1-2 Karna-wukanyila barra alunga liyi-wuluwu wiji wayathantharra. Yirru, wumba jirrini li-wardi, jirru-wukanyinji alunga nuwalarrkulu, “Li-mangaji, kurdardi yurlurr kalu-wingkayima, kurdardi.” Ngalirru jirru-wukanyinji nganinya ngalirru jirrinyambi-nanji yirru li-mirdan nuwarnu-yuwawu wingkayawu yurlurr. Namba yirru jirru-wukanyinji nganinya barra nganinyanga, kulu baku kurdardi kirrinyambi-narru yiku ki-Kada, “Nganu li-manji. Baji ngalinganu kanu-wardimanthaninya awara, li-manji kanu-arri wingkayawu yurlurr,” barnikirrinyambinu yiku nganinya. Namba jirrinyamba-wukanyinji nganinyanga, “Ngambala, li-mirdan jambalini alunga liyi-mangaji wumba jalu-wardimanji awara,” kulu baku kirrili-nala ki-Kada, “Yirru, ngalirru kirru-wardimanthaninya awara ngalirru kirrinyamba-lhaanthaninya yirru wardimanthawu awara. Kulu ngarna barra, jarnini yurlurr ngalingarna kirrirna-ramala, kirrirna-ramala nuwarnu-wardiyu nuwu-mangaji nuwarnirrunga.” Kulu Kada, kiwa-nmala yurlurr ngaliwa ka-wukanyila alunga liyi-wuluwu nganinya.

3-4 Kulu yirru, nungka jirrinyamba-wukanyinji, “Li-mangaji, jalingambala-lhaanji alu wardimantharra awara, kurdardi yurlurr li-mangaji, li-wardimbangu. Ngala minja ngambala, jambala-wardimanji awara ngala minja kambala-wingayanama winarrku, kurdardi ngambala kambalilu-ramarru ki-Kada, kurdardi kambalilu-ramarru nuwarnu-wardiyu nuwarnu-ngambalanga,” nganinya jirru-arrinji. Ngala kurdardi. Kalngiya kirrilu-ramala nuwarnu-wardiyu.

Nungka jirrinyamba-wukanyinji mili, “Kada yabi barra, jiwini yabi ngambalanga, kurdardi kambalilu-ramanma nuwarnu-wardiyu ambuliyalu. Bawuji barra, kambala-wardimanthanama awara ngambala-yurrngu kangka kurdardi kambalilu-ramarru,” nungka nganinya jirrinyamba-wukanyinji. Ngala kurdardi. Jirru-warndimanji awara nganinya.

Yabi jiwini Kada yirrunga, aliyaliya kirrilu-ramala nuwarnu-wardiyu, aliyaliya, kangka ja-yukumanji yirrunga, yirru nyamba-yangamanthawu, yirru rarrinjawu nuwarnu-wardiyu nuwarnirrunga, ja-yukumanji yirrunga, yirru ndayawu na-mangaji namu-wardi.

5 Ngala yirru, kurdardi karnirra-ndarrma, jirru-wardimanji awara, jirru-ngajbirrinji yiku ki-Kada, waraba rarrinjawu nuwarnu-wardiyu nuwarnirrunga, jirru-wardimanji awara. Kulu bajungkarnu jirru-wardimanji awara marda yirrunga bakuwu. Ki-Kada jarnilu-mulamulanganji narnu-wardi kurdandu. Ka-yinjathirrila nuwu-mangaji nuwarnu-wardiyu nuwarnirrunga nuwarnu-jakardawu, ka-yinjathirrila baku ngaliwa kalilu-ramala li-wulu li-wardi, li-mangaji wumba kurdardi kalu-wingkayanima yurlurr yiku. Ngala li-mbangu nalarrku, kalu-wingkayaninya yurlurr yiku, kurdardi kalilu-ramarru li-mangaji, kalu-wingkalwingkayanama winarrku yabi. Nganinya ka-arrila alunga liyi-wuluwu wiji, kalngiya jiwini yurlurr, Yijan Kada. 6 Kulu kilu-yabimala awara ngambalanga liyi-yabiyu liyiku ngala alunga liyi-wardiyu kilu-wardimala awara.

7 Nalarrku jalu-wingkayi yurrngumantha yabimantharra, yukumantharra yiku ki-Kada, yiwa yabimanthawu awara alunga baku, jalu-mijanganji yiwa ngayamanthawu alunga, yiwa nyamba-riyarrabanthawu alunga, marda jarnalu-mijanganji alu nmanthawu li-lhungku nalu-yurrngu barranamba yiwa jiwini lhungku na-yurrngu. Li-mangaji barra kalilu-ngundarra na-mangaji narnu-lhungku ki-Kada, kalilu-lhungkumala nganinya, alu nmanthawu li-lhungku nalu-yurrngu barni-binjawu. 8 Ngala nalarrku, minja jalinyamba-nykalanykarrinji nuwarnalunga, rdulurdumanthawu awara ruthuruthu alunga, alu nmanthawu li-walkurrawala. Kurdardi kala-kanjima wuka, nya-mangaji yurlurr wuka yiku ki-Kada, kurdardi kalima ngayangaya nyuwu-mangaji ngala minja narnu-wardi jarnala-kanji, jalini ngayangaya alunga liyi-wardiyu nmanthawu nungkarnu-wardinja, li-mangaji barra.

Ngala Kada, ka-wardirrila na-wurdu alunga, ka-yinjathirrila alunga wirangu narnu-wardi narnalunga. Kurdardi kumba-riyarrabarru alunga ngala ka-yinjathirrila na-wurdu alunga nuwarnu-wardiyu wakulamba. 9 Alunga liyi-mangaji wumba jalu-wardimanji awara, kala-nmala nungkarnu-wardinja. Ka-wingkala budijbudij awara alunga, rukurrinjawu nalu-manka, rarrinjawu, ka-wingkala alunga liyi-mangaji wiji, ambuliyalu alunga liyi-wuluwu liyi-Juwu, ngala alunga liyi-wuluwu nuwalarrkulu ngulakari.

10 Ngala alunga liyi-mbangu wumba jalu-yabimanji awara, kala-nmala nungkarnu-yabinja yilaa ki-Kada. Ka-ngayamala alunga, kumba-riyarrabala alunga, kalilu-yabimala nalu-wurdu nmanthawu wuntha, nganinya ka-nmala alunga liyi-mangaji wiji, ambuliyalu alunga liyi-wuluwu liyi-Juwu, ngala alunga nuwalarrkulu ngulakari.

11 Kurdardi kumba-yangamanjima Kada alunga nuwalarrkulu kulu nuwalarrkulu ngala minja nganinya arrkula jiwini yurrngumantha alung liyi-wuluwu wiji, ngayamantharra yurlurr. Yurlurr jiwini alunga liyi-wardiyu wumba kalilu-ramala li-Juwu baki nalarrku, wiji li-wardi. Marda alunga liyi-yabiyu jiwini yurlurr yabimanthawu awara alunga, alunga liyi-Juwu baki alunga nuwalarrkulu, alunga liyi-yabiyu wiji.

12 Li-mbangu, jalu-wardimanji awara wumba jalini li-manji nuwarnu-yuwawu ki-Mujij, kalilu-ramala ki-Kada; waraba kangka kalu-ngajbirrinjima nuwu-mangaji, ngala kalilu-ramala kangka jalu-wardimanji awara, waraba kalu-wingkayima yurlurr nuwu-mbangu wumba jarnala-nykarrinji narnu-yabi nalu-wurdu.

Li-mbangu nalarrku, jalu-wardimanji awara wumba bajarnu narnu-yuwa ki-Mujij aluwa, kalilu-ramala ki-Kada kangka jalu-ngajbirrinji nuwu-mangaji nuwarnalunga. Kalilu-ramala nganinya li-mangaji nuwarnu-yuwawu kangka jarnala-nykarrinji winarrku, waraba kalu-ngayangayarrinjima nuwu-mangaji.

13 Kurdardi ki-Kada kalili-narru li-mangaji li-wulu, “Yirru yurlurr kangka karnirra-nykarri narnu-yuwa narnu-ngatha wumba karna-ngunda Mujij,” kurdardi ka-arriyu nganinya alunga, kangka jarnala-nykarrinji winarrku, kurdardi kalu-ngayangayarrinjima nuwarnu-yuwawu nuwarnu-yabiyu wumba jalini naluyirdi nuwu-mangaji.

Ngala nalarrku, namba jarnala-nykarrinji narnu-yuwa, jarnala-kanji, jalu-wingkayi yurlurr nuwu-mangaji, kulu kalili-nala li-mangaji, “Yirru kirrirna-yibarra yirru nmanthawu barranamba yurlurr ngatha,” nganinya ka-arrila alunga.

14 Kulu li-mbangu, waraba li-Juwu ngala nalarrku li-wulu, waraba alunga barra narnu-yuwa ki-Mujij ngala li-manji li-mangaji, namba jarnala-nykarrinji narnu-yabi nalu-wurdu li-mangaji marda jalu-wingkayi yabi barranamba ki-Mujij kilu-yibarra alunga liyi-wuluwu wingkayawu yabi, kulu li-mangaji barra jalini barranamba li-mbangu wumba jalini li-mirdan nuwarnu-yuwawu, li-ngayangaya jalini, nganinya jalini li-mangaji wumba kurdardi aluwa barra narnu-yuwa ki-Mujij. 15 Namba jalu-ngayamanji nuwarnu-yabiyu, namba jalu-wananji nuwarnu-wardiyu, kulu nalarrku li-wulu winkanda, jalini mirdan alunga wumba jala-nykarrinji Kada kalngiya nalu-wurdu. Nganinya j alinyamba-nykalanykarrinj i barranamba Kada ja-wukanyinji nuwarnu-yabiyu baki nuwarnu-wardiyu nungkarnu-yuwangka nungkarniku.

16 Bawuji barra kulu Kada, nganinya ka-nmala alunga liyi-wuluwu wiji barra, baku ngaliwa kilu-maramaramala Jijaj Kurayij, yiwa ruthuruthumanthawu li-wulu, ruthuruthumanthawu li-mbangu wumba jalini li-yabi barra nalu-wurdu nyamba-nykalanykarrinjarra barra, mili li-mbangu nalarrku barra wumba jalini li-wardi nyamba-nykalanykarrinjarra barra nalu-wurdu barra. Na-ja barra narnu-yabi wumba jalili-nanji li-wulu.

17 Ngala yirru, marrirru, jirrinyambi-nanji, “Nganu li-Juwu,” yirru barra jirrinyamba-alarramanji nganinya, “Nganu likungu ki-Yijanku ki-Kada, li-yabi. Karnilu-ngunda narnu-yuwa narnu-yabi na-nganunga. 18 Nganu li-mirdan nuwarnu-yuwawu ki-Kada, nganu janu-ngayamanji nuwarnu-marringayawu kangka kanalu-milirdinia narnu-yuwa linj i-wurrirrinju linji-nganunga. 19-20 Nganu li-mirdan yunduyundumanthawu awara alunga liyi-mbangu wumba li-manji jalini li-yakayaka. Barranamba nya-mbangu yumbu ja-wingkayi nungku-rlangandu, jumba-alathamanji nungku-rlangandu wundururra, barranamba li-wulu kalu-wingkayima nganuwalu, kalinyamba-alathamanjima nganuwalu, nganu li-wirdiwalangu milirdimanthawu, ngayamantharra nganuwalu. Jalinganu-milirdimanji li-yakayaka wumba jalini li-manji barranamba li-ardubirri. Nganu li-mirdan barra, li-yuwawiji barra, nganu nganuyirdi nuwarnu-yuwawu wumba kalngiya wuka ki-Kada,” nganinya jirrinyamba-alarramanji.

21 Kulu jarna-wukanyinji yirrunga barra. Namba jirrinyambi-nanji nganinya, yirru nirruyirdi nuwarnu-yuwawu ki-Mujij, yurlurr jinangu wuka kalngiya, namba jirru-yunduyundumanji awara alunga nuwalarrkulu nganinya, kulu wayi barra yirru? Ngalhiyu kurdardi kirrinyamba-milirdimanjima yirru? Jalirri-nanji li-mangaji, “Barni-wajkirrantha awara!”, ngala yirru, jirru-wajkirranji awara.

22 Jalirri-nanji lalungali-wangu nuwalarrkulu, “Barni-rdumantha lalungali-wangu nuwalarrkulu! Barni-yiwantha li-mayirli nuwalarrkulu!” Ngala yirru, jalirru-rdumanji, jalirru-yiwanji. Jirrinyambi-nanji, “Nganu, janu-mulamulanganji nya-mbangu nyarrku yijan alunga liyi-wuluwu winkanda, wambu janini juju yiku,” ngala yirru, jirru-wingkayi bajinju nungku-alanjilu yiku ki-yijanku nyalunga wajkirranthalu awara baji.

23 Jirrinyamba-alarramanji, “Nganu li-yabi li-yuwawiji,” ngala jirru-ngajbirrinji nuwu-mangaj i. Li-mbangu winkanda, jirrala-nganji, jirrala-nykarrinji ngalirru jirru-ngajbirrinj i nuwarnu-yuwawu nuwarniku ki-Kada, kulu jalu-lhawamanji yiku, jalu-lhawamanji yiku ki-Kada li-mangaji kangka yirru jirru-ngajbirrinji nuwu-mangaji nuwarnu-yuwawu nuwarniku.

24 Kulu nganambajilulu barra wankala mirningiya, kilu-balirra wuka nyungku-mangaji, yiku wuka ki-Kada, “Li-mbangu winkanda, jalu-lhawamanji Kada, jalu-lhawarndiyi yiku, jalu-arrinji, ‘Wardimbangu nya-mangaji yijan Kada, nya-mangaji alunga liyi-ja wardimbangu,’ kulu jalu-wukanyinji nganinya kangka yirru li-Juwu jirrini li-wardi, kurdardi kirru-wingkayima yurlurr yiku, yirru barra,” nganinya kilu-yibarra ki-wankalangku. 25 Kulu yirru, kirralu-ma yirru li-Juwu li-mayani barranamba ki-Kada kili-nu malbu Yiburama wankala manjarra nganinya, alu nmanthawu li-wulu likungu li-rduwarduwarra, wankala kili-nu ki-Kada. Kulu yirru li-rduwarduwarra, li-yabi barra jirrini namba jirru-ngayangayarrinji nuwarnu-yuwawu ki-Mujij. Namba li-rduwarduwarra jirrini, li-ngayangaya nuwarnu-yuwawu, kulu nganinya barra marringaya yirrunga, kalngiya marringaya nmanthawu li-rduwarduwarra, namba jirrini li-ngayangaya nuwarnu-yuwawu. Ngala namba kurdardi, namba yirru li-rduwarduwarra jirru-ngajbirrinji nuwarnu-yuwawu, kulu jirrini barranamba li-mbangu li-nganji ki-Kada, minja kirralu-ma winarrku. 26 Ngala li-mbangu nalarrku winkanda, li-manji nuwarnu-yuwawu manjawu, namba li-mangaji kalu-wingkayima barrawumba kalima yurlurr nuwarnu-yuwawu ki-Mujij, kalima li-ngayangaya nalu-wurdu yiku ki-Kada, kulu li-mangaji li-wulu kalima likungu kangka kalima li-ngayangaya nalu-wurdu barranamba li-rduwarra wumba nalu-wurdu li-ngayangaya nuwarnu-yuwawu ki-Mujij. 27 Li-mangaji barra li-winkanda, kurdardi kalima li-rduwarra, ngala minja kala-nykarrinjima Kada nalu-wurdu, li-mangaji kalala-nganjima nungkalarrku, “Li-mangaji li-marringaya jalu-ngayangayarrinji yiku ki-Kada.” Ngala yirru, jirrala-nganji yirru li-rduwarra, bajarnu yirruwa narnu-yuwa ki-Mujij balirrantha, jirrala-nganji yirru ngajbirrinjawu nuwu-mangaji, “Li-mangaji li-wardimbangu! Jalu-ngajbirrinji nuwarnu-yuwawu ki-Mujij.” 28-29 Kirrirni-nu nganinya, marrirru, kangka li-wulu barra, jalini likungu ki-Kada, jalini likungu kalngiya, kurdardi kangka li-mbangu lalungali-biyi li-Juwu, kurdardi kangka jalini li-rduwarra, kurdardi nganinya nmanthawu likungu ki-Kada, ngala li-wulu jalini likungu ki-Kada, kalngiya jalini likungu kangka jala-nykarrinji Kada nalu-wurdu, jalinyamba-yibarranji nalu-wurdu yilaa. Kulu li-mangaji, nungka nalarrku li-wulu kalinyamba-lhawarrmanjima alunga, nungka kurdardi, ngala Kada, ka-wukanyila alunga, “Jarnamba-riyarrabanji alunga liyi-mangaji, jalinyamba-yibarranji nalu-wurdu ngathangka, li-ja li-marringaya,” ka-wukanyila nganinya alunga. Yiwa Kada kumba-lhawarrmala alunga kumba-lhawarrmala alunga barra. Bawuji.