1 سَمُوٍلِ تٌ لَاشِرَ، عِسِرَيِلَ بِرِن نَشَ مَلَن عَ شَ حْنقٍ مَ، عٍ شَ عَ رَفَتَ عَ شْنيِ رَ مَ. نَ تّمُي دَوُدَ نَشَ فٌرٌ ثَرَن فبٍنفبٍرٍنيِ مَ. 2 كُنتِفِ ندٍ نُ نَ مَيٌن، نَشَن مَ يّشّ وُلُ سَشَن نُن سِ وُلُ كٍرٍن نُ نَ كَرٍ مٍلٍ. عَ نُ سِفَشِ عَ شَ نَ يّشّييٍ شَبٍ مَبِدٍ. 3 نَ شّمّ نُ شِلِ نّ نَبَلِ، عَ شَ فِنّ شِلِ عَبِفَيِلِ. فِنّ شَشِلِمَ نَن نُ عَ رَ، نَشَن تٌقَن كِ قَنيِ. كْنْ عَ شَ مْرِ شَشِلِ نُ شْرْشْ، عَ نُ لُمَ قٍ حَاشِ رَبَ رَ. كَلٍبِ بْنسْي نَن عَ رَ.

4 دَوُدَ نَشَ عَ مّ فبٍنفبٍرٍنيِ مَ عَ نَبَلِ نَ عَ شَ يّشّييٍ شَبٍ مَبِقٍ. 5 عَ نَشَ عَ شَ مِشِ قُ شّي، عَ قَلَقٍ رَ، «وٌ سِفَ نَبَلِ يِرٍ، وٌ شَ عَ شّيبُ ﭑ بّ. وٌ شَ يِ مَسٍنيِ تِ ﭑ شِلِ رَ، وٌ نَشّ، 6 ‹عَلَ شَ قٍ بِرِن سْونّيَ عِ بّ، عِ تَن نُن عِ شَ دٍنبَيَ. 7 مُشُ عَ مّشِ نّ، عَ عِ شَ وَلِكّيٍ نَ عِ شَ يّشّييٍ شَبٍ شَبَقٍ. كَبِ عِ شَ شُرُ سٍ كَنتّيٍ قَشِ كَرٍ مٍلٍ، مُشُ نُ نَ عٍ قْشْ رَ بْحّسَ كُي. سٍسٍ مُ بَشِ عٍ يِ رَ نَ وَشَتِ بُن مَ. 8 عِ شَ عِ شَ مِشِيٍ مَشْرِن شَ نْندِ نَ عَ رَ. نَ كُي عِ شَ هِننّ ﭑ مَ مِشِيٍ رَ يِ شُلُن لْشْي. عِ شَ مُشُ كِ عِ نْمَ نَشَن نَ، بَرِ مَ مُشُ قِندِشِ عِ شَ كٌنيِيٍ نَن نَ، نَشٍيٍ بِرَ مَ عِ شَ دِ دَوُدَ قْشْ رَ.›»

9 دَوُدَ شَ شّيرَيٍ تٌ سٌ نَا، عٍ نَشَ عَ شَ شّيرَيَ عِبَ نَبَلِ بّ عَ شِلِ رَ، عٍ مُ سٍسٍ سَ نَ قَرِ. 10 نَبَلِ نَشَ شّيرَيٍ يَابِ، عَ نَشّ، «ندٍ نَ دَوُدَ رَ، ندٍ نَ يِسَيِ شَ دِ رَ؟ كٌنيِ فبٍفبٍ نَ نَ تٌ، نَشٍيٍ عٍ فِمَ عٍ مَرِفِ مَ. 11 وٌ وَشِ نّ ﭑ شَ ﭑ مَ تَامِ نُن ﭑ مَ سُبٍ تٌنفٌ، ﭑ نَشٍيٍ قٍنشِ ﭑ مَ وَلِكّيٍ بّ، ﭑ شَ نَ سٌ مِشِيٍ يِ رَ ﭑ مُ نَشٍيٍ كٍلِدٍ يَتِ كٌلٌن؟»

12 دَوُدَ شَ شّيرَيٍ نَشَ فبِلٍن. عٍ تٌ سٌ، عٍ نَشَ نَ بِرِن دّنتّفّ. 13 دَوُدَ نَشَ عَ قَلَ عَ شَ سْورِيٍ بّ، عَ نَشّ، «وٌ شَ وٌ شَ سَنتِدّفّمَ شِرِ وٌ تَفِ.» عٍ نَشَ نَ رَبَ. دَوُدَ قَن نَشَ عَ شَ سَنتِدّفّمَ تٌنفٌ، عَ عَ شِرِ عَ تَفِ. مِشِ كّمّ نَانِ حْندْن نَشَ بِرَ عَ قْشْ رَ، مِشِ كّمّ قِرِن نَشَ لُ كٌتٍيٍ سَن نَ.

14 نَبَلِ شَ وَلِكّ ندٍ نَشَ سَ نَ قٍ يَبَ عَ شَ فِنّ عَبِفَيِلِ بّ، عَ نَشّ، «دَوُدَ بَرَ شّيرَيٍ شّي وٌن مَرِفِ مَ كٍلِ فبٍنفبٍرٍنيِ مَ، عٍ شَ عَ شّيبُ، كْنْ عَ مُ عٍ رَ سّنّشِ عَ قَنيِ رَ قٍوٌ. 15 كَبِ مُشُ نَ بُرُنيِ، نَ مِشِيٍ قٍ قَنيِ نَن نَبَ مُشُ بّ. عٍ مُ مُشُ تْورْ، عٍ مُ سٍسٍ بَ مُشُ يِ. 16 عٍ بَرَ مُشُ كَنتَ كْي نُن يَنيِ مُشُ شَ شُرُ سٍ دّمَدٌنيِ وَلِ كُي. 17 عِ شَ عَ مَتٌ عِ نْمَ نَشَن نَبَدٍ، شَ نَ مُ عَ رَ وٌن مَرِفِ نُن عَ شَ دٍنبَيَ قَمَ قٍ حَاشِ سْتْدٍ. عِ شَ مْرِ شَشِلِ شْرْشْ، عَ مُ مِشِ يٌ شَ مَرَ سِ مّمَ.»

18 عَ شَ فِنّ عَبِفَيِلِ نَشَ تَامِ كّمّ قِرِن تٌنفٌ، عَ نُن وّنِ كُندِ قِرِن، يّشّي فَنشِ سُولِ، كَابّ فَنشِ بُسَلِ قِرِن، تَمَرٍ مْولِ ندٍ سُشُي كّمّ، نُن شْرّ شَرَشِ شُتِ كّمّ قِرِن. عَ نَشَ نَ كٌتٍ بَكِ سٌقَلٍ قَرِ. 19 عَ نَشَ عَ قَلَ عَ شَ كٌنيِيٍ بّ، «وٌ سِفَ يَرٍ، ﭑ قَقٍ.» عَ مُ سٍسٍ قَلَ عَ شَ مْرِ نَبَلِ بّ. 20 عَ نَشَ بَكِ سٌقَلٍ قَرِ، عَ فٌرٌ فٍيَ مَ. دَوُدَ نُن عَ شَ سْورِيٍ قَن نُ نَ فٌرٌقٍ، عٍ قَ نَرَلَن نَ فِنّ رَ. 21 دَوُدَ نُ بَرَ عَ قَلَ عَ شَ مِشِيٍ بّ، عَ نَشّ، «ﭑ بَرَ نَبَلِ شَ شُرُ سٍيٍ مَكَنتَ قُقَقُ فبٍنفبٍرٍنيِ مَ. سٍسٍ مُ بَشِ عَ شَ نَاقُلِ رَ، كْنْ عَ نَشَ ﭑ مَ وَلِ قَنيِ سَرٍ مَسَرَ قٍ حَاشِ رَ. 22 شَ عَ سَ لِ ﭑ مُ نَبَلِ شَ شّمّ بِرِن قَشَ بٍينُن تِنَ فّيسّفّ، عَلَ شَ ﭑ حَشَنكَتَ عَ حَاشِ رَ.»

23 عَبِفَيِلِ تٌ سَ دَوُدَ تٌ، عَ نَشَ فٌرٌ مَقُرٍن سٌقَلٍ قَرِ، عَ سُيِدِ دَوُدَ بّ. 24 عَ تٌ بِرَ عَ سَنيِ بُن مَ، عَ نَشَ عَ قَلَ عَ بّ، «ﭑ مَرِفِ، عِ شَ عِ هَاكّ تٌ ﭑ بّ. عِ شَ عِ تُلِ مَتِ ﭑ تَن، عِ شَ كٌنيِ فِنّ شُي رَ. 25 عِ نَشَ عِ تُلِ مَتِ نَبَلِ شُي رَ. شَشِلِتَرٍ نَن عَ رَ، عَلْ عَ شِلِ ‹نَبَلِ› عَ مَسٍنمَ كِ نَشّ. عَ دَشُحَ نَن تُن قَلَمَ. ﭑ تَن مُ عِ شَ شّيرَيٍ تٌشِ. 26 عَلَ تٌ عِ رَتَنفَ نِي بَقٍ مَ، عَ تٌ عِ رَتَنفَ عِ فبٍحْشْقٍ مَ، عَلَ شَ عَ نِيَ عِ يَشُييٍ شَ لُ عَلْ نَبَلِ. عَلَ بّ، عِ تَن بّ، نَشٍيٍ وَ مَ قٍ حَاشِ رَبَقٍ عِ تَن نَ، نٍيٍ بِرِن شَ لُ عَلْ نَبَلِ.»

27 «يَكْسِ، ﭑ تَن عِ شَ كٌنيِ فِنّ قَشِ بُحَ نَشَن نَ، نَ شَ عِتَشُن عِ قْشِرَبِرّيٍ مَ. 28 يَندِ، عِ شَ دِحّ مُشُ مَ. عَلَتَلَ شَ عِ بْنسْي سَبَتِ، بَرِ مَ عَلَ شَ فٍرٍ سٌي نَن عِ رَ. عَلَ شَ عِ رَتَنفَ قٍ حَاشِ بِرِن مَ. 29 عِ مَرِفِ عَلَتَلَ شَ عِ نِي رَتَنفَ عِ يَشُييٍ مَ. عَلَتَلَ شَ عِ يَشُييٍ مَكُيَ عِ رَ ثٌن. 30 عَلَتَلَ نَ فّ هِننّدٍ عِ رَ، عَ عِ قِندِ عِسِرَيِلَ مَنفّ رَ، عَلْ عَ لَايِدِشِ عِ بّ كِ نَشّ، 31 عَ مُ لَنمَ عِ بْحّ شَ تْورْ قٍ ندٍ مَ عِ نَشَن نَبَشِ، عَلْ مِشِ نِي بَقٍ قُقَقُ عِ فبٍحْشْ قٍ رَ. عَلَتَلَ نَ فّ هِننّدٍ عِ رَ، عِ رَتُ ﭑ مَ.»

32 دَوُدَ نَشَ عَ قَلَ عَبِفَيِلِ بّ، عَ نَشّ، «تَنتُي نَ عِسِرَيِلَ مَرِفِ عَلَتَلَ بّ، نَشَن عِ شّيشِ ﭑ يِرٍ تٌ. 33 عَلَ تَنتُ عِ شَشِلِ قَنيِ شَ قٍ رَ، عَلَ شَ بَرَكَ سَ عِ شَ قٍ، عِ تَن نَشَن ﭑ نَتَنفَشِ فبَلٌي رَبَقٍ مَ عَلَكٌ ﭑ شَ كِسِ. 34 ﭑ شَ عَ قَلَ عِ بّ عِسِرَيِلَ مَرِفِ عَلَتَلَ شِلِ رَ، نَشَن ﭑ نَتَنفَشِ قٍ كٌبِ رَبَقٍ مَ، شَ عِ مُ عِ شُلُن قَقٍ رَ ﭑ يِرٍ نُ، بٍيمَنُن كُيٍ شَ عِيَلَن، نَبَلِ شَ شّمّ بِرِن بَرَ قَشَ نُ.» 35 عَبِفَيِلِ دَوُدَ سَنبَ سٍيٍ نَشٍيٍ رَ، دَوُدَ نَشَ عٍ رَ سُشُ، عَ قَ عَ قَلَ عَ بّ، «فبِلٍن عِ شْنيِ بْحّسَ كُي. ﭑ بَرَ فّ عِ شُي سُشُدٍ.»

36 عَبِفَيِلِ تٌ نَبَلِ يِرٍ لِ، عَ نَشَ عَ تٌ عَ نَ شُلُنيِ شُنفبٍ تِقٍ حّلّشِنيِ كُي، عَ سِيسِشِ قٍوٌ. عَ مُ سٍسٍ قَلَ عَ شَ مْرِ بّ هَن فّيسّفّ. 37 نَ كُيٍ عِبَ، سِيسِ تٌ بَ نَبَلِ قَتٍ عِ، عَ شَ فِنّ نَشَ دّنتّفّ سَ عَ بّ، عَ قَ فَاشُ كِ قَنيِ رَ. 38 شِ قُ حْندْن دَنفِ شَنبِ، عَلَتَلَ نَشَ نَبَلِ قَشَ.

39 دَوُدَ تٌ نَبَلِ قَشَ قٍ مّ، عَ نَشَ عَ قَلَ، «تَنتُي نَ عَلَتَلَ بّ، نَشَن ﭑ نَتَنفَ نَبَلِ شَ شَشِلِتَرٍحَ مَ عَلَكٌ ﭑ نَشَ حَاشُحَ رَبَ. عَلَتَلَ بَرَ نَبَلِ شَ حَاشُحَ سَرٍ رَفبِلٍن عَ مَ.» دَوُدَ نَشَ شّيرَيٍ شّي، عٍ شَ سَ عَ قَلَ عَبِفَيِلِ بّ، عَ شَ قِندِ عَ شَ فِنّ رَ. 40 عٍ تٌ سِفَ كَرٍ مٍلٍ نَ قَلَدٍ عَ بّ، 41 عَ نَشَ عَ يَتَفِ قٍلٍن بْشِ مَ، عَ قَ عَ قَلَ، «ﭑ مَرِفِ دَوُدَ، عِ شَ كٌنيِ فِنّ نَن ﭑ نَ، نَشَن مُ تٌندِ مَ عِ شَ وَلِكّيٍ سَنيِيٍ مَشَدٍ.»

42 عَبِفَيِلِ نَشَ كٍلِ كٍرٍن نَ، عَ تٍ سٌقَلٍ قَرِ، عَ بِرَ دَوُدَ شَ شّيرَيٍ قْشْ رَ، عَ نُن فِنّ دِ مّدِ سُولِ. نَ كِ عَ نَشَ قِندِ دَوُدَ شَ فِنّ رَ. 43 دَوُدَ نُ بَرَ عَشِنٌوَ مَ يِسِرٍيلِكَ قَن دْشْ. 44 سْلُ نُ بَرَ عَ شَ دِ فِنّ مِكَلِ، دَوُدَ شَ فِنّ سِنفٍ، قِ لَيِسَ شَ دِ ثَلِتِ فَلِمُكَ مَ.