1 Go galic aŋela teŋ kêsêp aŋga undambê gêmêŋ naŋ kêkôc gêsuŋbôm ŋaki ma kapoacwalô kapôêŋ teŋ kêsêp lêma. 2 Eŋ kêkôc lêŋuckêm, moac laŋgwa tau tôŋ. Eŋ ŋac-kêlênsôŋ-biŋwaga Sadaŋ tau. Aŋela gêsô eŋ tôŋ gebe ênêc e jala 1,000 êmbacnê acgom. 3 Go kêbaliŋ eŋ kêsêp gêsuŋbôm gêja ma kêlai ŋakatam auc, go kêpac katêkwi gêwê kêsêp ŋakatam ŋasawa gebe ênsau lau samuc êtiam atom e jala 1,000 êmbacnê acgom. Têm tonaŋ êmbacnê, go sêŋgamboac eŋ su ŋasawa ec sauŋgeŋ.

4 Go galic lêpôŋ taêsam ma lau sêŋgôŋ ŋaô. Ma Anôtô kêkêŋ kôm mêtôcŋa gêdêŋ êsêac. Go galic ŋamalac, taŋ sêjac êsêac êndu kêtu sêwa Jesu sa to sêsôm Anôtônê biŋ lasêŋa naŋ, nêŋ katuŋ. Êsêac teteŋ mec gêdêŋ bôc to gêdêŋ ênê ŋakatu atom ma sêkôc bôcnê ŋatalô sa gêc êsêac teŋbeleŋ to lemeŋ atom. Katuŋ tau mateŋ jali kêsa to sêjam gôliŋ sêwiŋ Kilisi têtôm kiŋ kêtôm jala 1,000. 5 Ŋacmatê dêdi sa ŋamata tau tonec. Ŋacmatê ŋagêdô mateŋ jali kêsa atom tageŋ e jala 1,000 êmbacnê acgom. 6 Aê aoc êôc lau dabuŋ, taŋ sêndi sa êtu ŋamata naŋ. Gêmacanô kêtu luagêcŋa ŋaŋaclai kêkôniŋ êsêac tôŋ atom. Êsêac têtu Anôtô agêc Kilisi nêŋ dabuŋwaga ma sênam gôliŋ sêwiŋ Kilisi têtôm kiŋ êtôm jala 1,000 tau.

7 Endêŋ taŋ jala 1,000 êmbacnê naŋ, oc sêŋgamboac Sadaŋ su aŋga nê kapoacwalô. 8 Ma êsa êna gebe ênsau lau samuc, Gog to Magog, taŋ sêjam nom auc e gêdêŋ ŋakêclêsu aclê naŋ, ma ênac êsêac sa gebe sênac siŋ. Lau tau têtôm gaŋac gwêcŋa, 9 ma êsêac sêsêlêŋ sêjam nom aucgeŋ ma sêwa Anôtônê launêŋ gamêŋ sêŋgôŋŋa to malac, taŋ Anôtô têtac gêwiŋ naŋ, auc e ja kêsêp aŋga undambê jageŋ êsêac su. 10 Go Anôtô kêbaliŋ Sadaŋ, taŋ kêsau êsêac naŋ, kêsêp jagêjactoŋ totalao, taŋ gêmuŋŋa sêbaliŋ bôc tau agêc propete dansaŋ sêsêp sêja naŋ gêja. Ma ŋandaŋ oc êlakoc êsêac êtôm bêc to eleŋ teŋgeŋ ma teŋgeŋ.

11 Go galic lêpôŋ kiŋŋa kwalam-kwalam kapôêŋ teŋ to ŋac, taŋ gêŋgôŋ ŋaô naŋ. Ma nom to undambê kêtaiŋ tau su aŋga ŋac tau nê laŋônêmŋa, jagêjaŋa kêsêp sawa gêja e malamê. 12 Ma galic ŋacmatê kapôêŋ to sauŋ samob jasêkô lêpôŋ kiŋŋa tau ŋanêmŋa ma sêkac buku ŋagêdô sa. Ma sêkac buku teŋ sa, naŋ buku mata jaliŋa tau. Ma sêmêtôc ŋacmatê nêŋ biŋ kêtôm nêŋ koleŋ, taŋ teto ŋabiŋ gêc buku tonaŋ ŋai su. 13 Gwêc kêkêŋ ŋacmatê, taŋ sêc ŋalêlôm naŋ, ma gêmacanô to lamboam sêkêŋ ŋacmatê, taŋ sêc lamboam ŋalêlôm naŋ, ma sêmêtôc êsêac gêdêŋ-gêdêŋgeŋ kêtôm gêŋ, taŋ sêgôm naŋ. 14 Go sêbaliŋ gêmacanô to lamboam sêsêp jagêjactoŋ sêja. Jagêjactoŋ tau gêmacanô kêtu luagêcŋa. 15 Ma embe têtap ŋac teŋ nê ŋaê sa ênêc buku mata jaliŋa tau atom, naŋ sêmbaliŋ eŋ êsêp jagêjactoŋ êna. * Gêdêŋ andaŋgeŋ Gog kêtu kiŋ aŋga gamêŋ Magog. Mago kêtu ŋamu lau sêsam ŋaê luagêc kêpi lau samuc nêŋ toŋ kapôêŋ, taŋ sêkêŋ kisa gêdêŋ Anôtô to nê lau.