44
Israel amɨn Piŋkop da paŋpulugosak do bɨsit iyɨwit
Kap on do “Maskil” yaŋ yoŋ. Uŋun Kora amɨn kabɨ dakon. Kap on kap yoŋ dakon kɨla amɨn do mandabi.
1 Piŋkop, babɨknin da kalɨp egɨpgwit bɨsapmon pi tapmɨmɨ toŋ agɨl uŋun dakon geni niyɨwit.
Nin mɨrak yopmaŋek gen uŋun kɨlɨ nandagɨmaŋ.
2 Gaga da tapmɨmon da amɨn ŋwakŋwarɨ mɨktɨmnikon egɨpgwit uŋun yolbɨ kɨwit.
Aŋek uŋun mɨktɨm babɨknin do yomɨŋaki uŋudon tebai egɨpgwit.
Gak da Amɨn Ŋwakŋwarɨ Kabɨ paŋupbal agɨl, mani babɨknin paŋpulugaŋaki tagɨsi egek madepsi ɨreŋ tawit.
3 Babɨknin emat agak sɨbakon da mɨktɨm uŋun dɨma abɨdawit.
Iyɨ dakon tapmɨmon da emaron dɨma teban tawit.
Gak da but dasi galak taŋ yomgul do uŋun gat egek teŋteŋɨ yomgul.
Gak da tapmɨmon gɨn emaron teban tawit.
4 Gak Kɨla Amɨn Madepno ae Piŋkopno.
Gak da yaŋaki Jekop dakon amɨn kabɨ da emaron teban toŋ.
5 Gak da tapmɨmon gɨn uwalnin yolno kwaŋ.
Gak da manon da uwalnin bamaŋ mɨsɨŋɨkgamaŋ.
6 Obip da aŋpulugaŋban emaron teban tokeŋ yaŋ dɨma nandɨsat.
Ae emat agak sɨbano da nak aŋpulugaŋban dɨma teban tokeŋ.
7 Gak dagɨn paŋpulugaŋaki uwal da nin dɨma pabɨŋ nipgwit.
Uŋun da nin do dɨma galak taŋ nimaŋ, mani gak da uŋun gat emat wamaŋek paŋmayak agɨl.
8 Piŋkop, nin gɨldat kɨnda kaloŋ gak do man madep gamamaŋ.
Bɨsap dagok dagogɨ mɨni mango aŋkɨsineŋ.
9 Mani gak manji kɨlɨ nimgul, aŋek pabɨŋ nipmaŋek emat amɨnin gat kɨsi saŋbeŋek emaron dɨma kwaŋ.
10 Yaŋ aŋaki uwal da paŋsopba pasal kɨŋapno yo kabɨnin kɨlɨ tɨmɨkgwit.
11 Gak da yum nindaŋaki nin sipsip si dapba kɨmorɨ yombem da ekwamaŋ.
Aŋek gak da mɨktɨmninon baŋ nolbɨ dukwan dukwan kɨŋ Amɨn Ŋwakŋwarɨ Kabɨ da binapmon ekwamaŋ.
12 Gak da yum pɨndagaki mɨŋat amɨn kabɨgo Amɨn Ŋwakŋwarɨ Kabɨ dakon oman monjɨ dagawit.
Yumaŋ naŋek tomni pɨŋbisi gamgwit, moneŋni madepsi dɨma tɨmɨkgɨl.
13 Gak da ninon yaŋ aŋaki, amɨn nin da kapmatjok ekwaŋ uŋun da yaŋsul aŋ nimaŋ.
Mɨktɨm morap nin paŋgwasɨŋek taŋ aŋaŋ kwaŋ uŋun da yaŋsul madepsi aŋ nimɨŋek gen mayagɨsi yaŋ nimaŋ.
14 Gak da amɨn kabɨ morap mɨktɨmɨ mɨktɨmɨ ekwaŋ uŋun paŋtagap aŋaki nin dakon man do mayak mayak gen yoŋ.
Ninon yo noman taŋ uŋun do jɨkgo madepsi yanjaŋ nimaŋ.
15-16 Uwal da jɨgɨlak gen yaŋ namɨŋek gen gɨreŋ nayaŋ.
Aŋek kobogɨ do aŋpak yokwisi aŋ namaŋ.
Do bɨsapmɨ bɨsapmɨ yokwisi nandaŋek mayaktok obɨsi pasat.
17 Piŋkop, nin gak dɨma ɨŋtaŋ gamgumaŋ, ae gak dakon saŋbek saŋbek dakon gen dɨma abɨŋ yɨpgumaŋ.
Mani uŋun yo morap noman taŋ nimgwit.
18 Nin manji gamɨŋek gak dakon kosit dɨma yɨpmaŋ dekgɨmaŋ.
19 Mani joŋ kɨlap da ekwaŋ tɨmon gak da nin paŋupbal agɨl.
Aŋek pɨlɨn tuk madep naŋ nin wɨtjɨgɨl.
20-21 Piŋkopnin, gak do ɨŋtaŋ gamgumaŋ, bo ae kɨsitnin amɨn ŋwakŋwarɨ dakon piŋkopni do yopno kɨŋakwa bɨsit agɨmaŋ tam gaga nandabim.
Nin da butgwan nandak nandak morap pasɨlɨ toŋ uŋun nandaŋ mudosol.
22 Ro 8.36 Nin gak dakon mɨŋat amɨnyo ekwamaŋ, do gɨldat kɨnda kaloŋ uwal da nindapba kɨmokgomaŋ.
Nin sipsip si nindapba kɨmorɨ da tɨlak ekwamaŋ.
23 Amɨn Tagɨ, gak pɨda! Gak nido pokdol? Pɨda!
Nin do toktogɨsi manji dɨma nibi.
24 Gak mibɨlɨ nido pasɨl nimɨsal?
Amɨn da yokwi aŋ nimɨŋakwa nin jɨgɨ madepsi sigɨn pamaŋ.
Nin dakon jɨgɨ do dɨma ɨŋtaŋ nibi.
25 Nin maŋ kɨmbabaŋon pagapno gɨptɨmnin amɨn kɨmakbi da yaŋ mɨktɨmon toŋ.
26 Piŋkop, pɨdaŋ abɨŋ nin paŋpuluga.
Butdasi galak taŋ yomyom aŋpakgo do nandaŋek nin yokwikon baŋ tɨmɨgaki kɨmot dɨma aneŋ.