1 نَ حّيٍ رَ، شٍسٍكِيَ نَشَ قُرَ عَ حَاشِ رَ. عَ فبٍ مُ نُ لُشِ عَ شَ قَشَ. عَمٌسُ شَ دِ عَننَبِ عٍسَيِ نَشَ سِفَ عَ يِرٍ، عَ عَ قَلَ عَ بّ، عَلَتَلَ يِ نَن مَسٍنشِ، «عِ شَ يَامَرِيٍ قِ عِ شَ مِشِيٍ مَ، بَرِ مَ عِ نَ قَشَقٍ نّ يِ كِ، عِ مُ كِسِمَ يِ قُرٍ مَ.» 2 شٍسٍكِيَ نَشَ عَ يَتَفِ مَقِندِ بَنشِ شَلّ مَ، عَ عَلَتَلَ مَشَندِ، عَ نَشّ، 3 «عَلَتَلَ، يَندِ هِننّ ﭑ نَ، عِ عَ كٌلٌن عَ ﭑ نَن حّرّشِ نّ كِرَ تِنشِنشِ شْن مَ ﭑ مَ دُنِحّءِفِرِ كُي ﭑ بْحّ قِيشّ رَ. ﭑ مُ عِ مَتَندِ، ﭑ مُ فبِلٍن عِ وَشْنقٍ قْشْ رَ.» شٍسٍكِيَ نَشَ وَ كِ قَنيِ رَ.

4 عَننَبِ عٍسَيِ مُ نُ فّشِ مِنِدٍ مَنفّ بَنشِ تّتّ كُي، عَلَتَلَ مَن نَشَ عَ مَسٍن عَ بّ، عَ نَشّ، 5 «فبِلٍن عِ شَ سَ عَ قَلَ ﭑ مَ حَمَ يَرٍرَتِ شٍسٍكِيَ بّ، عِ بٍنبَ دَوُدَ مَرِفِ عَلَتَلَ يِ نَن مَسٍنشِ، ‹ﭑ بَرَ عِ شَ مَشَندِ مّ، ﭑ بَرَ عِ يَيٍ تٌ. ﭑ عِ يَلَنمَ نّ، عَ شِ سَشَن ندٍ، عِ تٍمَ نّ عَلَتَلَ شَ بَنشِ. 6 ﭑ حّ قُ نُن سُولِ سَمَ نّ عِ شَ سِمَيَ شُن مَ. ﭑ عِ تَن نُن يِ تَا رَتَنفَمَ نّ عَسِرِيَ مَنفّ مَ. ﭑ يِ تَا مَكَنتَمَ نّ ﭑ مَ كٌنيِ دَوُدَ شَ قٍ رَ.›»

7 عَننَبِ عٍسَيِ نَشَ عَ قَلَ شٍسٍكِيَ شَ مِشِيٍ بّ، «وٌ شْرّ بٌفِ شَرَشِ ندٍ مْندْ، وٌ شَ عَ سَ عَ شَ قِ يَ عِ.» عٍ نَشَ نَ رَبَ، شٍسٍكِيَ نَشَ يَلَن. 8 شٍسٍكِيَ نُ بَرَ عَ قَلَ عَننَبِ عٍسَيِ بّ، «ﭑ عَ كٌلٌنمَ تْنشُمَ مُندُن مَ، عَ عَلَتَلَ ﭑ نَ يَلَنمَ نّ، ﭑ مَن قَ سِفَ عَ شَ بَنشِ عَ شِ سَشَن ندٍ مَ؟» 9 عَننَبِ عٍسَيِ نَشَ عَ يَابِ، «يِ نَن قِندِ مَ عَلَتَلَ شَ تْنشُمَ رَ عِ بّ، عَلَكٌ عِ شَ عَ كٌلٌن عَ عَلَتَلَ عَ شَ مَسٍنيِ رَكَمَلِمَ نّ. عِ وَ مَ سٌفٍ نِينِ شَ عَ مَفبِلٍن عَ شَنبِ شَنبِ مَ دْشْ قُ، كَ عَ شَ سِفَ عَ يَرٍ يَرٍ مَ دْشْ قُ؟» 10 شٍسٍكِيَ نَشَ عَ يَابِ، «سٌفٍ نِينِ لُمَ سِفَ رَ عَ يَرٍ يَرٍ نَن مَ. عِ شَ عَ نِيَ عَ شَ فبِلٍن عَ شَنبِ شَنبِ مَ.» 11 نَ تّمُي، عَننَبِ عٍسَيِ نَشَ عَلَ مَشَندِ عَ شَ نَ رَبَ. عَلَتَلَ نَشَ سٌفٍ نِينِ مَفبِلٍن عَ شَنبِ شَنبِ مَ دْشْ قُ. نَ سٌفٍ نِينِ نُ تِشِ عَشَسِ تٍدٍ نَن مَ.

12 نَ تّمُي بَبِلْن مَنفّ مٍرٌدَكِ بَلَدَن نَشَ بَتَاشّ نُن بُحَ رَ سَنبَ شٍسٍكِيَ مَ، بَرِ مَ عَ نُ بَرَ شٍسٍكِيَ قُرَقٍ مّ. 13 شٍسٍكِيَ نَشَ نَ شّيرَيٍ رَ سّنّ، عَ عَ شَ نَاقُلِ بِرِن مَسٍن عٍ بّ، عَلْ فبٍتِ، شّيمَ، سُرَيِ، لَبُندّ نُن تُرٍ شِرِ حْشُنمّ، عَ شَ فٍرٍ سٌسٍ رَفَتَدٍ نُن عَ شَ بَننَيَ بِرِن دّننَشّ. سٍسٍ مُ لُ، شٍسٍكِيَ مُ نَشَن مَسٍن عٍ بّ عَ شَ بَنشِ نُن عَ شَ بْشِ كُي. 14 نَ دَنفِ شَنبِ، عَننَبِ عٍسَيِ نَشَ قَ شٍسٍكِيَ يِرٍ، عَ عَ مَشْرِن، «نَ مِشِيٍ مُنسٍ قَلَشِ عِ بّ؟ عٍ كٍلِشِ مِندٍن؟» شٍسٍكِيَ نَشَ عَ يَابِ، «عٍ كٍلِشِ بْشِ مَكُيٍ ندٍ نّ، دّننَشّ شِلِ بَبِلْن.» 15 عٍسَيِ مَن نَشَ عَ مَشْرِن، «عٍ مُنسٍ مَتٌشِ عِ شَ بَنشِ كُي؟» شٍسٍكِيَ نَشَ عَ يَابِ، «سٍ نَشَن بِرِن نَ ﭑ مَ بَنشِ كُي. سٍسٍ مُ لُشِ ﭑ شْنيِ ﭑ مُ نَشَن مَسٍنشِ عٍ بّ.»

16 نَ كُي، عَننَبِ عٍسَيِ نَشَ عَ قَلَ شٍسٍكِيَ بّ، «عِ تُلِ مَتِ عَلَتَلَ شَ مَسٍنيِ رَ، 17 ‹لْشْي نَ قَقٍ، يِ مِشِيٍ قَمَ عِ هَرِفٍ بِرِن شَنِندٍ بَبِلْن، عِ بٍنبَيٍ نَشَن لُشِ عِ يِ رَ. عَلَتَلَ شَ مَسٍنيِ نَن نَ كِ. 18 عٍ قَمَ عِ شَ دِيٍ سُشُدٍ، عِ نَشٍيٍ بَرِشِ، عٍ عٍ بَنَ بَبِلْن مَنفّ بّ.›» 19 شٍسٍكِيَ نَشَ عَ قَلَ عٍسَيِ بّ، «عَلَتَلَ شَ مَسٍنيِ عِ نَشَن تِشِ، عَ قَن.» عَ نَ قَلَ نّ بَرِ مَ عَ نَشّ، «بْحّسَ نُن كَنتَرِ تَن لُمَ نّ بٍ، ﭑ مَ سِمَيَ بِرِن كُي.»

20 شٍسٍكِيَ شَ تَرُشُي دْنشْي نُن عَ شَ وَلِ قَنيِيٍ عَ نَشٍيٍ رَبَ، عَلْ يٍ سَسٍ يَءِلَنقٍ نُن يٍ كِرَ رَبْوقٍ سٌقٍ رَ تَا كُي، نَ سّبّشِ يُدَيَ مَنفّيٍ شَ تَرُشُي كُي. 21 شٍسٍكِيَ نَشَ لَاشِرَ، عٍ عَ بّلّ عَ بٍنبَيٍ قّ مَ. عَ شَ دِ مَنَسِ نَشَ تِ مَنفّ رَ عَ حْشْي رَ.