22
Elifasi a falan saxanden Yuba xa: Hakɛ kanna nan Yuba ra yati!
1 Teman kaana Elifasi mɔn yi falan ti, a naxa,
2 “Adamadiin tɔnɔna Ala ma ba?
Hali xaxilimana,
a tɔnɔn luma a yɛtɛ nan tun ma.
3 I na tinxinɲɛ ayi,
na tɔnɔna Ala Sɛnbɛ Kanna nan ma ba?
Xa fɛ mi i sigati kiin na,
na munanfanna a ma ba?
4 I mirixi a ma ba
a Ala i ratɔrɔnma nɛn,
a i xali kiti sadeni,
i to gaxuxi a yɛɛ ra?
5 I ya fe ɲaxine mi gbo ba?
I hakɛne dan mi na.
6 I yi tolimaan tongoma i ngaxakedenne yii fuun nin,
i yi e dugine ba e ma,
i yi e magenla lu.
7 I mi yi igen soma muxun yii
min xɔnla naxan ma,
i yi tondi donseen soɛ kamɛtɔɔn yii.
8 Yamanan yi sɛnbɛmaan nan yii,
wasoden nan yi dɔxi yamanani.
9 I yi kaɲa gilɛne raxɛtɛma nɛn e yii genla ra,
i yi kiridine ɲaxankata.
10 Nanara, i rabilinxi luti ratixine ra,
gaxun yi i suxu xulɛn.
11 Nayi, i mi dimini ito toma ba,
i mi fufani ito toma ba
naxan i rabilinxi?”
12 “Ala mi kore xɔnna xan ma ba?
Sarene mato kore, e mate pon!
13 I a falama, i naxa,
‘Ala nanse kolon?
A nɔɛ kitin sɛ kunda dimin xanbi ra ba?
14 Kundana a yɛɛ ma,
a mi sese toma,
a nɛma kore xɔnna rabilinɲɛ.’
15 I mɔn waxi lu feni kira fonni ito xɔn ba,
muxu ɲaxine sigan tima naxan xɔn?
16 E faxan nɛn
benun e waxatin xa li,
alo fufa gbeen banxi kanken xalima kii naxan yi.
17 E yi a falama nɛn Ala xa,
e naxa, ‘I masiga nxu ra.
Ala Sɛnbɛ Kanna nan i tan na,
koni i nɔɛ nanse ligɛ nxu ra?’
18 Anu, Ala nan e banxine rafe nafunla ra.
Ee! Ɲaxudene fe yitɔnxine raɲaxu n ma!
19 Tinxindene na e to gbaloni, e sɛwa.
Sɔntarene e magelema nɛn, e naxa,
20 ‘En yaxune bata raxɔri!
Tɛɛn yi e yiiseene halagi.’ ”
21 “Lanna xa lu ɛ nun Ala tagi,
nayi, i bɔɲɛ xunbenla sɔtɔma nɛn,
i hɛrin sɔtɔ.
22 Ala i xaranma naxan ma,
i na suxu,
i yi a falane sa i bɔɲɛni.
23 Xa i mɔn fa Ala Sɛnbɛ Kanna ma,
a mɔn i sɛnbɛ soma nɛn.
I xa tinxintareyaan masiga i konna ra,
24 i xa i ya xɛma faɲin woli ayi bɔxɔni,
hanma i sa a bira xude yi gɛmɛne longonna ra.
25 Ala Sɛnbɛ Kanna nan xa findi i ya nafunla ra,
alo xɛmaan nun gbeti fixɛ gbeena i xa.
26 Nayi, i sɛwan sɔtɔma nɛn Ala Sɛnbɛ Kanni,
i xunna kenla sɔtɔ Ala yɛtagi,
27 i yi a maxandi, a yi i yabi,
i yi i dɛ ti xuine rakamali.
28 Xa i fena nde ragidi,
Ala a rakamalima nɛn i xa,
kɛnɛnna luma nɛn i ya kiraan birin xɔn.
29 Ala na muxuna nde rayagi,
i a falama nɛn
a Ala na ligaxi nɛn
bayo wasoden nan na kanna ra,
koni, naxan na a yɛtɛ magodo,
Ala na rakisima nɛn.
30 Ala nan sɔntarene xunbama,
nanara, xa i sariɲan,
a i xunbama nɛn.”