1 وٌ مَرِفِ عَلَتَلَ نَ قَ سِيٍ هَلَكِدٍ وٌ يَ رَ، عَ قَ عٍ شَ بْشِ سٌ وٌ يِ رَ، وٌ قَ سَبَتِ عٍ شَ تَايٍ نُن عٍ شَ بَنشِيٍ كُي، 2 وٌ شَ تَا سَشَن سُفَندِ نَ بْشِ تَفِ، وٌ مَرِفِ عَلَتَلَ نَشَن قِشِ وٌ مَ. 3 وٌ شَ بْشِ مَنِيَ، وٌ مَرِفِ عَلَتَلَ نَشَن قِشِ وٌ مَ كّ رَ، وٌ قَ عَ عِتَشُن دْشْ سَشَن. نَ نَن عَ تٌمَ قَشَتِ ندٍ نْمَ سِفَدٍ نَ تَا ندٍ كُي، عَلَكٌ عَ نِي شَ رَتَنفَ.

4 مِشِ نَشَن قَشّ تِشِ، عَ مُ عَ رَكٍلِشِ عَ مَ، نَ قَشَتِ مْولِ نَن فبَنسَن نْمَ سٌدٍ يِ تَا ندٍ كُي عَ نِي رَتَنفَقٍ رَ. 5 مِسَالِ نَن يَ؛ شَ مِشِ سِفَ قْتْنيِ وُرِ سّفّدٍ، عَ نُن عَ بٌورٍ، عَ شَ بٍيرَ قَ كٌرٍن، عَ دِن عَ بٌورٍ رَ، نَ قَ قَشَ، نَ قَشَتِ مْولِ تَن نْمَ سٌدٍ يِ تَا ندٍ كُي عَ نِي رَتَنفَقٍ رَ. 6 عَ شَ نَ رَبَ عَلَكٌ مِشِ نَشَن وَ مَ نَ قُرٍ فبٍحْشْقٍ عَ شَ بْحّتٍ كُي، عَ نَشَ نْ قَشّتِ لِدٍ كِرَ رَ، عَ قَ عَ قَشَ. نَ مُ لَنمَ، بَرِ مَ شْننَنتٍيَ يٌ مُ نُ نَ عَ بّ نَ مِشِ قَشَشِ شَ قٍ رَ. 7 ﭑ يِ يَامَرِ قِشِ وٌ مَ نَ نَن مَ. وٌ شَ تَا سَشَن سُفَندِ، نٍيٍ شَ قِندِ مِشِ رَتَنفَ تَايٍ رَ.

8 شَ وٌ مَرِفِ عَلَتَلَ وٌ شَ بْشِ رَفبٌ يّ عَلْ عَ رَكَلِ كِ نَشّ وٌ بَبَيٍ بّ، شَ عَ يِ بْشِ بِرِن سٌ وٌ يِ رَ عَ نَشَن لَايِدِشِ وٌ بَبَيٍ بّ، 9 شَ وٌ يِ يَامَرِ رَبَ عَ رَبَ كِ مَ ﭑ نَشَن قَلَشِ وٌ بّ تٌ لْشْي، وٌ مَرِفِ عَلَتَلَ نَشَ رَقَن وٌ مَ، وٌ نَشَ بِرَ عَ شَ كِرَ قْشْ رَ، نَ تّمُي وٌ مَن شَ تَا سَشَن سُفَندِ، وٌ شَ عٍ سَ يِ تَا سَشَنيِ بٌورٍ شُن مَ. 10 نَ كُي، مِشِ تْوحّفّشِ مُ قَشَمَ وٌ شَ بْشِ مَ، وٌ مَرِفِ عَلَتَلَ نَشَن قِشِ وٌ مَ كّ رَ.

11 كْنْ شَ مِشِ ندٍ عَ يَشُي شْن، عَ عَ مّلّن، عَ عَ قَشَ، عَ قَ سٌ يِ تَا ندٍ كُي، 12 نَ تَا قٌرِيٍ لَن نّ عٍ شَ عَ سُشُ، عٍ عَ شَنِن مِشِ شْن مَ نَشَن وَ مَ نَ قُرٍ فبٍحْشْقٍ، عَلَكٌ قَشّتِ شَ قَشَ. 13 وٌ نَشَ كِنِكِنِ يٌ تِ نَ كَنيِ مَ. وٌ نَ قَشَتِ مْولِ حْنمَ نَ كِ نّ عِسِرَيِلَ بْشِ مَ، عَلَكٌ بْحّسَ شَ لُ وٌ يِ رَ.

14 وٌ نَ سَبَتِ بْشِ مَ وٌ مَرِفِ عَلَتَلَ نَشَن قِشِ وٌ مَ كّ رَ، وٌ نَشَ نَانِنيِ تْنشُمَيٍ مَسِفَ دٍ وٌ بٍنبَيٍ نَشٍيٍ دْشْ. 15 مِشِ نَشَن يُنُبِ قٍ رَبَشِ، شَ نَ مُ عَ رَ هَاكّ، نَ كَنيِ مُ لَن عَ شَ مَكِيتِ مِشِ كٍرٍن شَ سٍيدٍ بَشِ مَ. نَ مْولِ مَكِيتِمَ سٍيدٍ قِرِن، شَ نَ مُ، سٍيدٍ سَشَن شُي نَن مَ.

16 شَ سٍيدٍ حَاشِ بَ ندٍ سَ مِشِ ندٍ تْوحّفّ قٍ ندٍ مَ، 17 يِ فٍرٍ مِشِ قِرِنيِيٍ لَن نّ عٍ شَ سِفَ عَلَتَلَ شَ هْرْ مْبَنشِ كُي، عٍ سَ عٍ شَ فَلَنبُي يَشَرَن سّرّشّدُبّيٍ نُن كِيتِسَيٍ بّ نَشٍيٍ نَ نَ وَشَتِ. 18 كِيتِسَيٍ عَ قٍ شْن نَقٍنمَ نّ عَ كِ نُن عَ كّحَ مَ. عٍ نَ عَ كٌلٌن سٍيدٍ وُلٍ نَن سَشِ عَ نفَشَكٍرٍنيِ شُن مَ، 19 عَ نفَشَكٍرٍنيِ نُ وَ مَ عَ مَكِيتِقٍ كِ نَشّ، وٌ شَ نَ كِيتِ رَفبِلٍن عَ مَ. وٌ قٍ حَاشِ حْنمَ وٌ تَفِ نَ كِ نّ. 20 مِشِ فبّتّيٍ نَ نَ قٍ مّ، فَاشُي نَن لُمَ عٍ مَ، عٍ مُ سُو سَمَ نَ قٍ كٌبِ مْولِ رَبَدٍ قَ. 21 وٌ نَشَ كِنِكِنِ نَ مِشِ مْولِ مَ. شَ عَ مِشِ نَن قَشَشِ، وٌ عَ قَن قَشَ. شَ عَ مِشِ يَ نَن كَنَشِ، وٌ عَ قَن يَ كَنَ. شَ عَ مِشِ حِنيِ نَن فِرَشِ، وٌ عَ قَن حِنيِ فِرَ. شَ عَ مِشِ بّلّشّ نَن بٌلٌنشِ، وٌ عَ قَن بّلّشّ بٌلٌن. شَ عَ مِشِ سَنيِ نَن بٌلٌنشِ، وٌ عَ قَن سَنيِ بٌلٌن.