KORINTIAN
vdwa Paul gv Siti Jichonam
Mintamchonam
Paul gv Korintian vdwa lvkchonam siti si ninyigv Korinth lo mvlin rilin kunam Gvrja gv mvngjwngnv vdwv Kristan singdung okv mvngjwng gv lvkwng nga adwkaku minsu nama mindar vngdar jinam bv lvktoku. Vbvriri hoka Korinth si nvgwngnv nyi riku dakku kairungnv Grik gv pamtv gubv rito, Roman mooku lo Akaia distrik gv pamtv kairungnv gubv rito. So si korvpachu achialvbv pioknam dornam lo ripuripa namv, gwngnamsingnam gv ridungsingdung lo goosu namv, yoomurchomur gvnamv, okv nvgwngnv kumnamjonam mv yungnam gubv rito.
Apostol gv mindubv mvngdum jenam vdwv apinain nam, okv gvrja lo rimurdakmur nam, okv nyimv nyilo naami sunam gv lvkwng nga tvunam, nyi nyi gv mvngnamsaknam, gvrja gv ridung doodung, Darwknv Dow gv amin jinam, okv sinv vdwgv turkurkunam. So tvunam vdw sum Alvnv Yunying lokv oguaingbv minrwk supvdw vbvching hum nw dinchi okv rungrwngbv rila kaatamdo.
Mvrwmvpanam 13 nvlo, paknam rinam si Pwknvyarnv gv alvyachokbv ninyigv nyi vdwa amin jinam go vla kaatamnam si, so kitap so, mvnwng gv chimpa rungnam baagobv rido.
Arwng lokv darlinkunam
Mintamchonam (1:1-9)
Gvrja lo apinain nam(1:10-4:21)
Amarasa minsu kolo alv okv alvmanam okv vpin gv gwngdungsingdung (5:1-7:40)
Kristan okv kristan rimanv (8:1-11:1)
Gvrja gv singdung okv kumnamjonam (11:2-14:40)
Jisu Kristo gv turkurkunam okv mvngjwngnv vdwgv (15:1-58)
Judia Kristan vdwgv lvgabv morko horkum nam (16:1-4)
Atubogv lvgabv minam okv minyabv minkunam(16:5-24)
1
1 Pwknvyarnv gv mvngnambv, Kristo Jisu gvbv Apostol gubv goklin kunam Paul ngo gvlokv, okv ngonugv achiboru Sostenes gvlokv—
2 Nyim 18:1 Korinth lo doonv Pwknvyarnv gv gvrja nga, Pwknvyarnv gv darwk kunv gubv goklin kunam nyi mvnwngnga, yvvbunudw Jisu Kristonyi akin gubv rilaku ninyi gvbv rikunv vdwa, okv ngonu gvla bunugv Ahtu bv rikunv Jisu Kristonyi kumnvjonv mooku mvnwng gv nyi mvnwngnga mintala kumrwk sunama jidunv:
3 Ngonugv Abu Pwknvyarnv okv Ahtu Jisu Kristo nonu mvnwngnga aya okv sarsopoyo nga jigv yika.
Kristo gvlokv boktalwkjinam
4 Ngo alu gv dwkia ngoogv Pwknvyarnvnyi umbonyikv vdunv ogulvgavbolo Kristo Jisu gv lokv Nw nonua aya nga jinam lvgabv. 5 Kristonyi lvkobv akin kunam lvgalo nonu minamtamnam lo, chinampanam lo okv ogumvnwnglo nyitv nvgobv ridukunv. 6 Kristo gv lvkwngbv doin minammv, nonu gvlo alvrungbv haatinla hvngdwng dukunv 7 vkvlvgabv vbolo nonugv Ahtu Jisu Kristo gv kaatam kose nga toyala donammv bokta lwkji nama achuk guka ngemu mabv naarwkla ridukunv. 8 Nw nonua ataranya alu lobv haatin rungbv vvpv reku, Jisu Kristo gv Jwngkadakadw Alu lo nonua gungnying doomu manam lvgabv. 9 Ngonua ninyigv kuunyilo Jisu Kristo ngonugv Ahtunyi akin gubv ribamdakbam dukubv goknv Pwknvyarnvnyi mvngtin rungdubv ridu.
Gvrja lo mvngjwngnv vdwgv apinain kunam
10 Ngoogv achiboru vdwa, ngo nonu mvnwngnga ngonugv Ahtu Jisu Kristo gv jwkrw lokv dinchibv mindunv, nonugv aralo apinain maanam lvgabv nonu ogugo minje rijeka tolwktoak minsula baakin gubv mvngbam la ribamdobam laka. 11 Achiboru vdwa, Kloe gv vpin lokv nyi mego nga minpa toku nonugv aralo bumi sidu vla. 12 Nonunogv aku-aku subv minamv nga vbv mimubv: akonv mindu, “Ngo Paul gvbv ridunv”; kvvbi gunv mindu “Ngo Apollos gvbv ridunv”; kvvbi gunv mindu; “Ngo Pitar gvbv ridunv”; okv ako kvvbi gunv mindu, “Ngo Kristo gvbv ridunv.” 13 Kristo akin ha nonuno aku akusunv nyitwng gubv mvpin * kristonyi mvpin kunam hv; Megonv kitaplo dooduKristo mvpin nyomaremvin pvku laka! Paul nonunogv lvgabv daapo lo siji pvnvri? Nonuno Paul gv lvbwlaksu gubv ridubv ogolo baptisma naapvnv?
14 Nyim 18:8; Nyim 19:29; Rom 16:23Ngo Pwknvyarnvnyi umbonyikv vdunv ogulvgavbolo Krispas nyila Gayus bunyia mimabv ngo nonua yvvnyika baptisma jima. 15 Vbvrikunamv, ngoogv lvbwlaksu gubv baptisma naapvnv vla nonuno yvvka minyu mare. 16 1Kor 16:15 (Ho mvngpa mabvnyi, ngo Stepanas nyila ninyigv vpin ha baptisma jita pvnvmabv; vbvritola ngo kvvbi nga yvvnyika baptisma jinam go mvngpama.) 17 Kristo nga baptisma jinam lvgabv vngmuma. Nw nga Alvnv Yunying nga minji modubv vngmuto, okv hum nyia chinampanam gaam lokv minvnvmabv mintoka vbvrimabolo Kristo gv daapo lo sinam gv jwkrw v anyung kaamare vla.
Kristo Pwknvyarnv gv jwkrw okv mvngkimvnglak v
18 Jisu Kristo gv daapo lo sinam gv doinv nyekunv nyi vdwgv lvgabv si ogu anyung kaama; vbvritola ngonu turnv nyi vdwgv lvgabv si Pwknvyarnv gv jwkrw v. 19 Aij 29:14 Darwknv Kitaplo mindu,
“Ngo chinvpanv nyi vdwgv mvngkimvnglak a mvyakre
okv skular vdwgv chinggv nvnv ngaaka naa reku.”
20 Job 12:17; Aij 19:12; 33:18; Aij 44:25Vbvrikunamv chinvpanv nga vmalo skular a vmalo nyiamooku so gv minlakminku vdwa ogolo kayu pvku? Nyiamooku so gv mvngkimvnglak v pvcha nvngv vla pwknvyarnv kaatam toku!
21 Pwknvyarnv ninyigv chinampaanam mv nyi vdwa bunu atugv chinampaanam lokv ninyia chinla madubv mvpvku. Vmabvya nyiamooku nyi vdwgv pvcha gubv vnam doin a ngonu japji yadu, um yvvdw mvngjwng redw Pwknvyarnv ringdukubv minbwk toku. 22 Jius nyi vdwv rvbwngnam lvgabv lamrwpanam go makardu okv Grik nyi vdwv chinampanam ma makardu. 23 Ngonu gvbv, daapo lo sinv Kristo gv lvga doin nam mingo jidu, doin si Jius vdwa pamisunam gubv ridu okv Jentail nyi vdwgv lvgabv pvcha doin gubv ridu; 24 vbvritola Pwknvyarnv gv goklin kunam nyi vdw Jius jeka Jentail jeka anyi gv lvgabv si doin si Kristo, ninyi Pwknvyarnv gv jwkrw v okv Pwknvyarnv gv chinampanam mv. 25 Ogulvgavbolo vbvridu, Pwknvyarnv gv pvchayau ngv nyi tanyi gv chinampanam ma kaiyadunv, okv Pwknvyarnv gv abiktaik kv nyi tanyi gv ator a kaiyadunv.
26 Ngoogv achiboru vdwa vjak nonu mvngpa tvka, Pwknvyarnv gv nonua gokri ho nonuno ogunvbv rito. Nyi tanyi gv lokv kaabolo nyi meching gunv kvgonv nonuno chinvpanv gubv rito, vmalo jwkrw rwtv nvgobv rito vmalo nyitv nyigam nvgubv rito. 27 Pwknvyarnv chinjv lvtola chinvpanv vdwa hinying monam lvgabv pvcha yaunv nyi vdwa darpvkunv. Okv kainv vdwa hinying monam lvgabv ala kaakumanv nyi vdwa darpvkunv. 28 Nw nyiamooku soogv nyi tolatoakunam okv ogu arv kaama vla mvngnam vdwa dartoku, nyiamooku soogv alvnvgo vla mvngnam vdwa mvyakriyak dubv. 29 Svbvrinam si yvvka Pwknvyarnv gv kaakulo goosu manam lvgabv. 30 Vbvritola Pwknvyarnv nonua Kristo Jisu gvlo akin dukubv naalwk pvkunv, okv Pwknvyarnv Kristonyi ngonugv mvngkimvnglak gubv mvpvkunv. Ninyi gvlokv ngonu Pwknvyarnv gvlo rijwkdojwk yakulo aapv kunv; ngonu Pwknvyarnv gv darwknv nyi vdw gubv rilaku ajarabi bv ripvkunv. 31 Jer 9:24Vbvrikunamv, Darwknv Kitaplo vbv mindu, “Yvvdw goonvpv mvngdunv, Pwknvyarnv ogugo ripvdw ho lvkwnglo googing nvtoka.”