1 Sala zii ma voloi kpein ge ɠɛni ga kona ungila puufele maazu lɔfela (127). 2 É zaani Kiliyate-Aaleɓa, nii é ga Ɠeeɓelɔn, Kanaan yooi zu. Aɓalaame ná-saa vai ɠɛɛni, é ma wɔlɔi wo. 3 Naa ʋolu Aɓalaame wuzeɠeni, é anzai ma ʋoomai yɛ laani, é li, é ɓɔɛ Ɠɛte nuiti pɔ, 4 é ɠɛ ti ma: «Nà ga wɛɛin, gè zeini wo zaama. À maaɠulu bosu ve zèa, gè ànzai maaɠulu, nii saai.»

5 Ɠɛte nuiti ti gooɠaaʋoteni, ti ɠɛ ma: 6 «Woilo gi-woo ma, màliɠii. GALA ge è ɠɛɛʋɛ ga nu wola gi zaama. È-anzai maaɠulu gá-ɠabayeɠeiti ma ʋagɔi zu. Gi tanɔpɛ ge la è ɠoma ga ná-kabayeɠe ve vaa è ya è-anzai maaɠulu vai zu.»

7 Aɓalaame wuzeɠeni, é maaʋɛɛ zou nuiti bɛ, Ɠɛte mavofodaiti. 8 É ɓɔɛ ti ʋɔ, é ɠɛ ti ma: «Ni wo vaa bu ga gè ànzai maaɠulu, à Sɔɠaal ná-doun zunui Efelon maanɛɛnɛ bɛ̀, 9 ga é Makepeela ʋugi ve zèa, toɠa nɔnɔ ʋe, nii é ná-kpala kpelamaʋɛ. É zɛ zèa ga sɔngɔ ɠitei nɔ wo ɠaazu, naa ɠa a kɛ é ɠɛ zèa ga maaɠulu bosuʋɛ.»

10 Efelon ɠɛni zeini Ɠɛte nuiti saama. É Aɓalaame wooɠaaʋoteni Ɠɛte nuiti gaazu, ta niiti kpein ti ɠɛni lɛɛzu taazu ga siɠida ʋelei. 11 É ɠɛ ma: «Ɓa-o, màliɠii, woilo mà! Gè nà-kpalagi vea è ʋɛ, ta pugi nii é ná. Gè fea è ʋɛ ga faanɛɛ, nà-nuɓusɛiti gaazu, ga è è-anzai maaɠulu ná.» 12 Aɓalaame maaʋɛɛni zou nuiti bɛ. 13 É Efelon wooɠaaʋoteni, nii a kɛ ti pɛ ti gooi mɛni, é ɠɛni ma: «Woilo dɛɛ gòoi ma, ɗa ɓalaagi. Va bu gè kpalagi zɔngɔi ve è ya. Yeezei bu bɛ̀, nà ànzai maaɠulu ná niina.»

14 Efelon Aɓalaame wooɠaaʋoteni, é ɠɛ ma: 15 «Màliɠii, woilo gòoi ma, leeni ɠa a ɠɛ ga naa de yɔɠɔzu da ɗe, zooi naa vaa zu nii sɔngɔi ga wali ɠae unnaanigɔ (400)? È-anzai maaɠulu ná.» 16 Aɓalaame vaani naa wu, nii Efelon boni, é wali ɠaei ɠaaluni, nii naa boni ma Ɠɛte nuiti gaazu, é lo wali ɠae unnaanigɔi (400) ʋa, eɠɛʋelei falibogi laaʋɛ ɠɛni la yaaɠoiti zea.

17 Zekana Efelon ná-kpalagi é Makepeela, Mamelee letemaʋɛ, kpalagi ta pugi é ná, guluiti ti kpalagi zu, kwɛpelemaʋɛ maaɠoolii zu, 18 naati pɛ ti ɠɛɛni niina ga Aɓalaame nɔnɔ, Ɠɛte nuiti gaazu, naati kpein gaazu, niiti ti ɠɛni lɛɛzu taazu ga siɠida ʋelei. 19 Naa ʋoluma Aɓalaame anzai Sala maaɠuluni Makepeela ɓalagi ma ʋugi zu, Mamelee letema ʋelei, nii é ga Ɠeeɓelɔn, Kanaan yooi zu. 20 Kpalagi ta pugi nii é ná, ti ɠɛni ga Aɓalaame nɔnɔ, naa ɠɛ ga kabamaʋɛ, é geyani Ɠɛte nuiti ma.