1 ངས་དོན་འདི་ཐམས་ཅད་སེམས་ལ་བཟུང་ཞིང་ཞིབ་ཏུ་བརྟགས་པ་ན། མི་དྲང་བདེན་དང་མཁས་པ་དག་གི་ལས་རྣམས་དཀོན་མཆོག་གི་ཕྱག་ཏུ་ཡོད་ཅིང་། མི་སུ་ཞིག་གིས་ཀྱང་རང་གི་སྔུན་དུ་ཡོད་པའི་ཆགས་སྡང་གང་ཡིན་ཡང་དེ་རྟོགས་མི་ནུས། 2 མི་ཐམས་ཅད་ཀྱི་སྔོན་ལས་ནི་གཅིག་མཚུངས་ཡིན་ཏེ། མི་དྲང་བདེན་དང་སྡིག་ཅན་གཉིས་དང་། མི་བཟང་པོ་དང་ངན་པ་གཉིས། གཙང་བ་དང་མི་གཙང་བ་གཉིས། མཆོད་པ་འབུལ་མཁན་དང་མཆོད་པ་མི་འབུལ་མཁན་གཉིས་བཅས་ཐམས་ཅད་ཀྱི་མྱོང་ཚུལ་གཅིག་འདྲ་ཡིན་ཏེ། མི་བཟང་པོ་ཅི་ལྟར་ཡིན་ན་སྡིག་ཅན་ཡང་དེ་ལྟར་ཡིན་ལ། མནའ་སྐྱེལ་མཁན་ཅི་ལྟར་ཡིན་ན་མནའ་བསྐྱལ་བར་འཇིགས་པའི་མི་ཡང་དེ་ལྟར་ཡིན། 3 ཉི་མའི་འོག་ཏུ་འབྱུང་བའི་དོན་ཐམས་ཅད་ལས་རྐྱེན་ངན་ཞིག་ཡོད་པ་ནི། མི་ཐམས་ཅད་ཀྱི་སྔོན་ལས་གཅིག་པར་མ་ཟད་མི་རྣམས་ཀྱི་སེམས་སུ་ངན་པས་གང་སྟེ། གསོན་པའི་སྐབས་སུ་ཁེངས་དྲེགས་བསྐྱེད་ཅིང་མཐར་གཤིན་པོའི་ཁྲོད་དུ་འགྲོ་བའོ། ། 4 དེ་ལྟར་གསོན་པོ་ཀུན་དང་འབྲེལ་བ་རྣམས་ལ་རེ་བ་ཡོད་དེ། སེང་གེ་ཤི་རོ་ཞིག་ལས་ཁྱི་གསོན་པོ་ཞིག་གིས་དགའ། 5 ཅིའི་ཕྱིར་ཞེ་ན། གསོན་པོ་རྣམས་ཀྱིས་རང་ཉིད་འཆི་བར་འགྱུར་བ་ཤེས་ཀྱང་གཤིན་པོས་ཅི་ཡང་མི་ཤེས་ཏེ། དེ་དག་ལ་རྔན་པ་གང་ཡང་མི་འཐོབ་ལ་ཁོ་ཚོ་བརྗེད་པར་གྱུར་པ་ཡིན། 6 དེ་དག་གི་ཆགས་སྡང་དང་ཕྲག་དོག་ཀྱང་མེད་པར་གྱུར་ཅིང་། དེ་རྣམས་ལ་ཉི་མའི་འོག་གི་ལས་གང་རུང་ནས་ནམ་ཡང་ཐོབ་སྐལ་ཅི་ཡང་མེད་དོ། ། 7 ཁྱོད་ཀྱི་ལས་རྣམས་དཀོན་མཆོག་གི་ཐུགས་ལ་ལྡན་པས་ན། དགའ་དགའ་སྤྲོ་སྤྲོས་རང་གི་ཁ་ཟས་སྤྱོད་ཅིང་བློ་བདེ་བག་ཕབ་ངང་རྒུན་ཆང་བཏུང་བར་གྱིས་ཤིག 8 རྒྱུན་དུ་རྒྱན་གོས་གྱོན་ཏེ་སྐྲ་ལ་སྣུམ་གྱིས་བྱུགས་ཤིག 9 ཁྱོད་ཀྱི་མི་ཚེའི་སྙིང་པོ་མེད་པའི་ལོ་ཟླ་རྣམས་ཏེ། དཀོན་མཆོག་གིས་ཉི་མའི་འོག་ཏུ་ཁྱོད་ལ་གནང་བའི་སྙིང་པོ་མེད་པའི་ལོ་ཟླའི་ནང་དུ། ཁྱོད་ཀྱིས་དགའ་སྤྲོའི་ངང་རང་གི་གཅེས་སུ་འཛིན་པའི་ཆུང་མ་དང་ལྷན་ཅིག་འཚོ་བ་རོལ་དགོས་ཏེ། དེ་ནི་ཁྱོད་ཀྱིས་ཉི་མའི་འོག་ཏུ་ཚེ་གང་པོར་དཀའ་བ་སྤྱད་ནས་ཐོབ་པའི་སྐལ་ཡིན་ནོ། ། 10 ཁྱོད་རང་འགྲོ་སའི་གཤིན་པོའི་གནས་སུ་ལས་ཀ་མེད་ལ། འབྱུང་རྐྱེན་ཡང་མེད། ཤེས་བྱ་ཡང་མེད། ཤེས་རབ་ཀྱང་མེད་པས། རང་གིས་བསྒྲུབ་འོས་པའི་ལས་ནི་སྟོབས་ཤུགས་ཡོད་རྒུ་བཏོན་ནས་བསྒྲུབ་པར་གྱིས་ཤིག 11 ཡང་ངས་བལྟས་པ་ལ་ཉི་མའི་འོག་ཏུ་མགྱོགས་མྱུར་ཅན་ཡིན་ཡང་བང་རྩལ་གྱིས་མི་རྒྱལ། དཔའ་བོ་ཡིན་ཡང་འཐབ་མོར་མི་རྒྱལ། ཤེས་རབ་ཅན་ཡིན་ཡང་ཁ་ཟས་མི་རྙེད། བློ་ལྡན་ཡིན་ཡང་རྒྱུ་ནོར་མི་རྙེད། མཁས་པ་ཡིན་ཡང་མི་ཡི་བརྩི་མཐོང་མི་འབྱུང་སྟེ། དེ་དག་ཐམས་ཅད་དུས་དང་སྔོན་ལས་བཞིན་དུ་འབྱུང་བས་སོ། ། 12 དྲ་བའི་ནང་དུ་ཚུད་པའི་ཉ་ལྟར་རམ། རྙི་རྒྱ་རུ་ཚུད་པའི་བྱ་ལྟར། མི་ཡིས་ཀྱང་རང་གི་དུས་མི་ཤེས་པས། མི་རྣམས་ཀྱི་སྟེང་ལ་གློ་བུར་ཉིད་ལ་རྐྱེན་ངན་འབྱུང་བའི་ཚེ་དེའི་ནང་དུ་ལྷུང་བར་འགྱུར་རོ། །

13 ཉི་མའི་འོག་ཏུ་ཤེས་རབ་ཅིག་ཡོད་པ་ངས་མཐོང་སྟེ། བདག་གིས་དོན་སྙིང་ཆེན་པོ་ལྡན་པར་སྙམ། 14 དེ་ཡང་མི་གྲངས་ཉུང་བའི་གྲོང་ཁྱེར་ཆུང་ངུ་ཞིག་ཡོད་དེ། ཡང་དེ་ལ་རྒྱལ་པོ་ཆེན་པོ་ཞིག་གིས་དམག་དྲངས་ཏེ་མཐའ་ནས་བསྐོར་ཞིང་། འཛིང་རགས་ཆེན་པོ་རྣམས་བརྩིགས་ནས་གྲོང་ཁྱེར་ལ་རྒོལ་ཡང་། 15 གྲོང་ཁྱེར་དེའི་ནང་དུ་མཁས་པ་དབུལ་པོ་ཞིག་ཡོད་པས། བློ་རིག་པར་བརྟེན་ནས་གྲོང་ཁྱེར་དེ་བསྐྱབས་པ་ཡིན་མོད། འོན་ཀྱང་མི་སུ་ཞིག་གིས་ཀྱང་མི་དེར་རྗེས་དྲན་མ་བྱས་སོ། ། 16 མཁས་པ་དབུལ་པོ་དེ་ལ་མི་ཡིས་མཐོང་ཆུང་བྱས་ནས་ཁོའི་གཏམ་ལ་མ་མཉན་རུང་། དྲག་ཤུགས་ལས་ཤེས་རབ་ལེགས་སོ་ཞེས་ངས་སྨྲས་པ་ཡིན། 17 བླུན་པོ་རྣམས་ལ་སྲིད་བྱེད་པའི་མི་ཡི་ཀི་སྒྲ་ལས། མཁས་པས་གསུངས་པའི་འཇམ་པོ་ཚིག་ལ་མང་དུ་ཉོན། 18 འཐབ་མོའི་མཚོན་ཆ་ལས་ཤེས་རབ་ལེགས་མོད། འོན་ཀྱང་སྡིག་ཅན་གཅིག་གིས་དོན་བཟང་པོ་མང་ཙམ་སྟོངས་སུ་འཇུག་གོ །