1 དེ་ཡང་ཁྱོད་ཅག་བུ་ཕྲུག་རྣམས་ཀྱིས་གཙོ་བོའི་ནང་དུ་རང་གི་ཕ་མའི་ངག་ལ་མཉན་དགོས༌ཏེ། དེ་ནི་འོས་ཤིང་འཚམ་པའི་ཕྱིར༌རོ།། 2-3 ཁྱོད་རང་བདེ་ཞིང་ས་སྟེང་དུ་ཚེ་ཐག་རིང་བར་འགྱུར་བའི༌ཕྱིར། ཁྱོད་ཀྱིས་རང་གི་ཕ་མ་གཉིས་ལ་བཀུར་བསྟི་བྱེད་དགོས་ཞེས་པ་དེ་ནི་བཀའ་ཁྲིམས་ལས་ཁྱོད་ཅག་ལ་ཞལ་བཞེས་གནང་ཡོད་པའི་བཀའ་དང༌པོ་ཡིན་ནོ།། 4 ཁྱོད་ཅག་ཕ་ཡིན་པ་རྣམས་ཀྱིས་ཀྱང་རང་གི་བུ་ཕྲུག་ལ་ཁོང་ཁྲོ་མི་སློང༌བར། གཙོ་བོའི་བསླབ་བྱ་དང་ཞལ་གདམས་བཞིན་ཁོ་རྣམས་སྙོར་སྐྱོང་བྱའོ།།

5 ཁྱོད་ཅག་གཡོག་པོ་རྣམས་ཀྱིས་སྐྱབས་མགོན་མཱ་ཤི་ཀའི་བཀའ་ལ་ཉན་པ༌བཞིན། སྐྲག་སྐྲག་འདར་འདར་དང་སེམས་རྒྱུད་དྲང་པོའི་ངང་ནས་རང་གི་ལུས་ཕུང་གི་བདག་པོ་དེའི་ངག་ལ་མཉན་དགོས་ཤིང༌། 6 ངོ་སོ་བྱེད་པ་ལྟར་མིག་མདུན་ཁོ་ནར་ཞབས་ཕྱི་མི་སྒྲུབ༌པར། སྐྱབས་མགོན་མཱ་ཤི་ཀའི་གཡོག་པོ་དང་འདྲ་བར་སེམས་གཏིང་ནས་དཀོན་མཆོག་གི་ཐུགས་དགོངས་བཞིན་དུ་བསྒྲུབ་དགོས་སོ།། 7 སེམས་གཏིང་ནས་ཞབས་ཕྱི་སྒྲུབ་ཅིང་མི་ལ་ཞབས་ཕྱི་བྱེད་པ་ལྟར་མ་ཡིན༌པར། གཙོ་བོ་ལ་ཞབས་ཕྱི་སྒྲུབ་པ་བཞིན་ཡིན་དགོས། 8 རྒྱུ་མཚན་ནི་བྲན་གཡོག་དང་མི་རང་དབང་ཅན་སུ་ཡིན༌ཡང༌། ལས་བཟང་པོ་བྱས་པ་བཞིན་དུ་མི་རེ་རེ་ལ་གཙོ་བོས་བྱ་དགའ་གནང་ངེས་པ་ཁྱོད་ཅག་གིས་ཀྱང་ཤེས་པས༌སོ།། 9 ཁྱོད་ཅག་བདག་པོ་རྣམས་ཀྱིས་ཀྱང་གཡོག་པོ་རྣམས་ལ་འཇིགས་སྣང་མི་བསྐུལ་བར་གོང་གི་ཚིག་བཞིན་དུ་བྱེད་དགོས། ཅི་ལ་ཞེ་ན། ཁྱོད་ཅག་དང་ཁོ་རྣམས་ཀྱི་བདག་པོ༌སྟེ། ནམ་མཁའི་ཞིང་ཁམས་སུ་བཞུགས་པ་ཁོང་ཉིད་ཀྱིས་ཕྱོགས་རིས་མི་འཛིན་པ་ཁྱོད་རྣམས་ཀྱིས་ཀྱང་ཤེས་པའི་ཕྱིར༌རོ།།

10 མཐར་ཁྱོད་རྣམས་གཙོ་བོ་དང་ཁོང་གི་མཐུ་སྟོབས་ཆེན་པོར་བརྟེན་ནས་དཔའ་རྟུལ་ཅན་དུ་གྱུར༌ཅིག 11 བདུད་ཀྱི་གཡོ་ཐབས་བཟློག་པའི༌ཕྱིར། དཀོན་མཆོག་གི་གོ་མཚོན་ཆ་ཚང་ལུས་ལ་སྤྲ༌དགོས་སོ།། 12 ཅིའི་ཕྱིར་ཞེ་ན། བདག་ཅག་གི་འཐབ་འཁྲུག་ནི་ཤ་ཁྲག་ལྡན་པའི་མི་ལ་དམག་འཁྲུག་རྒྱག་པ་མ་ཡིན༌པར། སྲིད་དབང་འཛིན་མཁན༌དང༌། དབང་འཛིན༌མཁན། འཇིག་རྟེན་འདིའི་མུན་ནག་ལ་དབང་སྒྱུར་མཁན། མཁའ་དབྱིངས་སུ་རྒྱུ་བའི་གདོན་འདྲེའི་རིགས་སུ་གྱུར་པ་ཐམས་ཅད་ལ་གཡུལ་འགྱེད༌པའི་ཕྱིར་ཡིན། 13 དེ་བས་ན། མ་འོངས་པའི་དུས་ངན་པ༌ལ། དགྲ་བོ་ཕྱིར་བཟློག་སྟེ་དོན་ཐམས་ཅད་བསྒྲུབས་ནས་བརྟན་པོར་གནས་པའི༌ཕྱིར། དཀོན་མཆོག་གི་གོ་མཚོན་ཆ་ཚང་ལུས་ལ་སྤྲ༌དགོས་སོ།། 14 ཁྱོད་རྣམས་ཀྱིས་བདེན་པ་ཉིད་ནི་སྐ་རགས་སུ་བཅིངས་ནས་དྲང་བདེན་གྱི་བྲང་ཁྲབ་ལུས་ལ་གྱོན་ཏེ་བརྟན་པོར་གནས་པར༌གྱིས། 15 རྐང་པར་ལྷམ་གྱོན་པ་བཞིན་ཁྱོད་རྣམས་ཀྱིས་ཀྱང་ཞི་བདེའི་འཕྲིན་བཟང་སྒྲོག་པར་གྲ་སྒྲིག་བྱའོ།། 16 གཞན་ཡང༌། དད་པ་ནི་ཕུབ་ལྟར་ཟུངས་དང༌། བདུད་ངན་པའི་མེ་མདའ་ཐམས་ཅད་ཕྱིར་བཟློག་ནུས་སོ།། 17 ཐར་པའི་རྨོག་ཞྭ་མགོ་ལ་གྱོན༌པ་དང༌། དམ་པའི་ཐུགས་ཉིད་ཀྱི་རལ་གྲི་ལག་ལ༌འཛིན་པར་གྱིས། རལ་གྲི་དེ་ནི་དཀོན་མཆོག་གི་བཀའ་ལགས་སོ།།

18 ཡང་དམ་པའི་ཐུགས་ཉིད་ལ་བརྟེན་ནས་རྟག་ཏུ་གསོལ་བ་སྣ་ཚོགས་འདེབས་པ༌དང༌། དོན་དེ་སེམས་ལ་བཟུང་ནས་དད་ལྡན་དམ་པ་ཐམས་ཅད་ཀྱི་ཆེད༌དུ། གཟབ་གཟབ་ངང་ནས་གསོལ་བ་འདེབས་ཤིང་བརྩོན་དགོས་སོ།། 19 བདག་ལ་གཏམ་སྨྲ་བའི་ཁ་ལྕེ་ལྡན་པ་དང་། སྤོབས་པ་དང་བཅས་འཕྲིན་བཟང་གི་གསང་བ་གསལ་པོར་བརྗོད་ཐུབ་པའི་ཕྱིར། ཁྱོད་ཅག་གིས་གསོལ་བ་འདེབས་པར་གྱིས། 20 བདག་ནི་འཕྲིན་བཟང་དེའི་ཆེད་དུ་ལྕགས་སྒྲོག་གིས་བཅིངས་པའི་སྐུ་ཚབ་པ་ཞིག་ཏུ་གྱུར་པ་ཡིན་ལ། ངས་འཆད་འོས་པ་བཞིན་དུ་སྙིང་ལ་སྤོབས་པ་བསྐྱེད་ནས་ངག་ལས་འཕྲིན་བཟང་བསྒྲག་པའི་ཕྱིར། ཡང་གསོལ་བ་འདེབས་རོགས་ཞུའོ༎

21 མཛའ་ཞིང་བརྩེ་བའི་སྤུན་ཟླ་དང་གཙོ་བོ་ལ་ལྷག་བསམ་རྣམ་དག་གིས་ཞབས་ཕྱི་སྒྲུབ་མཁན་ཐི་ཀེ་ཀུ་ཞེས་བྱ༌བས། བདག་གི་དོན་རྣམས་དང་གནས་ཚུལ་ཐམས་ཅད་ཁྱོད་རྣམས་ལ་བརྗོད་ཅིང་ཤེས་སུ་འཇུག་པ་དང་། 22 ངས་ཁྱོད་རྣམས་ལ་ངེད་ཅག་གི་གནས་ཚུལ་ཤེས་སུ་འཇུག་པ་དང་ཁྱོད་རྣམས་ལ་སེམས་གསོ་འཐོབ་པའི༌ཕྱིར། ཁོ་རང་ཆེད་དུ་ཁྱོད་རྣམས་ཀྱི་གམ་དུ་མངགས༌པའོ།། 23 སྤུན་ཟླ་ཁྱོད་རྣམས་ལ་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཞི་བདེ་དང༌། དད་པ་དང་ལྡན་པའི་བྱམས་བརྩེ་འཐོབ་པར༌ཤོག 24 གཞན༌ཡང༌། བདག་ཅག་གི་གཙོ་བོ་ཡེ་ཤུ་མཱ་ཤི་ཀ་རྟག་ཏུ་གཅེས་པར་འཛིན་མཁན་ཐམས་ཅད་ལའང་ཐུགས་རྗེ་འཐོབ་པར༌སྨོན།། །།