1 Varityimyu̱ ne nu̱jechi̱deda diryu̱yada jiryiva, nu̱jechipiya̱jada samiy ra̱tidye ma̱cho̱ ra̱siquita Aténamu, nu̱ña̱jpa̱ni̱ Timutévu sa̱tidye jañu̱y jiryimu variy.

2 Nu̱ñi̱pa̱jada ji̱tani̱ Timutévu variy, ni̱tiy vu̱tyeryi̱, jiryatiy Ju̱denu muchechintyidyeñi̱, sa̱tidye datyanura samitu̱choda sanchiy Crístu. Nu̱ñi̱pa̱jadani̱ sa̱tidye suru̱tyaniy jirye, sa̱vanu̱tyaniy variy jiryetyuva̱chodamuyu. 3 Ne ti̱ ra̱siquitya variy jiryetyenu jityuva̱choda jarupadodamusiy, jiryeñi datyama̱: “Jarupadoda jarye sabay Ju̱denu vu̱jyu̱.” 4 Nu̱vyichanu̱yadanumatiy jiryisa̱, nu̱tyu̱chutityi ji̱tyaju̱ jiryivara, samitu̱choda jiyadaju̱ vurya̱paru̱tyajaya̱sara vu̱y, jiryedyetyi̱satya daryani̱day ravicha̱da day. 5 Ramuni̱timyu̱ ne rajechi̱deda nu̱ndyerye, ri̱pa̱jada variñi̱ Timutévu, ra̱tidye datya simusirya nu̱tyura ravichanu̱yada jiryetyuva̱choda, ri̱tay daryaju̱ saquivu̱chu dyetya quivu̱rya tarata jirye, rama̱cho̱jada mitya variy rivaayada jiryimu.

6 Diye ji̱ta siti̱ma̱ Timutévu jiryimusiy, satu̱chujamya̱ nu̱dyivara samiy tu̱choda jiryetyuva̱chodanchiy, jiryevya̱ta̱danchiy jarye; ranchintyi jiryatiy jiryejechipiya̱sara samiy nu̱ñijyu̱, jiryeñuvay jarye nu̱dyivasiy, nu̱tyu nu̱ñuvay darya jiryivasintyidye. 7 Jirya tu̱chodamusiy, ratyeryi̱veda, nu̱vyanu̱tyaja̱jasiy variy ranchiyu. Ti̱ta̱ju̱ nu̱pyaru̱tya̱danube, nu̱ña̱rupanusa̱damu jarye, ravanu̱tyaja̱ jiryetyuva̱choda nu̱y. 8 Ne jiryi̱nu̱y si̱tenuni̱ nu̱ñi̱nu̱y jiryetyi jiryiryi̱ radeda surra Nutyityu̱mu. 9 ¿Nu̱tyichiña̱te nu̱ña̱jchana̱tya samiñi̱ Ju̱denu jiryeyadaju̱, nu̱tyichiy? ti̱ta̱ju̱ nu̱ñi̱chana̱yadaju̱ jarye jiryatiy nu̱ñi̱chana̱y jiryenchintyi, Vuryi̱ndenu diyadajache. 10 Nu̱jechiñu̱y jaryi variy siva jna̱rya, nupora jarye, nu̱ña̱tidye diy ju̱na̱y jiryemyo̱va, nu̱ña̱ratyanu varirya jiryatiy rasu̱tye jiryetyuva̱chu̱sa̱damu.

11 Vu̱jye̱ Ju̱denu ji̱ta, Vu̱yntyityu̱ Jesús jarye, sa̱ma̱ jdutyara nú̱ nu̱ña̱jiju̱, nu̱ña̱tidye jto̱ jiryimu variy. 12 Jiryejyu̱ ji̱ta sa̱jasa̱chu Nutyityu̱ra jiryevya̱tarate day, jirya̱tidye va̱ta variy jaryi nu̱ñi jiryeyu, jirya̱ntya va̱ta ti̱ta̱ju̱ntidyeryi nijya̱nvantyidye, nu̱tyu nu̱vya̱ta darya jiryentyidye. 13 Ramusiy sa̱vanu̱tyanirya jiryejechiy jirya̱tidye vichasara jiintyi̱savay, ne juuchatavay, mitya, Vu̱jye̱ ju̱denu diyadajache, sa̱numatiy mu̱ti̱sara Vu̱yntyityu̱ Jesús, ti̱ta̱ju̱ sajiintyavay yisa̱.