1 No or nzhaded Jesús tu plo, une Me tu miyi' ngolnu nikal-lo, 2 orze' mina'bdi'zh rë men che'n Me lo Me, nzhab bixa':

―Maestr, ¿chon dizde ngol miyi' ba' nikal-lo xa'? ¿Chi por dol che'n xuz xa'i o por che'n xna' xa'i; o por mis xtol xa'i?

3 Orze' nzhab Jesús:

―Gat lë't por xtol xa'i, no ni gat lë' por che'n xuz xa'i, no ni gat lë' por che'n xna' xa'i; lë'i nak par ne men, yalnazhon che'n Dios por xa' re'. 4 Dub ñani zhë, naki'n le' be zhi'n nazhon che'n Dios, Me mixë'l da, porke or nzhala yë'l, yentra' cho gak le' zhi'n; 5 dub nzon yizhyuo re', lë'da nak Ki kwa'n nizini lo rë men yizhyuo.

6 Or milox midi'zh Jesús kure', michuk Me lo yuo, no kun nzhuk re' michao' Me che'p ben, orze' mitsa' Mei zalo miyi' re', 7 orze' nzhab Me:

―Wazët lol kun nits le'n tank kwa'n lë Siloé (widi'zh kwa'n gab: “Mixë'l xa'”).

No ze' ngwazët xa' nikal-lo re' lo xa', no or miëk xa' plo nzo Jesús, lë' lo xa' ñani la. 8 No rë xa' nzho gax kun lë' xa', no rë xa' nilibe' xa' nina'b xa' gon, nzhab rë men re' lo wech bixa':

―¿Chi gat lë't miyi' re' xa' nizob nina'b gon ze'?

9 Nzho xa' nzhab:

—Lë' xa'i.

No más bixa' nzhab:

—Gat lë't xa'i, per se'ta' nilu' xa'.

Per yub miyi' re' nzhab:

—Na ka xa' ze'.

10 Orze' minabdi'zh rë men ze' lo miyi' re':

―¿Xmod ska ngwani lol ga'?

11 Mikab miyi' ze', nzhab xa':

―Lë' xa' lë Jesús ze', michao' che'p ben no mitsa' xa'i zalon, orze' ne xa': “Wazët lol kun nits le'n tank kwa'n lë Siloé.” No ngwan ze', mizeta lon, lë'chi tuli ngwani lon.

12 Orze' nzhab rë xa' re':

―¿Ma xa' ze' nal?

Per nzhab xa' ngwani lo re':

―Naneta da ma xa'.

13 Orze' mbi'y bixa' miyi' xa' ngwani lo ze' lo rë men fariseo, 14 no zhë kwa'n mitsa' Jesús ben lo miyi' kwa'n nikal-lo ze', ngoke tu zhë kwa'n nile' rë men Israel diskans. 15 Orze' minabdi'zh rë men fariseo ze' lo miyi' xa' ngwani lo re': “Xmod ngok ngwani lol”, nzhab bixa'. Orze' nzhab miyi' re':

―Mitsa' Jesús ben zalon, orze' mizëtai, no nal nzhak niwi'n.

16 No nzhab pla men fariseo ze':

―Xa' mile' kure', gat lë't men che'n Dios xa', porke gat nzhont xa' nzho zhë kwa'n nile' be diskans.

Per más bixa' nzhab:

―No chi lë' xa' ba' nzë'b xki lo Dios, orze' nagakt le' xa' tu rë kwa'n nazhon ba'.

Kuze' ngok chop mod mile' rë men ze' xigab. 17 Kuze' xtu wëlt mina'bdi'zh bixa' lo miyi' ngwani lo re':

―Nal lu, por ngwani lol, ¿kwan nel por xa' re'?

Nkab miyi' re':

―Xa' re' nak tu xa' nidi'zh por Dios.

18 Kuze' rë men Israel ze' nangayilat bixa', chi walika mikal-lo xa' re' por niwi' xa' nal, haxta ngurezh bixa' xuz xa' re' no xna' xa', 19 no mina'bdi'zh rë men fariseo ze', nzhab bixa':

―¿Chi xga'n go miyi' re', xa' nidi'zh men, ngolnu nikal-lo? ¿Mbaino xmod ngok niwi' xa' nal?

20 Orze' nzhab rop xa' nak xga'ne ze':

―Walika xga'n no xa' re', no nane no, ngolnu xa' kure', 21 per nanet no xmod ngok miwi' xa', no ni nane no cho mile' miwi' xa'. Una'bdi'zh go lo miyi', lë' xa' plo la, yub xa' gak ne lo go, cho mile' ngwani lo miyi'.

22 Sa' midi'zh rë xa' nak xga'ne ze', porke nizheb bixa', lë' rë xa' nile' mandad xid rë men Israel mia'n la di'zh, lë' bixa' kutin rë men le'n yo' plo nitse'd bixa' widi'zh che'n Dios, chi cho gon bixa' di'zh, lë' Jesús nak Krist. 23 Kuze'la, se' nzhab rop xa' nak xga'ne ze': “Bina'bdi'zh go lo mbe, porke lë' mbe plo la.” 24 Orze' ngurezh rë xa' fariseo ze' miyi' kwa'n ngok nikal-lo ze' xtu wëlt par nzhab bixa':

―Bine kwa'n wali lo no, no lo Dios, porke no nane, lë' miyi' ba' nzë'b xki la lo Dios por gat nzhon xa' nzho zhë ro.

25 Orze' nzhab xa' ngwani lo ze':

―Naneta mblë go, chi wali nzë'b xki xa' lo Dios o gat walite; nab tsa kwa'n nanen, lë'da ngol gat ñanit lon, no nal niwi'n.

26 Per xtu wëlt minabdi'zh bixa', nzhab bixa':

―¿Kwan ka mile' xa' kun lu? ¿Xmod mile' xa' par ngwani lol?

27 Orze' nzhab xa' ngwani lo ze':

―Lë'da ni lai lo go, per gat ñilat goi. ¿Chon nzhakla go nine xtu wëlt?, o, ¿kwan nu go nzhakla, gak go men che'n xa'?

28 Orze' gat lë't mikab bixa' lo miyi' re', nzhab bixa':

―¡Lu nak xpen miyi' ba', per no nak men che'n Muisés!, 29 porke no nane ka, Dios midi'zh lo Muisés, per xa' re', ¡ni nane no plo nzë xa'!

30 Orze' nzhab miyi' re':

―¿Kwan kure' nalx? ¡Nanet go plo nzë xa' re', per mile' xa' ngwani lon! 31 Mbai rë be nane ka, Dios gat nzhont kwa'n nidi'zh men kwa'n nile' kwa'n gat lë'; nab tsa nile' Dios kwa'n nina'b men xa' nzhon ro' Dios. 32 Lalta' gat gon men, yo tu men le' yani lo xtu men nikal-lo dizde or ngol. 33 No chi gat lë' Dios mixë'l miyi' re', orze' nagakt le' xa' ni tu rë zhi'n nazhon re'.

34 Orze' nzhab bixa' lo miyi' re':

―¡Lu, por nzë'b xkil lo Dios, kuze' dizde ngolal nikal-lol! No nal, ¿ti lu nzhakla tse'dal no che'n Dios?

Kuze' ngulo'tin bixa' miyi' re' le'n yo' plo nitse'd bixa' widi'zh che'n Dios.

35 No or mbin Jesús, ngulo'tin bixa' miyi' xa' ngwani lo ze', le'n yo' plo nitse'd bixa' widi'zh che'n Dios, no or ngwazhë'l Jesús miyi' xa' ngwani lo re', orze' mina'bdi'zh Jesús lo xa':

―¿Chi ñilal Xga'n Dios, xa' nu nak tu men yizhyuo?

36 Orze' nzhab miyi' re':

―Lë' go, bine go lon, cho xa' ze' par yilan xa'.

37 Nkab Jesús:

―Niwi'l lo xa' ze' nal; kun lë' xa' kidi'zhal; na xa' ze'.

38 Lë'chi nguzuxib miyi' re' lo Jesús, nzhab xa':

―Lë' go, na ñila go.

39 Orze' nzhab Jesús:

―Na nzhal yizhyuo re' par kobe'n xmod nak men, nes par rë xa' nikal-lo, lë' bixa' yani lo; no rë xa' zak ñani lo; lë' bixa' ya'n nela men nikal-lo ga'.

40 No pla rë men fariseo xa' nzo kun Jesús ze', or mbin bixa' widi'zh re', orze' nzhab bixa' lo Jesús:

―¿Kwan gabal, nikal-lo no orze'? Per gat nikalt lo no.

41 Orze' nzhab Jesús lo bixa':

―Chi zi go, nak go nela tu men nikal-lo ga', nagapt go dol lo Dios orze', porke lë' Ki che'n Dios zini lo go; per por zak go ñani lo go nal, kuze' net go zubi go lo Ki che'n Dios, no se'gaka ña'n go lo kwa'n nzë'b xki go lo Dios.