu lojtu.

6 N̲aj agubi' Timoteu, biädhuiini la'tu. Biadnäni ganax didxlii xho sanuu rililajztu xtidx Jesucrist, xho rinälajztuni, näjza sanuutis rnalajztu nuurnu, rlajzzatu fiitu loonu, sigajcza nuurnu rlajznu fiinu lojtu. 7 Ni'cni, betznu, masä riäädx xhixtennu, masä rdeednu trabajw, rbalajznu sa'csi la'tu sanuutis rililajztu xtidx Dios. 8 N̲aj laaca rdxunnu sa'csi racbeenu sudzu'tztu nez loj xtidx Dad Jesucrist. 9 Xhocha gac guideednu xquixtios lo Dios xcuent guiraatu näj xcuent yäḻrbalajz ni yu' lastoonu xcuent la'tu nez lo Dios. 10 Dxej-yääl rniabnu lo Dios gusaanni jiophuiinu la'tu te gusa'nu guiraa rediidx ni cayäädx gacbeetu xcuent xcäḻrlilajztu.

11 Rniabnu lo Xtadnu Dios, näjza lo Dad Jesucrist, gacnäjreni nuurnu te gac jiophuiinu la'tu. 12 Rniabzanu lo Dad Jesucrist, gunni gustiobruni lastootu te ga'prutu yäḻrinälajz loj resa'tu näjza loj guiraa rebejṉ, si'cni rinälajznu la'tu, 13 te gunni sudzu'tz lastootu, na'c ga'ptu dojḻ nez lo Xtadnu Dios, che jiääd Jesucrist näjza guiraa rexpejṉni xhaguibaali.