1 Liꞌá Pablo, enu ucañi Diose para nú aca apóstolꞌ Jesucristo. Nu cuna saꞌahua Sóstenes enu leꞌca nzeli arquiꞌ Jesucristo nzunua caꞌa, 2 nu liꞌá rquieꞌa cartaquieꞌ luhua bee bene enu nzeli arquiꞌ Stichiaꞌ Diose eyeche llene Corinto, liꞌihua enu lecaꞌ xiná lu Diose equie cuendaꞌ Jesucristo, nu ucañila Diose liꞌihua para nú necahua bee beneꞌnu cuna ye beelá bee bene enza stucu luhuare enu leꞌca nzelila arquiꞌ Jesucristo, liꞌinu enu rnibiyaꞌ luaꞌahua nu lubeella. 3 Diose Paꞌahua cuna Jesucristo enu rnibiyaꞌ luaꞌahua riꞌi nú cha nzeꞌca lu cuendaꞌhua nu ñia tsu arquiaꞌahua.

4 Liꞌá la zañia rdetea cheꞌtsa lu Diose equie cuendaꞌhua, scua tucu nú uriꞌinu elietsa luhua, xne nzeli arquiꞌhua Jesucristo. 5 Xne equie cuendaꞌ liꞌinu chiquiꞌ uriꞌi Diose elietsa luhua, nu lia uliquiꞌnu ye clasiaꞌ elliebacuꞌ luhua para nú riꞌihua beyaꞌ stichiaꞌnu, nu acahua nihuane lubee bene. 6 Scua achee neca nú neli neca nú ubeneꞌlaꞌhua equie cuendaꞌ Jesucristo desde nú uchili arquiꞌhua liꞌinu. 7 Nu la riꞌi falta nú rriꞌi Diose elietsa luhua diqui nú nucuaꞌaquiehua bichia nú riña zeca Jesucristo enu rnibiyaꞌ luaꞌahua. 8 Nu Diose riꞌi elietsa luhua para nú tsutaꞌ arquiꞌhua lunú nzeli arquiꞌhua liꞌinu diqui tiembu para nú la luꞌculihua dula bichia nú riña zeca Jesucristo. 9 Xne neli saꞌalu Diose stichaꞌnu, nu liꞌinu necanu enu ucañi liꞌihua para nú aca tucu necatsehua cuna Jesucristo enu rnibiyaꞌ luaꞌahua.

10 Bee saꞌa enu nzeli arquiaꞌahua Jesucristo, equie cuendaꞌnu zequiea luhua nú aca tucu necatsehua nu la leꞌesaꞌhua. Nu uhuañi nzeꞌcahua nu tucutsia elliebacuꞌ uriꞌihua. 11 Scua rnia luhua bee saꞌa enu nzeli arquiaꞌahua Jesucristo, xne ungabiyalá nú nuꞌ xuu letahua, scua udixiuleꞌe bee familiaꞌ Cloé lua. 12 Liꞌibeella rnibeella nú nuꞌhua enu rni: “Liꞌá neca beneꞌ Pablo”; leꞌca nuꞌ bee enu rni: “Liꞌá neca beneꞌ Apolos”; nu leꞌca nuꞌ beelá bee enu rni: “Liꞌá neca beneꞌ Pedro”; nu leꞌca nuꞌ bee enu rni: “Liꞌá neca beneꞌ Jesucristo.” 13 Pero liꞌá nia luhua nú tucutsia neca Jesucristo xne liꞌá lá atia lu cruse equie cuendaꞌ stulahua, nu leꞌca lá rinzahua equie cuendaꞌ liꞌá. 14 Cheꞌtsalá Diose nú niꞌtucuhua lá rinzaa urinzatsia Crispo nu Gayo. 15 Scua leca modo nihua nú urinzahua equie cuendaꞌ liꞌá. 16 Nu leꞌca urinzaa bee familiaꞌ Estéfanas, pero la llucuꞌ arquia tunu tilá urinzaa. 17 Xne lá xeꞌla Jesucristo liꞌá para nú rinzaa bee bene sino que uxeꞌlanu liꞌá para nú ixiuleꞌa stichiaꞌnu lubee bene para nú nuꞌ modo tsilaꞌa bee bene. Nu la nia lubee bene bee bedichiaꞌ nú zecalullieꞌ beella lua, luguare nú chenu cuenda beella xinu unguti Jesucristo lu cruse.

18 Ye nú rniaꞌahua equie cuendaꞌ xiquie nú unguti Jesucristo lu cruse lecaxi sibiꞌi para bee bene enu nenitilula lu Diose pero para liaꞌahua enu utsilaꞌala Diose, chiquiꞌ huaxi seca nú unguti Jesucristo lu cruse xne scua rriaꞌahua beyaꞌ nú chiquiꞌ reca Diose. 19 Nu lu ichiꞌ Stichiaꞌ Diose rni:

20 Nu nee ¿ca nucuaꞌa bee bene enu rni nu chiquiꞌ reca elliebacuꞌ? ¿Nu ca nucuaꞌa bee ulaxcuela enu reca ley? Nu leꞌca ca nucuaꞌa bee bene enu rni nú reca ye beenú nuꞌ lu iliulabe quieꞌ, nu para Diose lecaxi zibiꞌ lunú reca elliebacuꞌ bee bene. 21 Nu equie nú reca elliebacuꞌ Diose nediyaꞌ nzeꞌcaꞌnu nú lá chulu bee bene illiulabe liꞌinu, lunú recatsia elliebacuꞌ beei, enzeꞌe uriꞌinu elliebacuꞌ nú tsilaꞌanu bee bene equie cuendaꞌ stichiaꞌnu nú seteꞌahua bee bene. Nu bee bene enu tsilaꞌa neca bee enu nzeli arquiꞌ liꞌinu, añinzuca nú neca xi neca nú lecaxi zibiꞌ nú seteꞌru bee bene. 22 Bee bene Israel niarquiꞌ beella lañiꞌbeella bee milagro nú rriꞌiru para nú chili arquiꞌbeella, nu bee bene enu laca bee bene Israel niarquiꞌ beella nú aca beella beenú máse neriñaꞌ neca, para nú chili arquiꞌ beella. 23 Pero liꞌiru lunú seteꞌru bee bene necane nú xinu unguti Jesucristo lu cruse, nu lá niarquiꞌ bee bene Israel nú chili arquiꞌbeella liꞌinu, xne para liꞌibeella leca modo ati Jesucristo, nu para bee bene enu laca bee bene Israel lecaxi sibiꞌ nú seteꞌru bee bene. 24 Pero para bee bene enu nzeli arquiꞌ Diose, sia bee bene enu laca bee bene Israel, nu sia bee bene enu neca bee bene Israel, equie cuendaꞌ Jesucristo achee nú rluꞌcu Diose poder nú recanu. 25 Xne hasta beenú seca bee bene nú la zibiꞌ uriꞌi Diose, necane lunú másescaꞌlá sibiꞌ luquelá nú reca bee bene iliulabe. Nu hasta lunú reca Diose rriꞌi nú máse lleꞌna neca, máse secae luquelá nú reca bee bene iliulabe.

26 Uriꞌihua beyaꞌ bee saꞌa enu nzeli arquiaꞌahua Jesucristo, nú chiuculiꞌ bee bene enu nzeli arquiꞌ liꞌinu bee enu seca bee bene nú chiquiꞌ reca lu iliulabe quieꞌ, nu chiuculiꞌ enu nzeli arquiꞌ liꞌinu enu rnibiyaꞌ lu iliulabe quieꞌ, nu leꞌca chiuculiꞌ bee enu nzeli arquiꞌ liꞌinu nzeꞌta leta bee familiaꞌ bee bene enu neca equie lu iliulabe quieꞌ. 27 Pero Diose ucañi bee bene enu laca, para nú chiuꞌu elu netuꞌ bee bene enu chiquiꞌ reca, nu ucañinu bee enu lleꞌnatsia rnibiyaꞌ lu iliulabe quieꞌ para nú chiuꞌu elu netuꞌ bee enu chiquiꞌ rnibiyaꞌ. 28 Diose ucañi bee bene enu seca bee bene iliulabe nú lecaxi sibiꞌ, bee bene enu seca bee bene iliulabe nú lecaxi reca. Bee bene enu lecati neca lu iliulabe quieꞌ, para nú nitilu lunú rnibiyaꞌ bee bene enu nuꞌ ti neca lu iliulabe quieꞌ. 29 Nu scua necane para nú lecati aca nelliñia lu Diose.

30 Nu nee equie cuendaꞌ Diose neca tucu necatselahua cuna Jesucristo, nu equie cuendaꞌnu ungutiaꞌahua elliebacuꞌ nú reca nzeꞌta lu Diose. Nu equie cuendaꞌnu necaꞌahua xi neca bene enu la luꞌcuaꞌ dula nu lecaꞌ xi naꞌahua lunu, nu liꞌinu udixiulanu equie cuendaꞌ stulaꞌahua. 31 Scua necane para nú yalu tucu nú nequie lu ichiꞌ Stichiaꞌ Diose elu rni: “Tunu nuꞌ bene enu niarquiꞌ aca nelliñia, máse neca nzeꞌca nú aca nelliñialla equie cuendaꞌ Jesucristo.”