1 དེ་བས་ན་ང་རང་ནི་ཆོས་ཚོགས་ཀྱི་རྒན་པོ༌དང༌། སྐྱབས་མགོན་མཱ་ཤི་ཀས་སྡུག་བསྔལ་མྱངས་པའི་དཔང་པོ། ཕྱིས་སུ་མངོན་པར་འགྱུར་བའི་གཟི་བརྗིད་ལ་ཞུགས་མཁན་བཅས་ཡིན༌ལ། བདག་གིས་ཁྱོད་ཅག་ཁྲོད་ཆོས་ཚོགས་ཀྱི་རྒན་པོ་དག་ལ་འདི་ལྟར་བསྐུལ་བར་བྱ་སྟེ། 2 ཁྱོད་རྣམས་ཀྱིས་ངེས་པར་ཁྱོད་ཅག་ཁྲོད་ཀྱི་དཀོན་མཆོག་གི་ལུག་ཁྱུ་འཚོ་སྐྱོང་བྱེད་པ་དང་། དཀོན་མཆོག་གི་ཐུགས་དགོངས་ལྟར་བདག་སྐྱོང་བྱེད་དགོས། དེ་ནི་རང་མོས་ཡིན་པ་ལས་བཙན་གྱིས་བྱེད་དུ་བཅུག་པ་ཞིག་མིན་ལ། རྒྱུ་ནོར་ལ་རྔམ་པའི་རྐྱེན་ཡང་མིན་ཏེ། 3 ལུག་ཁྱུའི་མིག་དཔེར་བྱེད་པ་ལས་ཁྱོད་ཅག་ལ་བཅོལ་བ་རྣམས་ལ་ཚོད་འཛིན་བྱེད་པའི་ཕྱིར་མ་ཡིན་ནོ།། 4 དེ་ནས་རྫི་བོ་ཆེན་པོ་མངོན་སུམ་དུ་ཕེབས་པའི་དུས་སུ། ནམ་ཡང་འཇིག་པ་མེད་པའི་གཟི་བརྗིད་ཀྱི་ཅོད་པན་ཁྱོད་ཅག་ལ་འཐོབ་པར་འགྱུར༌རོ།།

5 དེ་བཞིན་དུ། ཁྱོད་ཅག་ན་གཞོན་རྣམས་ཀྱིས་ཀྱང་ཆོས་ཚོགས་ཀྱི་རྒན་པོ་དག་གི་བཀའ་ལ་མཉན་དགོས༌ཤིང༌། ཁྱོད་ཅག་ཐམས་ཅད་ཀྱིས་ཀྱང་ཁེངས་སྐྱུང་གི་སེམས་པ་གོས་བཞིན་གྱོན་ནས་ཕན་ཚུན་ལ་བསྟུན་དགོས་སོ།། དེ་ལ་ཇི་སྐད༌དུ།

6 དེའི་ཕྱིར། ཁྱོད་ཅག་གིས་དམན་སེམས་བཅངས་ཏེ་དཀོན་མཆོག་གི་མཐུ་སྟོབས་ཆེ་བའི་ཕྱག་འོག་ཏུ་སྡོད་དགོས་ཤིང་། དུས་ལ་བབས་པ་ན། ཁོང་གིས་ཁྱོད་རྣམས་མཐོན་པོར་བསྒྲེང་ངེས༌སོ།། 7 ཁྱོད་ཅག་གིས་རང་གི་སེམས་ཁུར་མཐའ་དག་དཀོན་མཆོག་ལ་བཅོལ་དགོས་ཏེ། རྒྱུ་མཚན་ནི་ཁོང་གིས་ཁྱོད་རྣམས་ལ་གཟིགས་སྐྱོང་མཛད་པས༌སོ།།

8 ཁྱོད་རྣམས་ཀྱིས་གཟབ་ནན་ངང་ནས་རང་ཉིད་བསྲུངས་ཏེ་དོགས་ཟོན་བྱ་དགོས་སོ།། ཁྱོད་ཅག་གི་དགྲ་ཟླ་སྟེ་བདུད་ནི་ངར་སྐད་སྒྲོག་པའི་སེང་གེ་དང་མཚུངས༌པར། ཡུལ་ཕྱོགས་ཀུན་ཏུ་རྒྱུ་ཞིང་ཁྱུར་མིད་གཏོང་འདོད་པའི་མི་རྣམས་འཚོལ་བཞིན་ཡོད། 9 ཁྱོད་རྣམས་ཀྱིས་དད་སེམས་བརྟན་པོས་དེ་ལ་འགོག་རྒོལ་བྱ་དགོས་ཏེ། འཇིག་རྟེན་དུ་ཡོད་པའི་བདག་ཅག་གི་སྤུན་ཟླ་རྣམས་ཀྱིས་ཀྱང་སྡུག་བསྔལ་འདི་ལྟ་བུ་མྱོང་བཞིན་པ་ཁྱོད་ཅག་གིས་ཤེས་པས༌སོ།།

10 སྐྱབས་མགོན་མཱ་ཤི་ཀའི་ནང་དུ་ཁྱོད་ཅག་ལ་ཞལ་འབོད་གནང་མཁན་དང༌། ཁྱོད་ཅག་ལ་མཐའ་མེད་པའི་གཟི་བརྗིད་ཉམས་སུ་མྱོང་དུ་འཇུག་མཁན་དང་། ཐུགས་རྗེ་ཆེན་པོ་གནང་མཁན་དཀོན་མཆོག་གིས། གནས་སྐབས་སུ་ཁྱོད་རྣམས་ཀྱིས་སྡུག་བསྔལ་མྱངས༌རྗེས། ཁོང་ཉིད་ཀྱིས་དངོས་སུ་ཁྱོད་རྣམས་ཡོངས་སུ་རྫོགས་པར་མཛད༌ཅིང༌། བརྟན་པོར་མཛད་དེ་སྟོབས་ཤུགས་གནང་བ་དང་། གཡོ་བ་མེད་པར་མཛད་ངེས་སོ།། 11 མངའ་ཐང་ནམ་ཡང་ཁོང་ལ་དབང་བར་སྨོན། ཨ༌མེན།

12 བདག་གིས་འཕྲིན་ཡིག་མདོར་བསྡུས་འདི་བྲིས་ཏེ། ངས་ཡིད་རྟོན་རུང་བར་འདོད་པའི་སྤུན་ཟླ་སིལ་ཝ་ནཱ་བརྒྱུད་ནས་ཁྱོད་ཅག་ལ་སྤྲོད་པར་བྱས་ཤིང༌། ངས་ཁྱོད་རྣམས་ལ་སྐུལ་སློང་བྱེད་པར་མ་ཟད། ཐུགས་རྗེ་འདི་ནི་དཀོན་མཆོག་གི་ཐུགས་རྗེ་དངོས་ཡིན་པར་བདེན་དཔང་བྱས་པ་ཡིན། ཁྱོད་ཅག་ནི་ངེས་པར་ཐུགས་རྗེ་འདིའི་ནང་དུ་བརྟན་པོར་ལངས་ནས་སྡོད་དགོས༌སོ།།

13 དཀོན་མཆོག་གིས་པཱ་པེལ་ལོན་གྱི་ཆོས་ཚོགས་ནི་ཁྱོད་ཅག་དང་མཉམ་དུ་བདམས་པ་ཡིན་ལ། ད་ལྟ་ཁོ་རྣམས་ཀྱིས་ཀྱང་ཁྱོད་རྣམས་ལ་འཚམས་འདྲི་ཞུའོ།། བདག་གི་བུ་བཞིན་དུ་གྱུར་པ་མཱར་ཀུས་ཀྱང་ཁྱོད་ཅག་ལ་འཚམས་འདྲི༌ཞུའོ།། 14 ཁྱོད་རྣམས་ཀྱིས་ཕན་ཚུན་ལ་བྱམས་པའི་འོ་དང་བཅས་འཚམས་འདྲི་ཞུ་བར་བྱའོ།། སྐྱབས་མགོན་མཱ་ཤི་ཀའི་ནང་དུ་གནས་པ་ཁྱོད་ཅག་ཐམས་ཅད་ལ་ཞི་བདེ་འཐོབ་པར༌སྨོན།། །།