1 Ni ab neid hegai mo kahwalkaj ab e chehgidch. Kutki hema gam wantsh hegam wewaꞌak chechposig. K hema hab kaij hegam giꞌik haꞌichu doakam, “Ab g i hihm.” 2 K g neꞌokij hab sha kaidag mo g tataniki. Nt hahawa ep chum nei. Tki g s-toa kawyu am hema i wuhsh. Kuki ab hema cheshaj ch g gaht uꞌa. Mt g gihko an hab juh moꞌoj an. Ge oki gewkdag ch am i wuhsh mat wo ha gewito g hemajkam.

3 Kutki am hahawa ab kuhpiꞌo g gokkokam cheposig hegai mo kahwalkaj ab e chehgidch. Kuni kah g gokkokam haꞌichu doakam. K hab kaij, “Ab g i hihm.” 4 Tki ab hema ep i wuhsh g kawyu k ge s-wegi. K ab hema cheshaj. Kumt ab mah g gewkdag mat hab wo juh g cheggiadag an jewed dahm mat g hemajkam wo aꞌai e kokda. Kumt g geꞌe is-pahyo ab mah.

5 Tki ab hahawa i kuhpiꞌo g waikkokam cheposig hegai mo kahwalkaj ab e chehgidch. Kuni kah g waikkokam haꞌichu doakam. K hab kaij, “Ab g i hihm.” Nt chum nei. T g s-chuk kawyu ab i wuhsh. K hema cheshaj ch g pisaltakud uꞌa. 6 K am hema neok ab ha shahgid hegam giꞌik haꞌichu doakam ch hab kaij, “T wo si s-namkigk g haꞌichu hugi. Mt chum hems wo ha namkid g e-nahtoi am chikpank hemako tashkaj mamt wo ha nolawt g al hemako s-wehch pilkani o g waik s-wehch si-wahyo. Mt wabshaba pi wo shohbi g manjeki ch nawait.”

7 Tki gam hahawa wantsh k kuhpiꞌo g giꞌikkokam cheposig hegai mo kahwalkaj ab e chehgidch. Ni kah g giꞌikkokam haꞌichu doakam. K hab kaij, “I hihm.” 8 Nt ab i chum nei. Tki g s-kohmagi kawyu ab i wuhsh. Kuki hema cheshaj ch hab chehgig Muhki. Kuki ab si mia oidch him hegai mash hab e aꞌaga Jiawul Kih. Mtki idam ab ha mah g gewkdag am dahm g hemako tahpani mo giꞌikko e tahpanch (¼) ihda jewed. Kutki ha kokda cheggiadag ch ed ch g bihugigkaj ch mumkidagkaj. Tki g mischini haꞌichu doakam hab waꞌap haꞌi wo ha kokda.

9 Tki gam hahawa ep wantsh k kuhpiꞌo g hetaspokam cheposig hegai mo kahwalkaj ab e chehgidch. Kuni neid ab wecho g iagchulidakud g ha-dodakag hegam matki e koꞌij heg hekaj mo am ahgahim g Jiosh haꞌichu ahga ch pi shaꞌi dagito g haꞌichu e ahga. 10 Idam o si s-kaidam hihnk ch hab kaij, “Si s-gewkam kownal ch si s-apꞌekam ch si s-wohokam, heꞌes at wo i tashk mapt haha wo ha lodai g hemajkam an jewed dahm k ab wo ha mah g s-koꞌok namkidadag heg hekaj mat t-kokda?”

11 Mt ab hahawa wehsijj i ha mahkhi g s-tohta liliwa k hab ha ahg mat wo shaꞌal baꞌich i e uhꞌulinihogid k ab wo ai mat wehs wo e koꞌij hegam ha wehm pion ch ha-wepnag mat ha wepo masma wo e koꞌij.

12 Tki gam hahawa ep wantsh k kuhpiꞌo g chuhdpokam cheposig hegai mo kahwalkaj ab e chehgidch. Tki am shaꞌi si uꞌugij g jewed. Kutki g tash ge chuku hab masma mo g s-kowk s-chuk ikus. Kutki g mashad wehsko ge wegih hab masma mo g ehꞌed. 13 Tki g huhuꞌu i shul ab dahm kahchim amjed an jewed dahm hab sha masma mat g pi bakam suhna wo i shul ab e-jehj amjed mat g s-gewk hewel wo si uꞌugij. 14 Tki g dahm kahchim ab wabsh i huhug hab sha masma mat g tapial wo i e holiwkad k ged hu wo e cheh. Tki wehs g dohdaꞌag ch g al siꞌiskod jejewed am shuhdagi ch ed gam hu gawulko i e uhꞌul.

15 Ni ha neid matki wehs chum e eꞌesto g hemajkam, chum hems g kokownal ch si s-has hahaꞌichu ch shondal ha-geꞌegeꞌejig ch s-gewpkkam ch hegam ehp mo d shoꞌigkam ch hegam mo d nenehol. Am atki chum e eꞌesto chehcho ch ed ch am hohodai wepcho 16 ch ab si hihnk dohdaꞌag ch hohodai wui hab kaijch, “Ab g wo i shulig t-dahm mat pi wo t-neidad g Jiosh. Oi g wo t-eꞌesto ab amjed hegai mo kahwalkaj ab e chehgidch mat pi wo s-koꞌokam t-namkid. 17 E o aihim g lodaita tash. Kutt pi wo shaꞌi t-nako matt ab wui wo gegokiwua.”