1 Abimelec wẽ́rĩ́ca beꞌro Isacar ya curuacjʉ̃ Tola wãmetigʉ, Fúa macʉ̃, Dodo pãrãmi, Israe curuacjãrãrẽ narẽ ĩꞌatuꞌtirãrẽ yʉꞌrʉocʉ niwĩ. Cʉ̃ Samir wãmetiri macã Efraĩ́ buꞌpapijaropʉ macãrĩticʉ niwĩ. 2 Veintitrés cʉ̃ꞌmarĩ Israe curuacjãrãrẽ duticʉ niwĩ. Beꞌro wẽrĩa waꞌa, Samipʉ yaanoꞌcʉ niwĩ.

3 Tola beꞌro Jair Galaad wãmetirocjʉ̃ veintidos cʉ̃ꞌmarĩ Israe curuacjãrãrẽ duticʉ niwĩ. 4 Cʉ̃ treinta ʉmʉa põꞌrãticʉ niwĩ. Nanʉcʉ̃ na yarã burroare pesacãrã niwã. Na treinta macãrĩ Galaare duticãrã niwã. 5 Jair wẽ́rĩ́ca beꞌro Camón wãmetiri macãpʉ cʉ̃rẽ yaacãrã niwã.

6 Israe curuacjãrã apaturi Õꞌacʉ̃ ĩꞌorõpʉ ñaꞌarõ weeseticãrã niwã. Na Baal, tojo nicã Astartére ẽjõpeocãrã niwã. Tojo nicã Siria diꞌtacjãrã na ẽjõpeorãrẽ, Sidṍcjãrã, moabita masã, amonita masã, filisteo masã na ẽjõpeorãnojõrẽ ẽjõpeocãrã niwã. Õꞌacʉ̃ peꞌere ẽjõpeoduꞌu, cʉ̃ weedutiꞌquere weeticãrã niwã. 7 Tojo weegʉ Õꞌacʉ̃ na meꞌrã ua, filisteo masã, amonita masã doca waꞌacã weecʉ niwĩ. 8 Tojo waꞌari cʉ̃ꞌma meꞌrã dieciocho cʉ̃ꞌmarĩ Israe curuacjãrãrẽ ñaꞌarõ dutipe daꞌraduticãrã niwã. Nipeꞌtirã Israe curuacjãrã dia Jordã́ mujĩpũ mʉjãtiro peꞌecjãrã Galaad diꞌtapʉ nirãrẽ tojo weecãrã niwã. Ti diꞌta amorreo masã ya diꞌta nicaro niwʉ̃. 9 Tojo nicã amonita masã Judácjãrã, Benjamícjãrã, Efraĩ́cjãrã meꞌrã aꞌmewẽjẽrãtirã, dia Jordã́pʉ pẽꞌaticãrã niwã. Tojo weerã Israe curuacjãrã pũrõ wioro tʉꞌoñaꞌcãrã niwã. 10 Tojo waꞌacã, Israe curuacjãrã Õꞌacʉ̃ cʉ̃ weetamusere sẽrĩcãrã niwã: “Õꞌacʉ̃, mʉꞌʉrẽ ẽjõpeoduꞌu, Baal peꞌere ẽjõpeosiruturã, mʉꞌʉrẽ yʉꞌrʉnʉꞌcãpʉ”, nicãrã niwã.

11 Õꞌacʉ̃ narẽ yʉꞌticʉ niwĩ: “Dʉporopʉ Egiptocjãrã, amorreo masã, amonita masã, filisteo masã, 12 Sidṍcjãrã, amaleca masã, tojo nicã madianita masã mʉsãrẽ ñaꞌarõ weecã, mʉsã yʉꞌʉre weetamusere sẽrĩcã, yʉꞌʉ mʉsãrẽ yʉꞌrʉowʉ. 13 Yʉꞌʉ tojo weemicã, ãpẽrãnojõrẽ ẽjõpeorãtirã, yʉꞌʉre ẽjõpeoduꞌucãꞌwʉ̃. Tojo weegʉ mʉsãrẽ yʉꞌrʉonemosome majã. 14 Na mʉsã ẽjõpeorã, mʉsã beseꞌcãrãrẽ na weetamusere sẽrĩrã waꞌaya. Mʉsãrẽ mejẽcã waꞌacã, náta mʉsãrẽ yʉꞌrʉoato”, nicʉ niwĩ Õꞌacʉ̃.

15 Cʉ̃ tojo nicã tʉꞌorã, Israe curuacjãrã Õꞌacʉ̃rẽ aꞌtiro nicãrã niwã: “Ʉ̃sã mʉꞌʉrẽ yʉꞌrʉnʉꞌcãpʉ. Noꞌo mʉꞌʉ ʉ̃sãrẽ weesĩꞌrĩrõnojõ weeya. Mejõ niꞌcãrõacã waroma ʉ̃sãrẽ yʉꞌrʉoya”, nicãrã niwã. 16 Na tojo níca beꞌro ape diꞌtacjãrã na ẽjõpeorãnojõ na waꞌteropʉ nirãrẽ cõꞌa, Õꞌacʉ̃rẽ apaturi ẽjõpeocãrã niwã tja. Na tojo weecã ĩꞌagʉ̃, Õꞌacʉ̃ na piꞌetisere ĩꞌanemosĩꞌrĩticʉ niwĩ.

17 Beꞌro amonita masã Israe curuacjãrã meꞌrã aꞌmewẽjẽrãtirã, nerẽ, Galaapʉ cãrĩcãrã niwã. Israe curuacjãrã peꞌe nerẽqueꞌa, Mizpapʉ cãrĩrã waꞌacãrã niwã. 18 Galaacjãrã wiorã aꞌmerĩ ucũcãrã niwã: “Noꞌo amonita masãrẽ sʉꞌori ʉꞌmʉtã, aꞌmewẽjẽgʉ̃nojõ, cʉ̃́ta nipeꞌtirã Galaacjãrã wiogʉ sãjãgʉ̃sami”, nicãrã niwã.