1 Jatian Apolosbiribi Corintoain iketian, manan shitabaini kaax, Efesoain Pablo nokota iki. Jaskatax jainoa joi akaibo betan nokoanana iki.

2 Jainxon neskáakin jato yokata iki: —¿Joi ikonhaxonki, ja Diossen Shinan maton bia iki? —akin. Jato jaskáa, yoikana iki: —Diossen Shinan yoikanaira, jawetianbi non ninkáyosma iki —akin.

3 Jatian Pablon jato yokáribia iki: —¿Tson imaa keskáakinki mato bautizankana iki? —akin. Jatian yoikana iki: —Ja Juanman jato bautizani keskatira noa iká iki —akin.

4 Jatian Pablon jato yoia iki: —Ikon riki, Dios ikonhaxon jaton jakonma shinanbo akonkin jeneabora, jato Juanman bautizana iki. Ikaxbi imakinra, jato yoikatitai, ja japekao joái joni ikonhaax jaki koshikanti ja iki Jesús —akin.

5 Jato jaskáa, ja non Ibo Jesussen janenko bautizanmeekana iki.

6 Jatian Pablon jato mamepasa, ja Diossen Shinan bikana iki. Jaskatax wetsaresibi joinbo yoyo ikana iki itan ja Diossen joiboribi jato yoikana iki.

7 Ja jatikaxbi jaskataibo ikana iki, chonka rabé jonibira.

8 Jatian kimisha oxera tantiti netetiibi, ja tsinkíti xobon jikixon, jatoki rakéyamakin Pablon jato yoia iki, ja Diossen ikinaton jatikiriti iká joibo jato ikonhamakaskin.

9 Ikaxbi, jatíribibo yoitimareskin, ikonhaayamai icha jonibo bebonmeax, Diossen joi akaiboki ramii yoyo ikana iki. Jaskákanaitian oinxon, jato potabaini kakin, ja joi akaibobicho Pablon jato ioa iki, ja Tirano janeya jonin axeti xobonko. Jain ixon netetiibi onantishamanhakin jato Diossen joi yoikatitai.

10 Jatian jaskáakin rabé baritia senen, jain jato joi yoia iki. Jaskáakin jato joi yoiaitian, ja Asia main iká judíoboyaxonbi judíomabaonribi non Ibon joi ninkákana iki.

11 Jainxon Diossen koshi shinanman akinnaton, ani ratéti jawékibo Pablon aká iki.

12 Ja Pablon pañonbo itan jan saweai chopabo boxon, ja isinaibo jan taxnankana, benxokana iki. Jainoax ja yoshin naikiaboribi jan taxnankana, jatomeranoax ja yoshinbo pikota iki.

13 Jatian jainribi ikana iki, ja jato yoshin pikoxoni jatíbiain kawantanai jawetii judíobo. Jabaonra, ja non Ibo Jesussen janenko yoshinbo píkoshokokaskin jato neskáakana iki: “¡Ja Pablon yoiai Jesussen janenkora en mato yoiai yoshinbó, pikókanwe!” akin.

14 Jaskáakin akaibora ikana iki, Esceva janeya judío jonin kanchis bake. Ja Esceva iká iki *sacerdotebaon koshi.

15 Ikaxbi yoshinman jato yoia iki: “Enra ja Jesús betan Pablo onanke, ikaxbi ¿Matokan tsoabo iki?” akin.

16 Jaskátaanan, ja yoshinman iboa jonin, jabákawanxon jato yatantaanan, ramiayoxon moa jatoaresa iki. Jato jaskáa chopaomabo itan xatébiresbo ja xobomeax jabákana iki.

17 Jato jaskáa ninkatax, jatíbi ja Efesoain ikana judíobo, itan judíomabo ikonbiresi ratékana iki. Jaskaxon ja non Ibo Jesussen jane, moa iresama jatíbiainxon onankana iki.

18 Jainoax ja joi ikonhaa icha jonibaonribi, jaton jakonma jawéki akátiaibo, joni icha bebonxonbo Dios keshankana iki.

19 Jatian icha ja yobé jawékiki koshia ikátiaibaonra jaton yobéti kirikabo bexon, jatíbi jonibo bebonxon menokana iki. Ja menokana kirikabaon kopí tsekakana iká iki, pichika chonka waranka koríkibira.

20 Jaskataxa ja non Ibon joi jatíbiain pextina iki, itan jawen atipana koshiribi jato oinmaa iki.

21 Jaskarabo iká pekáo, Pablon shinanna iki, Macedonia betan Acaya main iká jemabaon jato oinni kaax, Jerusalénhain tekíti. Jatian Jerusalénhain katanax joáx, Roma jemanribi kati shinanna iki.

22 Jaskáxon jan akinnai joni rabé, Timoteo betan Erasto Macedonia main jato raanax, Pablobiribi jawetii neterespari ikí, Asiainbi baneta iki.

23 Ja netebaonra Efesoain, ja non Ibon joi yoiaiboki kikini sinákana iki.

24 Jan jato jaskáaibora ikana iki, Demetrio janeya jonin jato ikinaibo. Ja Demetriora iká iki, *platanin teetai ixon, ja dios ainbo Diananin xobo jisáshokobo axon, ja jabé teetai jonibo icha koríki jato kanankiinai.

25 Jatian jatíbi jan teekiinaiboyabi, ja jaskaraton teetai wetsa joniboribi tsinkixon, Demétrion jato yoia iki neskáakin: “Jonibo, matonra onanke neskara tee axon non icha koríki biai.

26 Ikaxbira matonbi ninkáxon oinke, ja ikonma diosbora diosma iki, ikibo ikai. Jaskáakin jato yoixonra, ja wetsaresibi joibo icha joni jato ikonhamake. Neno Efesoainbichoma riki, jato jaskáai, ja Asia mai rebestanishamankinra jato jaskarabo onanmai.

27 Nato jawékira kikin onsá iki, ja non maroti jawékira keyóti atipanke, jainoax jákaya ninkakaatai ikaxbira, ja dios ainbo Diana rabiti xoboribi moa jawemabi iti iki, jaskataxa ja dios ainboki shirokanti iki, ja Asia mainkoxon itan nete senenainkoxonbo rabikanai ikaxbi”, akinbo jato aká iki.

28 Jato jaskáa ikonbiresi sinati, neskati saa ikana iki: “¡Efeso jonibaon tita Dianakaya rabikanwe!” ikibo.

29 Jaskáakinra, jatíbi ja jeman ikana jonibaon shinanbo tsokasanankana iki. Jaskáxon ja Gayo betan Aristarco yatanxon ninibokin, jain jonibo tsinkíti akanainko bokana iki. Ja rabé jonira iká iki Macedoniainoa, Pablo betan niaibo.

30 Jatian Pablo jato betan yoyo iki jain jikikasainbi, ja joi akaibaon imayamaa iki.

31 Jainxon ja Asiainoa jawetii joni koshibaonribi, ja weikanainko kayamanon ixon Pablo joi bemakana iki.

32 Jatian ja tsinkíkanabo jaskáshamankanai onantima ikax, meskotibores saa ikana iki: Jaweakimein noa tsinkíkanke ixonribi moa ichaxon onanyamareskana iki.

33 Ikaxbi jatíribi judíobaonra, ja Alejandro weranbokin boxon, jato bebon nichinkana iki, abanon jan jato onantiakin yoikin ixon. Jatianra Alejandron, netéparikanon ixon jato meken chankanxona iki, judíobaon paranan ikí yoyo ikaskin.

34 Ikaxbi járibi judío joni onanax, jatikaxbi rabé hora neskati saa ikana iki: “¡Ani riki ja Efesobaon dios ainbo Diana!” iki.

35 Jatian ja jeman kirika wishati koshi imakana jonin, ja tsamákana jonibo netémaxon jato neskáakin yoia iki: “Jatíbi noa Efesoainoa jonibaon, dios ainbo Dianan xobo non koiranaira jatíbiainxon kikinhakin onanke. Jainoax ja jisáribi naikanmeax paketa jawékiribira non koiranke.

36 Jaskara ikenra, tsonbi noa janson yointi atipanyamake. Jaskara iken, moa jainres tantikanwe. Kikinhakin shinanxonmabi aresbiresyamakanwe.

37 Ja nato jonibo maton beara, non dios ainbo rabiti xobomea jawékibo yometsokanama iki; jainoax jakonmaibo jaki yoyo ikanamaribi iki.

38 Jatian ja Demetrio itan jabé teetaiboribi, wetsaboki jakonmaata ikax, rama jaskara joi benxoai joni koshiboiba botankanwe, jarake jaskara joi benxoaibobiribi. Jatianra onanti iti iki, westíorabaon jaton ikábo yoiaitian.

39 Jatian wetsa jawékiboribi benxoakaskin, jaskara benxoai joni koshibo tsinkitainxon benxoakanwe.

40 Rama noa winota jawékininra, noa onsá meran imai; apoki jakonmaataibo riki akinra noa akánake. Jatian jaskara shinanxon noa yokákanara, jaskáshamanhakin non jato yoiti yamati iki”, akin.

41 Jato jaskáakin yoitaanan, moa botankanwe akin jato aká iki.