1 De m’ag ngak be’ nib balyang ni ngan tayfan, bod rogon e ayis ni aw u ngilan’ e yal’, ara n’uw ko ngiyal’ ni yima t’ar wom’ngin e woldug.

2 Buch wa’athan e dabi yib nga dakenam ni fa’anra dariy tapgin ni nge aw ngom. Ni bod rogon e arche’ ni be changag i yan ma der tal nga but’.

3 Thingar mu toy e os, thingar m’ag e gaf nga l’ugun dongki, ere thingar mu toy be’ nib balyang. 4 Fa’anra mu fulweg ba de’er nib thini balyang, ma ri ta’reb fanmew balyang facha’ ni duwer.

5 Ga ra pi’ e fulweg nib thini balyang u ba de’er ni ku ba thini balyang, ma cha’ ni fith fare de’er e ra nang ni gathi aram feni llowan’ ni bod rogon ni be leamnag.

6 Fa’anra mmulwol ngak be’ nib balyang ni nge yan i yog e mulwol rom, ma kabfel’ ni ngam th’ab rifrifen em; ya oloboch e ga be ning ni ngeb ngom.

7 Be’ nib balyang ni nge yog e thin nib gonop e bod ay be’ nib mugutgut ni nge yan ngay.

8 Be’ nib pinat ni yibe ta’langin e bod e malang nni michgiy ngalan e gawul.

9 Be’ nib balyang ni be ma’afdal be yog e thin ni bay e gonop riy e ra yib ngan’um be’ nib chingnag ni be guy rogon ni nge luf e rchangal u pa’. 10 Be’ ni fek be’ nib balyang ni nge maruwel e kemus ni be kal ngak gubin e girdi’ nib l’ag ko fare maruwel. 11 Be’ nib balyang niki sul u daken e n’en ni ka’a rin’ e bod ba pilis ni sul ko sul’ugun rok. 2 Pe 2:22

12 Re balyang ni th’abi pinat e kabfel’ boch ngak e pi’in yad ma leamnag ni bay e gonop rorad ma dariy.

13 Mangfan ni girdi’ ni gamead e da rir oggad u naun rorad nga wean? Mang e yad be tamdag ngay? Pi layon?

14 Pi’in gamead e yug yad ma pig u chob. Darir paloggad boch ngab mab ni be pig u daken e ins.

15 Boch e girdi’ e kay gi gel e gamead rorad ni mada’ ko ggan ma dabyag ni ngar ted nga langrad.

16 Be’ nib gamead e bay i leamnag ni ir e ba llowan’ ngak medlip e pumo’on nrayag ni ngar weliyed fan e tin yad be leamnag.

17 Kabfel’ ni ngam tel yuwantel ba kus nib damumuw ko bin ngam un nga ba tugthin ni dariy rogom ngay.

18-19 Be’ ni bannag be’ me cheal nge yog ni kemus ni be mak’rang e bod be’ nib aliliy ni be gosgos nga talin e maad’ad.

20 Ra ma’y e l’ud me math e nifiy; mra dariy e nonnon me tal e tugthin.

21 Charkol e ma tay achiffin’ ni ba gawal; l’ud e ma tay e nifiy ni be gak’, ma pi’in ntakar oloboch e yad ma gafseg e tugthin.

22 Non non e rib fel’ lamean! Ri gadad ba’adag ni ngad ful’ed!

23 Thin ni de yul’yul ni be mithag e tin nriyul’ ni bay u lanin’um e bod e ma’achaw u dow ba thib’ ni be mithag e tha’al riy.

24 Be’ nma dakebang nag ir e ma mithag e fananikan rok ko thin rok ni be pi’em ngalang. 25 Rayag ni bfel’ e thin rok, machane dabi pagan’um ngak, ya laniyan’ e ba sug ko fananikan. 26 Rayag ni nge upnguy e fananikan ni be tay, machane gubin e girdi’ nra guy e kireb ni be ngongliy.

27 Girdi’ nma tay e wup ni nge aw boch e girdi’ ngay e yad e yad ma aw ngay. Girdi’ nma tabab i lobbiy e malang e yad e ra lobeb nga dakenrad.

28 Mu kol ayuw rok be’ nma lifith l’ugun ngom ara ma pi’em ngalang ko thin ya be guy rogon ni nge kireb nigem.