1 ཁྱོད་ཅག་ཁྲོད་ཀྱི་འཁོན་འཛིང་དང་འཁྲུག་རྩོད་ནི་གང་ནས་བྱུང༌ངམ། དེ་ནི་ཁྱོད་རྣམས་ཀྱི་རྒྱུད་དུ་ཡོད་པའི་འཁྲུག་རྩོད་ཀྱི་འདོད་ཆགས་ལས་བྱུང་བ་མ་ཡིན༌ནམ། 2 ཁྱོད་ཅག་འདོད་རྔམ་ཆེ་ཡང་ཅི་ཡང་མ་ཐོབ༌པས། ཁྱོད་རྣམས་ཀྱིས་མི་གསོད་པ་ཡིན། ཁྱོད་རྣམས་ཀྱིས་བརྣབ་སེམས་བྱེད་ཀྱང་ཅི་ཡང་མ་ཐོབ་པས། འཁྲུག་རྩོད་དང་འཁོན་འཛིང་བྱེད་པ་ཡིན། ཁྱོད་ཅག་གིས་དཀོན་མཆོག་ལ་ཞུ་བ་མི་བྱེད་པས་ཁྱོད་རྣམས་ལ་ཅི་ཡང་མ་ཐོབ། 3 ཁྱོད་ཅག་གིས་རང་རང་གི་འདོད་པ་ལྟར་ཆུད་ཟོས་སུ་གཏོང་བའི་ཕྱིར། ཀུན་སློང་ངན་པས་དཀོན་མཆོག་ལ་ཞུ་བ་ཞུས་ཀྱང་ཅི་ཡང་མ་ཐོབ༌བོ།།

4 ཀྱེ། ལོག་གཡེམ་པ༌རྣམས། འཇིག་རྟེན་གྲོགས་སུ་གྱུར་པ་ནི་དཀོན་མཆོག་གི་དགྲ་རུ་ལངས་པ་མི་ཤེས༌སམ། དེའི་ཕྱིར། སུ་ཞིག་འཇིག་རྟེན་གྱི་གྲོགས་སུ་འགྱུར་འདོད་ན་དེ་ནི་དཀོན་མཆོག་གི་དགྲ་རུ་ལངས་པ་ཡིན་ནོ།། 5 གསུང་རབ་ཀྱི་མདོ་ལས་ཇི་སྐད་དུ། དཀོན་མཆོག་ནི་བདག་ཅག་གི་རྒྱུད་དུ་བཞུགས་པར་མཛད༌པའི་ཐུགས་ཉིད་ལ་ཤིན་ཏུ་དུངས་ཞིང་ཕྲག་དོག་སྐྱེས་པའི་ཚད་དུ་སླེབས་པ་ཡིན་ཞེས་གསུངས་པ་དེ་ནི་ཁྱོད་རྣམས་ཀྱིས་དོན་མེད་པར་འདོད༌དམ། 6 འོན༌ཀྱང༌། དཀོན་མཆོག་གིས་བདག་ཅག་ལ་དེ་ལས་ལྷག་པའི་ཐུགས་རྗེ་ཆེན་པོ་གནང༌བས། ཇི་སྐད༌དུ། དཀོན་མཆོག་ཉིད་ཀྱིས་ང་རྒྱལ་ཅན་ལ༌རྒོལ།། ཁེངས་སྐྱུང་མི་ལ་ཁོང་གིས་ཐུགས་རྗེ༌གནང༌། །ཞེས་གསུངས༌པའོ།།

7 དེའི༌ཕྱིར། ཁྱོད་ཅག་གིས་དཀོན་མཆོག་ལ་བསྟུན་དགོས་སོ།། བདུད་ལ་རྒོལ་བར་གྱིས༌དང༌། བདུད་ནི་ཁྱོད་ཅག་དང་བྲལ་ནས་འབྲོ་བར༌ངེས། 8 ཁྱོད་རྣམས་དཀོན་མཆོག་དང་ཉེ་བར་གཅོར་ཅིག ཁོང་ཡང་ཁྱོད་རྣམས་དང་ཉེ་བར་གཅར་ངེས་ཡིན། སྡིག་ཅན་ཁྱོད་ཅག་གིས་རང་གི་ལག་པ་གཙང་མར་ཁྲུས༌དང༌། བློ་གཉིས་འགལ་ཅན་ཁྱོད་རྣམས་ཀྱིས་རང་གི་སེམས་གཙང་མར་ཁྲུས༌ཤིག 9 ཁྱོད་རྣམས་ཀྱིས་ཡིད་སྐྱོ་བ་དང་མྱ་ངན་བྱས་ནས་ངུ་བར༌གྱིས་ཤིག རང་གི་དགོད་སྒྲ་ནི་སྡུག་བསྔལ༌དང༌དགའ་སྤྲོ་ནི་སྐྱོ་གདུང་དུ་སྒྱུར༌ཅིག 10 ཁྱོད་ཅག་གིས་གཙོ་བོའི་སྤྱན་སྔར་དམན་སེམས་བཅང་དགོས་པ་དང་། ཁོང་གིས་ཀྱང་ཁྱོད་རྣམས་མཐོན་པོར་བསྒྲེང་ངེས་སོ།།

11 སྤུན་ཟླ༌རྣམས། ཁྱོད་ཅག་གིས་ཕན་ཚུན་ལ་ཚིག་ངན་སྨྲ་བར་མི༌བྱའོ།། སུ་ཞིག་གིས་སྤུན་ཟླ་ལ་ཚིག་ངན་སྨྲ་ཞིང་ཁ་ཚོན་གཅོད་ན། དེ་ནི་བཀའ་ཁྲིམས་ལ་ཚིག་ངན་སྨྲས་ཤིང་ཁ་ཚོན་བཅད་པ་ཡིན། སུ་ཞིག་གིས་བཀའ་ཁྲིམས་ལ་ཁ་ཚོན་བཅད༌ན། དེ་ནི་བཀའ་ཁྲིམས་སྲུང་མཁན་མ་ཡིན་པར། བཀའ་ཁྲིམས་ཀྱི་ཁྲིམས་དཔོན་ཡིན་ཏེ། 12 མ་གཞི་བཀའ་ཁྲིམས་གནང་མཁན་དང་ཁྲིམས་དཔོན་ཆེན་པོ་གཅིག་ཁོ་ན་སྟེ། ཁོང་ནི་འཇིག་རྟེན་གྱི་མི་རྣམས་སྐྱོབ་ནུས་ཤིང་འཇོམས་ཡང་ནུས་པ་དེ་ཉིད་ལགས་སོ།། འོན༌ཀྱང༌ཁྱོད་ཀྱིས་རང་གི་ཁྱིམ་མཚེས་ལ་ཁ་ཚོན་གཅོད་པས་ཁྱོད་ནི་སུ་ཞིག་ཡིན་འདོད༌དམ།

13 ཉོན༌དང༌། ཁྱོད་ཅག་ལས་མི་འགའ་ཞིག་ན༌རེ། དེ་རིང་ངམ་སང་ཉིན་ངེད་ཅག་གྲོང་ཁྱེར་ག་གེ་མོ་ཞིག་ལ་སོང་ནས་ལོ་གཅིག་རིང་བསྡད༌དེ། ཚོང་ལས་བྱས་ནས་ཁེ་སྤོགས་ལེན་པར་བྱའོ་ཞེས༌སྨྲ་བ་ཡིན། 14 དོན་དམ་དུ་སང་ཉིན་དོན་ཅི་ཞིག་འབྱུང་བ་ནི་ཁྱོད་ཅག་གིས་མི་ཤེས། ཁྱོད་ཅག་གི་ཚེ་སྲོག་ནི་ཅི་ཞིག་ཡིན༌ནམ། མ་གཞི་ཁྱོད་ཅག་ནི་སྨུག་པ་ལྟ་བུ་ཡིན་པས་ཡུད་ཙམ་གྱིས་ཡལ་བར་འགྱུར། 15 དེ་ལས་ལྡོག་སྟེ། ཁྱོད་ཅག་གིས་གཙོ་བོ་ཐུགས་མཉེས་ན། བདག་ཅག་གསོན་པོར་གནས༌ཤིང༌། བདག་ཅག་གིས་དོན་འདི་དང་འདི་ཟེར་བ་ཞིག་བསྒྲུབ་ནུས་པ་ཡིན་ཞེས་སྨྲས་ན་ལེགས་སོ།། 16 འོན༌ཀྱང༌། ད་ལྟ་ཁྱོད་རྣམས་ཀྱིས་ང་རྒྱལ་བཅངས་ནས་ཁ་ཕོ་བྱེད་པས། དེ་ལྟར་ཁ་ཕོ་བྱེད་པ་ཐམས་ཅད་ནི་ངན་པ་ཡིན། 17 དེ་བས་སུ་ཞིག་གིས་ལས་བཟང་པོ་བསྒྲུབ་དགོས་པ་ཤེས་བཞིན་དུ་དེ་ལྟར་མི་བྱེད༌ན། མི་དེས་སྡིག་པ་བྱས་པའོ།།