1 मिनु परमप्रभु यावेमी मोसा कली “फाराओ नु इजीप्‍त रागी ङा मुर आन कली नेल्‍ल क्‍येङा नोले ङा बेक्‍चा ङा श्‍येत का गेनुङ। मिनु इन कली लचा गेब। लचा गेवानु, नेल्‍ल इन कली ब्रा ब्रु खेरब। 2 गे मुल इ मुर आन कली ‘वोंइश मुर नु मीश मुरपुकीमी आन नेक्‍था बाक्‍ब इजीप्‍ती आन के सुन नु चांदी के पांइतीक शोंप पुंइचा माल्‍नीम’ दे शेंचा माल्‍नेवे” दें‍त। प्रस्‍थान ३:२१-२२ 3 मिनु परमप्रभु यावेमी इजीप्‍त ङा मुर आन कली इस्राएली आन कली दाक्‍ब सेल्‍तु। मिनु मोसा फाराओ आ गेय पाइब नु इजीप्‍त ङा मुर नेल्‍ल आन ङोंइती शुश ठेयब मुर दुम्‍त।

4 मिनु मोसामी फाराओ नु आ मुर आन कली “परमप्रभु यावे आ देंशो लोव़ मार बाक्‍त देंशा हना नाक्‍दो उइक्‍थ दुम्‍मेनु, इजीप्‍ती आन दातेम लाइनुङ। 5 इजीप्‍त रागीमी सु सु ङोंइती जरमेशो बाक्‍मा, मेको बेक्‍चा माल्‍नीम। फाराओ आ नोले सासन पाइब ङोंइती जरमेशो तौ रे नेल्‍ल क्‍येङा आइक्‍च यात हिल्‍ब मीश मुर आन ङोंइती जरमेशो तौ सम्‍म नेल्‍ल बेक्‍चा माल्‍नीम। बस्‍तु भाव आन के यो ङोंइती जरमेशो बेक्‍चा माल्‍नीम। प्रस्‍थान ४:२३ 6 मिनु इजीप्‍त रागी नेल्‍लेमी ठेयब रोंका पा ङाक्‍नीम। ङोंइती मोदेंशो गेनायो मदुम्‍शो बाक्‍त। मिनु नोले यो लेंशा मदुम्‍ब। 7 इस्राएली आन दातेमी चहिं मुर नु बस्‍तु भाव आन चां का यो महेम्‍ब। परमप्रभु यावेमी इजीप्‍त ङा मुर आन कली नु इस्राएल ङा मुर आन कली खाल का ङा मपाइब, दे तुइक्‍तमेक्‍ल। प्रस्‍थान ९:४ 8 मिनु नोले इन गेय पाइब नेल्‍लेमी आं ङोंइती खुम्‍की पा बाप्‍शा, आं कली ‘गे नु इन नोले खोइक्‍ब मुरपुकी एक रे लने’ देंनीम। मिनु गो लाइनुङ” दे मोसामी फाराओ कली देंत। मिनु मोसा फाराओ आ बाक्‍तीके रे शुश गाइश्‍शा चुरशा गाक्‍त।

9 मिनु परमप्रभु यावेमी मोसा कली “इजीप्‍त रागीम आं छक लाक्‍चा ङा शुश चिन्‍ड दुम्‍ल, दे फाराओम इ कली मटिपदु” देंत। 10 मोसा नु हारूनमी फाराओ आ ङोंइती मेको छक लाक्‍चा ङा चिन्‍ड मार मार नेल्‍ल पाम्‍ताक्‍स। इस्राएल ङा मुर आन कली लचा मगेवल, दे परमप्रभु यावेमी फाराओ कली काइ मटीब दुम्‍पाइक्‍तु। प्रस्‍थान ४:२१