1 मिनु इस्राएली आन दाते रे योव़शा, इ लोक्‍ब हारून नु आ तौपुकी इ ङोंइती राप्‍पाइक्‍चा माल्‍नेवे। मारदे हना हारून नु आ तौ नादाब, अबीहु, एलाजर नु इथामार आं कली चढ़ेब दुम्‍चा माल्‍नीमी। १इतिहास २३:१३; प्रस्‍थान ६:२३ 2 मिनु गे इ लोक्‍ब हारून कली आं गेय पची ना ला फेक्‍चा कली फेक्‍तीक वा फेरपाइक्‍चा माल्‍नेवे। मेको हारून कली ग्‍योम्‍शा दारपाइक्‍चा कली बाक्‍ब। 3 मिनु सु सुमी फेरस जोक्‍नीमी, मेको नु लोव़ पावो। मारदे हना गो मेको आन कली जोक्‍ब नु तुइक्‍ब सोक्‍तीम प्रिंताक्‍ङमी। मेकोपुकीमी हारूनमी आं कली चढ़ेतीक गेय पचा कली वासी फेरचा माल्‍नीम। प्रस्‍थान ३१:५

4 मेकोपुकीमी मार वासी फेरचा माल्‍नीम देंशा हना, कुचु तार वोइक्‍तीके, निसाफ पतीके ऊरीम नु थुम्‍मीम वोइक्‍तीक झोला, आ तार फेक्‍तीके नु आगा फेक्‍तीक वा फेरचा माल्‍नीम। पियाम गुप्‍‍तीक नु किप्‍शुर यो सेल्‍चा माल्‍नीम। मेको आं कली गेय पची ना फेक्‍तीक बाक्‍ब। इ लोक्‍ब हारून नु आ तौपुकीमी आं कली गेय पामेनु, मेको वा फेक्‍चा माल्‍नीम। 5 फेरबपुकीमी सुन, नीलो, प्‍याजी नु लल रङ ङा श्‍येले नु रिम्‍शो पा किरशो सुती श्‍येले के प्रोव़शो वा के सेल्‍चा माल्‍नीमी। प्रस्‍थान २६:१

6 कुचु तार वोइक्‍तीके सुन के, नीलो, प्‍याजी नु लल रङ ङा श्‍येले नु रिम्‍शो पा किरशो सुती श्‍येले के प्रोव़शो नु बुटा आप्‍शो वा के सेल्‍पाइक्‍चा माल्‍नेवे। 7 मेको आ बला सुम्‍तीके निक्‍शी निम्‍फा पटटी बोइश्‍शो दुम्‍चा माल्‍ब। 8 मिनु आ पाइक्‍तीके मेको कुचु तार वोइक्‍तीके का रेन दुम्‍चा माल्‍ब। मिनु खाल का ङा रिम्‍शो गेयम सेल्‍शो दुम्‍चा माल्‍ब। मेको पाइक्‍तीके सुन, नीलो, प्‍याजी नु लल रङ ङा श्‍येले नु रिम्‍शो पा किरशो सुती श्‍येले के प्रोव़शो वा दुम्‍चा माल्‍ब। 9 मिनु गे ओनीक्‍स हीरा निक्‍शी चाक्‍शा, इस्राएल आ १२ जना तौ आन नें मेको आस तारी मुशा ब्रेक्‍पाइक्‍चा माल्‍नेवे। प्रस्‍थान २५:७ 10 गे आन जरमेशो खोदेंशो पा हीरा का तारी ६ जना आन नें नु अर्को हीरा तारी ६ जना आन नें मुशा ब्रेक्‍पाइक्‍चा माल्‍नेवे। 11 छाप सेल्‍बपुकीमी दोदेंशो पा मुशा छाप सेल्‍नीमी, मोदेंशो पा मुशा इस्राएल आ तौ आन नें ब्रेक्‍पाइक्‍चा माल्‍नेवे। मिनु मेको हीरा निक्‍शी सुनमी क्‍येप्‍पाइक्‍चा माल्‍नेवे। 12 मेको कुचु तार वोइक्‍तीक आ बला ङा टुक्रा तारी क्‍येप्‍शा फेरपाइक्‍चा माल्‍नेवे। मिनु मेको हीरा कोव़शा इस्राएली इन कली मिम्‍नुङ, दे कोंइतीक बाक्‍ब। हारूनम आं ङोंइती मेको आन नें बलाम कुरानु, गो मेको आन कली मिम्‍नुङ।

13 मिनु हीरा वोइक्‍चा कली गे सुन के क्‍येप्‍तीक सेल्‍पाइक्‍चा माल्‍नेवे। 14 मिनु गे क्‍येख सुन के डोरी खोदेंशो पा सिक्री निक्‍शी चेम्‍पाइश्‍शा, हीरा क्‍येप्‍पाइश्‍शोमी बोइक्‍पाइक्‍चा माल्‍नेवे।

15 गे निसाफ पतीक झोला सेल्‍पाइक्‍चा माल्‍नेवे। मेको कुचु तार वोइक्‍तीके खोदेंशो पा, सेल्‍पाइक्‍चा माल्‍नेवे। सुन, नीलो, प्‍याजी, लल श्‍येले नु रिम्‍शो पा किरशो सुती श्‍येले के प्रोव़पाइक्‍चा माल्‍नेवे। 16 मेको खेयप का मुक्‍शोनु, स्‍पान का लाइश्‍शो नु स्‍पान का ब्रेम्‍शो ४ पाटे दुम्‍चा माल्‍ब। स्‍पान का २३ सेन्‍ती मिटर खोदेंशो बाक्‍ब। बित्‍ता खोदेंशो बाक्‍ब कों? 17 मिनु ४ लस्‍कर हीरा सुनम का का पा क्‍येप्‍पाइक्‍चा माल्‍नेवे। ङोंइती ङा लस्‍कर लल मानीक माइश्‍शो हीरा, हाव पुश्‍पराज माइश्‍शो हीरा नु गिगी बेरूज माइश्‍शो हीरा वोइक्‍पाइक्‍चा माल्‍नेवे। 18 मेको आ नोले ङा लस्‍कर लल फिरोजा माइश्‍शो हीरा, बुश नीर माइश्‍शो हीरा नु बुश नु नीलो पन्‍ना माइश्‍शो हीरा वोइक्‍पाइक्‍चा माल्‍नेवे। 19 मेको आ नोले ङा लस्‍कर गिगी नु नीलो रङ ब्‍वाइश्‍शो रिम्‍शो टल्‍केशो नीलमनी माइश्‍शो हीरा, गिगी हाकीक माइश्‍शो हीरा नु प्‍याजी रङ ङा कटेला माइश्‍शो हीरा वोइक्‍पाइक्‍चा माल्‍नेवे। 20 मिनु नेल्‍ल क्‍येङा नोले ङा लस्‍कर पीतमनी माइश्‍शो हीरा, लल रङ ङा ओनीक्‍स नु नीलो बिलौरा माइश्‍शो हीरा वोइक्‍पाइक्‍चा माल्‍नेवे। मोपा हीरा नेल्‍ल आन कली सुनम क्‍येप्‍पाइक्‍चा माल्‍नेवे। 21 मेको हीरा १२ ओटा दुम्‍चा माल्‍नीम। मिनु इस्राएल आ तौ आन नें का का पा मेको आन तार छाप थोक्‍शो खोदेंशो पा मुशा ब्रेक्‍पाइक्‍चा माल्‍नेवे। हीरा का आ तारी थर का आ नें दुम्‍चा माल्‍ब।

22 गे मेको निसाफ पतीक झोला कली क्‍येख सुन के डोरी किरशो खोदेंशो पा सिक्री निक्‍शी चेम्‍पाइक्‍चा माल्‍नेवे। 23 मिनु गे मेको निसाफ पतीक झोला कली सुन के मुन्‍द्रा निक्‍शी चेम्‍पाइक्‍चा माल्‍नेवे। मिनु मेको मुन्‍द्रा निसाफ पतीक झोला आ सुर निक्‍शीमी वोइक्‍पाइक्‍चा माल्‍नेवे। 24 मेको सुन के सिक्री निक्‍शी निसाफ पतीक झोला आ सुरम वोइश्‍शो मुन्‍द्रा निक्‍शीमी लिक्‍पाइक्‍चा माल्‍नेवे। 25 मेको सिक्री चढ़ेब आ कुचु तार वोइश्‍शो वा आ बला ङा हीरा क्‍येप्‍शो सुनम हेक्‍पाइक्‍चा माल्‍नेवे। 26 मिनु गे लेंशा सुन के मुन्‍द्रा निक्‍शी सेल्‍पाइक्‍चा माल्‍नेवे। मेको निक्‍शी निसाफ पतीक ऊरीम नु थुम्‍मीम वोइक्‍तीक झोला आ उइ आगा गे पाइक्‍चा माल्‍नेवे। मोपा कुचु तार वोइक्‍तीक वा आ तार बाक्‍ब। 27 मिनु गे लेंशा सुन के मुन्‍द्रा निक्‍शी सेल्‍पाइक्‍चा माल्‍नेवे। मेको कुचु तार वोइक्‍तीक आ बाला सुम्‍तीके उइ ङा सुरम वोइक्‍चा माल्‍नेवे। मिनु दारपाइश्‍शो पाइक्‍तीके आ तारी क्‍येप्‍पाइक्‍चा माल्‍नेवे। 28 मिनु मेको निसाफ पतीक ऊरीम नु थुम्‍मीम वोइक्‍तीक झोला आ मुन्‍द्रामी नीलो डोरीम लिक्‍शा, कुचु तार वोइक्‍तीक वामी पाइक्‍पाइक्‍चा माल्‍नेवे। मोपा मेको निसाफ पतीक झोला दारपाइश्‍शो पाइक्‍तीक तार बाक्‍शा कुचु वोइक्‍तीक वा रे एर ओंथ मयाक्‍सीब। 29 मिनु मोदेंशो पा हारून परमप्रभु यावे आ बाक्‍तीक ओव़मेनु, इस्राएल आ तौ आन नें ब्रेक्‍शो निसाफ पतीक झोला आ कुचु तारी कुरचा माल्‍ब। मेको परमप्रभु यावेमी गेना हना यो मिम्‍चा कली बाक्‍ब। 30 मेको निसाफ पतीके झोलामी मेको ऊरीम नु थुम्‍मीम निक्‍शी कुर पचा माल्‍नेवे। हारून परमप्रभु यावे आ ङोंइती ल‍मेनु, इस्राएली आन निसाफ पतीके गेना हना यो आ कुचु तारी बाक्‍चा माल्‍ब। लेवी ८:८; गन्‍ती २७:२१; ब्‍यवस्‍था ३३:८

31 मिनु मेको कुचु तार वोइक्‍तीके आगा फेक्‍तीके नेल्‍ल नीलो प्‍याजी रङ ङा वा के फेरपाइक्‍चा माल्‍नेवे। 32 मिनु पिया ख्रीतीक पोव़ला वोइक्‍पाइक्‍चा माल्‍नेवे। मेको एर ओंथ मगाक्‍चा ङा पा आ सुर थम बोल्‍यो पा प्रोव़पाइक्‍चा माल्‍नेवे। 33 मेको फेक्‍तीके आ उइ ङा सुर एर ओंथ गे नीलो, लल नु प्‍याजी रङ ङा श्‍येले के सेल्‍शो दारीम सेल्‍पाइक्‍चा माल्‍नेवे। मेको आन दातेम सुन के आइक्‍च आइक्‍च किङगो क्‍युक्‍पाइक्‍चा माल्‍नेवे। 34 किङगो का, दारीम का, किङगो का दारीम का पा मेको फेक्‍तीक नेल्‍ल आ एर ओंथ क्‍युक्‍चा माल्‍नीम। 35 मिनु हारूनमी मेको वा गेय पची ना फेक्‍चा माल्‍ब। मोपा परमप्रभु यावे आ नेल्‍ल क्‍येङा चोव़खो बाक्‍तीके ओव़मेनु, किङगो आ रेयके नेंपाइक्‍चा माल्‍ब। हारून मबेक्‍ल, दे मोदेंशो दुम्‍चा माल्‍ब। प्रस्‍थान ३०:२१; लेवी १६:२,१३

36 गे कुप्‍फीम पांइ‍तीके क्‍येख सुन के फू खोदेंशो पा चेम्‍पाइक्‍चा माल्‍नेवे। मेकेर छाप थोक्‍शो खोदेंशो पा ‘परमप्रभु यावे कली ला’ दे मुशा ब्रेक्‍पाइक्‍चा माल्‍नेवे। जकरिया १४:२०; प्रस्‍थान ३९:३० 37 पियाम गुक्‍तीकेम आ ङोंइती गे वोइक्‍चा कली नीलो प्‍याजी डोरीम फ्रेंपाइक्‍चा माल्‍नेवे। 38 मोपा मेको हारून आ कुप्‍फीम बाक्‍चा माल्‍ब। आ कुप्‍फीम पाइश्‍शा, इस्राएली आन मरिम्‍शो पशो कुरब। मिनु परमप्रभु कली चढ़ेशो रिम्‍शो दुम्‍नीम। परमप्रभु यावेमी आन चढ़ेशो ब्रवल, दे गेना हना यो आ कुप्‍फीम बाक्‍चा माल्‍ब।

39 नेल्‍ल क्‍येङा आगा फेक्‍तीके रिम्‍शो पा किरशो सुती श्‍येले के बुटा आप्‍शा प्रोव़शो वा के सेल्‍पाइक्‍चा माल्‍नेवे। पियाम गुक्‍तीके रिम्‍शो पा किरशो सुती श्‍येले के प्रोव़शो वा के सेल्‍पाइक्‍चा माल्‍नेवे। किप्‍तीके रङ रङ ङा सेल्‍पाइक्‍चा माल्‍नेवे।

40 गे हारून आ तौ आन कली फेक्‍तीके किप्‍तीक नु आइक्‍च गुक्‍तीके सेल्‍पाइक्‍चा माल्‍नेवे। मेको हारून आ तौ आन कली ग्‍योम्‍शा दारपाइक्‍चा कली बाक्‍नीम। प्रस्‍थान २८:२ 41 गे मेको इ लोक्‍ब हारून नु आ तौ आन कली फेक्‍तीमी। मिनु तेल लुक्‍शा, आं कली ला गेय पचा कली योव़शा वोइक्‍मी। मोपा आं कली चढ़ेब दुम्‍नीम। प्रस्‍थान २९:९, २९-३६; प्रस्‍थान २९:२४; लेवी ८:१२,२२-३१ 42 गे मेको आन शिश्रा रां सुम्‍पाइक्‍चा कली सुती वा के कटटु फेरपाइक्‍चा माल्‍नेवे। मेको कम्‍बर रे पोक्‍च सम्‍म दुम्‍चा माल्‍ब। 43 मिनु हारून नु आ तौपुकी ग्रुम्‍तीक ताम्‍बु ओव़शा, चढ़ेतीक आ नेक्‍था लमानु, मेको वा फेक्‍सीशो बाक्‍चा माल्‍नीम। मफेक्‍साक्‍म हना, दोस तशा बेक्‍नीम। हारून नु आ चच युइ आन पाला नेल्‍लेमी गेना हना यो मोदेंशो पचा माल्‍नीम।