1 ’Xib jap baꞌ moo mu jaꞌk jup tu uaꞌñxidhaꞌ guñ chujuandam tuk na mu jaꞌk jup tu juan jiñ aꞌmkam na paiꞌ Sardiis tɨ tɨɨꞌ ja bui guiꞌ nam bañ kaichuꞌ. Jaꞌp jap tɨɨdaꞌ: “Jaꞌpni kaiꞌch guiꞌ na ja daaꞌ xijum gook gu chiichiaꞌ gio gux xijum gook jix dhuuduꞌ kam jix uꞌuañ iꞌiiꞌmdaꞌ, nap sap baꞌ miꞌ dhɨr ja aagiꞌñdhaꞌ guiꞌ nam ba kaichuꞌ: Jix bhaiꞌx maat iñ na pim jax jaꞌk tu dudua mu jaꞌp na pim paiꞌ oiꞌdhaꞌ. Cham tuꞌ miꞌ puiꞌ jiim japim nañ jax jix aaꞌ, puiꞌ xi kaiꞌchɨt japim na pim tɨ jɨɨgiꞌñ buiñor gu Dios, guꞌ paa gi tuꞌ kaꞌm jup nɨiꞌñ japim puiꞌ xi kaiꞌchɨt. Baꞌ dhiꞌ ka daasaim na paiꞌ dhuuk jam tulhiiñchudaꞌ. 2 Ku baꞌ guꞌ noꞌ pimɨt moo soiꞌm ɨlh pu xib na kapbhaiꞌ xiaꞌlhidhat kapup tu maaxilhim, cham tuꞌ jam tulhiiñchudaꞌ ji. Jix ioꞌm japim miꞌ puiꞌ xi jimiaꞌ na jax jaꞌk jix aaꞌ, cham tuꞌ palhɨɨp pɨx na pim jax tuiꞌdhiꞌ xib. Alhiꞌch pɨx ba aaꞌ guꞌ na ba jam tulhiiñchudaꞌ gu Dios noꞌ pimɨt chakui soiꞌm ɨlh, baꞌ dhiꞌ jaꞌp ji buusniaꞌ na jam koodaꞌ, na guꞌ cham tuꞌ kɨɨꞌ kaꞌm nɨiꞌñ gu puiꞌ na pim jax jaꞌk tu jim. 3 Siamri pim moo miꞌ puiꞌ xi jimɨi na jɨꞌk jax jix aaꞌ gu Dios, jaꞌp na pim jax jaꞌk tuiꞌñgɨt moo janoꞌ na pimɨt jax tɨ jɨɨꞌñ aañ jiñ bui na pim joidham bɨɨx jam jujur kɨꞌn tuꞌ kaꞌm jiñ ñɨidhat. Soiꞌ pim bam ɨlhdhaꞌ ɨp gio, chaꞌpim kooksɨt darkaꞌ. Na guꞌ noꞌ pim aapiꞌm cham tuꞌp jum buixdhat am ɨrdat oipo, cham tuꞌ jam baidhikaꞌ iñ bhammɨ jaꞌk nat paiꞌ tu jam iimchuda gu Dios na saak jam aichdhaꞌ, nañ guꞌ aañ jotmodaꞌ pɨx miꞌ pɨx ba kɨɨkaꞌ cham jum ɨlhdham nañ paiꞌ dhuuk mu jimdaꞌ. Pu cham jaroiꞌ mat kaꞌ na paiꞌ dhuuk, jaꞌp na jax baꞌ gu jax chuꞌm jix ɨxkum paiꞌ noꞌt ba tu oꞌbhaiꞌ jax chuꞌm baꞌk chɨr na tɨ ɨɨxdhaꞌ, na guꞌ cham tuꞌ na mu paiꞌp ja aagiꞌñdhaꞌ gu mi oiꞌñkam, miꞌ pɨx ba bakiaꞌ. Puꞌñi ɨp baꞌ aañ nañ paiꞌ dhuuk mu jim. 4 Dai baꞌ guiꞌ nam jɨꞌk jiñ ñɨɨr jañ xi ja baidhai, puiꞌ na jax guiꞌ nam jɨꞌk miꞌ puiꞌ jiim na jax jix aaꞌ gu Dios miꞌ dhiꞌ Sardiis, nam cham paiꞌ dhuuk tuꞌ bhaan jum uaꞌtulhiꞌñ. Baꞌ gammɨjɨñ bɨɨm oipodaꞌ am bhammɨx dhaam joidham jix chooto ji chɨm tɨiꞌdhat. 5 Bɨɨx guiꞌ nam jɨꞌk miꞌ puiꞌ jimiaꞌ nañ jax jix aaꞌ, puꞌñi chuꞌm jañ tu ja tɨiꞌdhaꞌ joidham jix chooto, gio baꞌ nañ miꞌ xi ja daasaꞌ uꞌuan taꞌm nam jax chɨɨꞌ nañ paiꞌ ja daasaim guiꞌ nam jɨꞌk tuꞌ kaꞌm jiñ ñɨidhat miꞌ puiꞌ ba jiim nañ jax jix aaꞌ nañ baꞌ gatuuk pu sɨlh ja baidhikaꞌ bhammɨ jaꞌk jix dhaam nam paiꞌ gammɨjɨx jɨjɨkgɨm bap tuiꞌkaꞌ. Aañiꞌ pu tɨɨdaꞌ janoꞌ gu Dios ja kaixdhat bɨɨx gu noonbiꞌñ na ñich aañ bɨɨx tu ja uañ gu ja uaꞌtulhdharaꞌ guiꞌ nam jɨꞌk tuꞌ kaꞌm jiñ chɨgiaꞌ xib. 6 Baꞌ noꞌ jaroiꞌ tuꞌ sɨlhkam jix maachim gu ñioꞌkiꞌñ gu Dios, jum aaꞌ na mu jimɨi bɨɨx juraaꞌn kɨꞌn xi kɇɇkɇꞌ na jax tu aꞌgadaꞌ gux Dhuuduꞌ kam jix Uañ Iiꞌmdaꞌ mu jaꞌp chichiop nam paiꞌm jumpaꞌndaꞌ guiꞌ nam tɨ jɨɨgiꞌñ jiñ bui nam tu daandaꞌ buiñor gu Dios.”

7 ’Xib jap baꞌ moo mu jaꞌk jup tu uaꞌñxidhaꞌ guñ chujuandam tuk na mu jaꞌk tu juan jiñ aꞌmkam na paiꞌ Piladelpia tɨ tɨɨꞌ ja bui guiꞌ nam ba tɨ jɨɨgiꞌñ aañ jiñ bui. Jaꞌpnip mu tu uaꞌñxidhaꞌ: “Guiꞌ nar Maraaꞌn gu Dios, na joidham jix uañ kɨꞌn kɨɨk gio nax ioꞌm jir gɇꞌkam, cham tuꞌ puiꞌ na jɨꞌx jir gɇꞌkam kat gu Dabii, gam na cham jɨꞌxdhaꞌ jaroiꞌ sooꞌmchulhdhaꞌ noꞌ tuꞌ jax jix dhuñiim, puiꞌ tu kuugalhdhaꞌ. Jaꞌpni kaiꞌch nap sap baꞌ miꞌ dhɨr ja aagiꞌñdhaꞌ guiꞌ nam ba kaichuꞌ: 8 Jix bhaiꞌx maat iñ na pim jax jaꞌk tu dudua ɨp aapiꞌm. Jix bhaiꞌ miꞌ puiꞌ jiim japim nañ jax jix aaꞌ cham tuꞌ bhaan jax jim aagɨt, sia ku pim jum tulhiiñ bɨxchuꞌ bhaan. Baꞌ aañ puiꞌ ɨlhiiꞌñ nañ jix ioꞌm gɇꞌkam kɨꞌn jam aꞌm ba tɨ nɨidhidhaꞌ yaꞌ dɨr jaꞌp jaꞌk, cham jɨꞌxdhaꞌ jaroiꞌñ sooꞌmchulhdhaꞌ nañ jɨꞌx gɇꞌkam kɨꞌn xi jam joiꞌgɨꞌn, dai ji noꞌ pim jix biiñak pɨx aañ jiñ bui. 9 Aañ puiꞌ jaꞌk tu duñiaꞌ nam xi jam ɨɨbhidhai tuꞌ kaꞌm jam tɨgiaꞌ bɨɨx guiꞌ nam kaichuꞌ gu jaꞌook, guiꞌ nam puiꞌm aaꞌ na gɇꞌkam kɨꞌn ja aꞌm tɨ nɨidhim gu Dios nam jir Israel kam, nam baꞌ machiaꞌ nañ aapiꞌm xi jam joiꞌndat jam aꞌm tɨ nɨidhim, nam guꞌ guiꞌ cham tuꞌ miꞌ puiꞌ jiim nañ jax jix aaꞌ, dai na jax jaꞌk ja tɨɨdaim pɨx gu jaꞌook. 10 Aapiꞌm ji na pim baꞌ bɨɨx jam jujur kɨꞌn tuꞌ kaꞌm jiñ ñɨidhat jix biiñak jiñ bui, tɨɨꞌ na pim gammɨjɨ miꞌ puiꞌ jiim nañ jax jix aaꞌ. Baꞌ aañ xi jam joiꞌndat jam aꞌm tɨ nɨidhidhat jam palhbuiꞌñchuꞌndaꞌ na paiꞌ dhuuk bhaiꞌ ja daam ji jimiaꞌ gu tulhiiñaraꞌ bɨɨx gu jaꞌtkam na jɨꞌx oiꞌñgaꞌn, na bhaan pɨx matgilhiaꞌ nam jɨꞌk moo tuꞌ sɨlhkam jix biiñak kaꞌ aañ jiñ bui, gio na jɨꞌk cham. Aapiꞌm jañ baꞌ dai jam palhbuidhaꞌ, na pim guꞌ gammɨjɨx biiñak jiñ bui. 11 Baꞌm aaꞌ na pim puꞌñi gammɨjɨ tɨ jɨɨꞌñdhat jix biiñak kaꞌ aañ jiñ bui na baꞌ jam aꞌm tu biꞌyaꞌ gu gɇꞌgɇr jup tum duuꞌnkam janoꞌ nañ paiꞌ dhuuk jam baidhikaꞌ bhammɨ jaꞌk jix dhaam. Na guꞌ noꞌ pim am ɨr, jumai bhaan biꞌyaꞌ. Bar miaꞌn guꞌ nañ paiꞌ dhuuk mu jim nañ mu ja baiꞌñmɨraꞌ jɨꞌk nam jiñ ñɨɨra. 12 Baꞌ guiꞌ nam puꞌñi miꞌ puiꞌ jimiaꞌ nañ jax jix aaꞌ, gɇꞌgɇrkam kɨꞌn ja darsaꞌ iñ bhammɨx dhaam, jaꞌp ji buusniaꞌ nam guiꞌ bhaiꞌ siisap kaꞌ gu chiop gaꞌn gu Dios. Gammɨjɨ bhaiꞌ pu bap tuiꞌkaꞌ am, cham tuꞌ jɨꞌx juugɨt. Ja aꞌm uaꞌnaꞌ iñ na jax chɨɨꞌ gu Dios gio na jax tɨ tɨɨꞌ bhaiꞌ na paiꞌ dhɨr naiꞌr gɇꞌkam, nax ioꞌm gɇꞌr kiicham, na xibkam Jerusaleen jup tɨ tɨɨꞌ, gio baꞌ nañ jax jup ba tɨɨꞌkaꞌ ɨp aañ miꞌ dhɨr jaꞌp jaꞌk. 13 Baꞌ noꞌ jaroiꞌ tuꞌ sɨlhkam jix maachim gu ñioꞌkiꞌñ gu Dios, jum aaꞌ na bɨɨx juraaꞌn kɨꞌn xi kɇɇkɇꞌ na jax tu aꞌgadaꞌ gux Dhuuduꞌ kam jix Uañ Iiꞌmdaꞌ mu jaꞌp chichiop nam paiꞌm jumpaꞌndaꞌ guiꞌ nam ba tɨ jɨɨgiꞌñ aañ jiñ bui nam tu daandaꞌ buiñor gu Dios.”

14 ’Xib jap baꞌ mu jaꞌk jup tu uaꞌñxidhaꞌ gu jumaiñ chujuandam tuk na mummu jaꞌk tu juan jiñ aꞌmkam na paiꞌ Laodiisia tɨ tɨɨꞌ ja bui guiꞌ nam jiñ bui tɨ jɨɨgiꞌñ. Jaꞌpnip miꞌ tu daasaꞌ bhaan gu uꞌuan nap mu joochxidhaꞌ: “Guiꞌ nat jup duu dhi oiꞌñgaꞌn bɨɨmaꞌn gu Dios gio na jɨꞌk tuꞌx chu jaiꞌch, na joidham jix uañ kɨꞌn kɨɨk, gam na puiꞌ tu kuugalhdhaꞌ jax noꞌt ba tɨi, jaꞌpni kaiꞌch nap sap baꞌ miꞌ dhɨr ja aagiꞌñdhaꞌ guiꞌ nam ba kaichuꞌ: 15 Jix bhaiꞌx maat iñ na pim jɨꞌk tuꞌ jax buaꞌt tu dudua mu jaꞌp na pim paiꞌ oiꞌdhaꞌ. Jix maat iñ ɨp na pim cham tuꞌ bɨɨx jam jujur kɨꞌn tuꞌ kaꞌm jiñ ñɨidhat jix biiñak aañ jiñ bui. Cham tuꞌx bhaiꞌ miꞌ puiꞌ jiim japim nañ jax jix aaꞌ, palhɨɨp pɨx. Jaꞌp pɨx ji buan japim na jax gu suudaiꞌ noꞌx juuk pɨx, na cham tuꞌx ioꞌm jix choiñ kaꞌ piam na cham ioꞌm jix jɨɨpiꞌñ kaꞌ. Baꞌ aañ jiñ bui cham tuꞌr am gu puiꞌ na pim jax tuiꞌdhiꞌ, jaꞌpji noꞌ pim jix aaꞌ na pim jiñ kaichgɨdaꞌ, bɨɨx jam jujur kɨꞌn ɨp na pim tuꞌ kaꞌm jiñ ñɨidhat miꞌ puiꞌ jiimdaꞌ nañ jax jix aaꞌ, cham tuꞌ palhɨɨp pɨx. Piam noꞌ pim jup jix ooꞌn na pim tuꞌ kaꞌm jiñ ñɨiꞌñdhaꞌ, chaꞌpim puiꞌ kaiꞌchdhaꞌ na pim jiñ kaichuꞌ. 16 Guꞌ baꞌ gu xib na tuꞌ jax tuiꞌkaꞌ, cham tuꞌñ jam aꞌm tɨ nɨidhidhaꞌ, na pim guꞌ cham tuꞌ bɨɨx jam jujur kɨꞌn tuꞌ kaꞌm jiñ ñɨidhat miꞌ puiꞌ jiim nañ jax jix aaꞌ, sia ku pim guꞌ puiꞌ kaiꞌch na pim jiñ kaichuꞌ. Jaꞌp ji buusniaꞌ nañ jam biñboꞌ yaꞌ dɨr jiñ chiñ am, na pim guꞌ puiꞌ pɨx ji buan na jax gu suudaiꞌ noꞌx juuk na pu cham iꞌoob noꞌñ tɨi xi ioꞌ. 17 Puiꞌ kaiꞌchdhaꞌ pim guꞌ na pim jir jix chutumñigam, na pim saak bɨɨx tu biaꞌ na tuꞌ jam aꞌm jum aaꞌ jam iꞌiiꞌmdaꞌ bhaan gio gu maaxik bhaan, gam na saak gammɨjɨx bhaiꞌ tu jam jim, gio na bɨɨx jix bhaiꞌ ji chu buusnidhaꞌ gu tuꞌ na pim jax buadaꞌ. Guꞌ aañ jiñ bui, paa gip jir jix chutumñigam japim. Cham tuꞌ bɨɨx tu biaꞌ pim na tuꞌ jam aꞌm jum aaꞌ. Jaꞌpni pɨx ji buan japim na jax guiꞌ nam alh gampaiꞌ tuꞌiiꞌ, nam cham jir tu biaꞌ kam. Jaꞌp ji buusan ɨp na pim puiꞌx dhaꞌnpakat oipo, gio na pim cham ñiññia, sia ku pim guꞌ aapiꞌm puiꞌ kaiꞌch na pim jir jix chutumñigam, puiꞌ ku pim baꞌ cham Dios ka tɨꞌñcho. 18 Paa gip jir puiꞌ na pim jax jum aaꞌ. Cham tuꞌ biaꞌ pim guiꞌ nax ioꞌm jix dhaꞌram namɨɨk. Noꞌ pim jix aaꞌ na pim biaꞌkaꞌ dhiꞌ nax ioꞌm jix dhaꞌram namɨɨk, jum aaꞌ na pim aañ jiñ chañiaꞌ, na baꞌ dhiꞌ kɨꞌn puiꞌ bam kaiꞌchdhaꞌ na pim jir jix chutumñigam. Daipuꞌ aañ biaꞌ jia dhiꞌ jɨꞌ nax ioꞌm jix dhaꞌram namɨɨk. Baꞌ noꞌ pimɨt jiñ chaa, cham tuꞌx dhaꞌnpakat ka oipodaꞌ pim gu jam iꞌiiꞌmdaꞌ bhaan, jaꞌp ji buusniaꞌ guꞌ na pim ba tɨm tɨiꞌdhaꞌ joidham jix chooto gu jajannulh, gio na pim ba tum juulhiaꞌ guiꞌ na duduaꞌñdhaꞌ gu jam buupui na pim cham ñiññiaꞌ. 19 Jaꞌp jañ dho kaiꞌñkam jup jam tɨtda, na pim soiꞌm ɨlhdhai miꞌ puiꞌ ba jimiaꞌ nañ jax jix aaꞌ, chaꞌpim kam uaꞌtulhiꞌñdhaꞌ. Piam ku guꞌ cham, jam tulhiiñchudaꞌ iñ na pim jɨꞌx pɨx juugɨt soiꞌm ɨlhdhaꞌ aañ jiñ bui, nañ guꞌ tɨi xi jam joiꞌgɨꞌn. Puꞌñi jaꞌk jañ ja buaꞌt ja sɨlhkaꞌn jia guiꞌ nañ jɨꞌk jix ja daꞌ. 20 Tɨix aaꞌ iñ nañ bɨɨx jam aꞌm jup tuiꞌñgɨdaꞌ gɨt, jaꞌp ji buusan nañ miꞌ dhɨr kiꞌñgob kɨɨkat mu tu son na pim paiꞌ jax chu oiꞌdhaꞌ. Baꞌ noꞌt jaroiꞌ maadɨt jiñ kupioꞌkdhak jiñ chia nañ mu bakiaꞌ ɨrban dɨr, muiꞌñ dhop ji bakiaꞌ cham jax ji chɨꞌji, baꞌ miꞌ dhɨr dai nach maap daraibui ba tu jugiaꞌ. Puꞌñi jaꞌk jum aaꞌ na duñiaꞌ gu jaroiꞌ noꞌx aaꞌ nañ bhaan jup tuiꞌñgɨdaꞌ. 21 Guꞌ baꞌ gu jɨꞌk nam jiñ buix biiñak kat miꞌ puiꞌ tu kuugalhdhim nañ jɨꞌk jax jix aaꞌ cham tuꞌ bhaan jax jim aagɨt sia tuꞌ ba ji ja duu, aañ gɇꞌgɇrkam kɨꞌn ja darsaꞌ yaꞌ nañ paiꞌ Gɇꞌkam kɨꞌn ba daa sonpan gu Dios, nam jaiꞌñ aꞌmkam ja sɨlhkaꞌndaꞌ gu jaꞌtkam. 22 Guꞌ baꞌ noꞌ jaroiꞌx bhaiꞌx maachim gux bhaiꞌm kaiꞌchdham ñioꞌkiꞌñ gu Dios, jum aaꞌ na mu jimɨi bɨɨx juraaꞌn kɨꞌn xi kɇɇkɇꞌ na jax tu aꞌgadaꞌ gux Dhuuduꞌ kam jix Uañ Iiꞌmdaꞌ mu jaꞌp chichiop nam paiꞌm jumpadat tu daandaꞌ buiñor gu Dios guiꞌ nam jɨꞌk ba tɨ jɨɨgiꞌñ aañ jiñ bui.”