1 Jatian Pedro betan Juanman, jonibo joi yoikin senenhamapari ikenbi, *sacerdotebo, ja Dios rabiti xobo koiranaibaon koshi, jainoax *saduceoboribi bekana iki.

2 Jabora kikinni sinákana iká iki, Pedro betan Juanman jato esekin, ja Mawábora jirinoxiki, Jesús mawataxbi, jiriribia iketian akin jato yoiaitian.

3 Jaskáxonra, Pedro betan Juan yatankana iki. Jatian moa yantan iketianra, cárcel meran niakana iki, nete xabáketian oinnoxon.

4 Ikaxbi ja joi yoiaitian ninkatabaon, ichaxon ikonhakana iki. Ja joi ikonhakanabo topona iká iki, pichika waranka jonibobira.

5 Jatian nete xabáketian, joni koshibo, ja judíobaon koshibo, jainoax esé onanboribi Jerusalénhain tsinkíkana iki.

6 Jainribi ikana iki, ja *sacerdotebaon koshi Anás, jainoax Caifás, Juan, Alejandro, itan jatíbi ja *sacerdotebaon koshin rarebobo.

7 Jato bebonra ja Pedro betan Juan bokana iki. Jainxonra jato yokákana iki: —¿Tson ati yoiaki aká maton jonibo esekin? ¿Tson janenkoki maton neskara jawéki akai? —akin.

8 Jatian Pedron Diossen Shinan bochoya ixon jato neskaa iki: —Jema koshibo, itan judíobaon koshibo:

9 Matonra noa yokatai joni isinai non benxoaketian, jawekeskatax benxoarin ixon onankaskin.

10 Jakon riki, nonra mato yoiai jatíbi *Israel jonibaon onankanon ixon. Nato joni mato bebon itinara, nazarethainoa Jesucriston janenko benxoke. Jara maton korosen axon retekenbi, Diossen jirimaa iki.

11 Nato Jesús riki ja xoboai ixon maton rotoni makan, jara jatiobi xobo jaki kikinni koshia makan keska itoshia iki.* Sal. 118.22

12 Wetsa jawékira yamake janmeax kishpinti; nato mainra wetsa jane yamake, noa jan kishpinmati Diossen jonibo menia. Jesussenresa noa kishpinmati atipanke —akin jato aká iki.

13 Jatianra jatíbi joni koshibo ratékana iki, rakétanma ja Juan betan Pedro kirika onanshamanma ikaxbi, jaskati yoyo ikanaitian ninkatax, jainxonra onankana iki, Jesussenmea onannaibo riki natobo ixon.

14 Jatian ja benxoaa joni jato pataxbi niketian oinnax, moa jakonmai jatoki yoyo iti atipanyamakana iki.

15 Jatian jainxon joi benxoati chité ikainoa jato pikoax, jatobiresbiribi neskati yoyo ikana iki:

16 —¿Nonki nato jonibo jaweatiki? Moara jatíbi Jerusalénhainoa jonibaon, ja westíora ratéti jawéki akana onankanke, jaskara ikenra ikonma riki akin non jato ati atipanyamake.

17 Ikaxbi nato joi jatíbiain pextinhakin jato yoibokanamatianbi jato rakéati riki, ja Jesús kiriti iká joibo moa tsoabi jato yoiamakanon ixon —iki ikana iki.

18 Jaskáaxonra, kenamaxon jato yoikana iki, ja Jesús kiriti iká joibo moa jato onanmatima itan jawebi ja winota joibo moa jato yoitima.

19 Ikaxbi Pedro betan Juanman jato yoia iki: —Oinnon shinankanta, Diossen oinnamein jakon iki matopari non joi senenhaxonti, Diospari senenhaxonamabi.

20 Nonra ja non oinna itan non onanna jawékibo jato yoikin jeneti atipanyamake —akin.

21 Jatianra joni koshibaon jato rakéaribaa iki, ikaxbi jato jenekana iki, jaskáshamanxon jato ramiatikoma iká iki, ja benxoa joni oinxon jatíbi jonibaon Dios rabiaitian.

22 Ja shinanmanres benxoa joni iká iki, chosko chonka winoa baritiaya.

23 Jatian ja Pedro betan Juan moa pikókana, jato betan joi akaiboiba kabékona iki; kaxon ja judíobaon koshibo betan ja *sacerdotebaon koshibaon jaskáakin jato akana joibo jato yoikana iki.

24 Moa ninkata pekáo, tsinkíxon jatíxonbi, neskáakin orankana iki: “Ibó, minra aká iki nai, mai, aniparo itan jatíbi jain jaa jawékibo.

25 Ja min Shinan meranoax, itan min yonoti David meranoax mia yoyo ika iki: ‘¿Jawekopiki jonibo jakonmaibires yoyo iki saa ikanai? ¿Jawekopiki jonibaon yankabires shinanbo akanai?

26 Nato netemea apobo itan joni koshibora kikini yoitimai, jainbicho tsinkíkanke ja non Ibo itan ja *Cristo ramiati shinanyanix’, iki.† Sal. 2.1-2

27 Jaskatira ja Herodes, Poncio Pilato, jainoax ja wetsankoniax bea jonibo betan, Israel jonibo nato jeman tsinkíkana iki, ja *Cristo, ja min jakon yonoti Jesúski jakonmaati.

28 Jaskáxonra moatianbi min shinanni keskáakin senenhakana iki.

29 Jaskara iketian, rama noa jakonmaakinbo akáskanaitian noa oinwe Ibó; noara min yonotibo iki koshi shinan noa meniwe, rakéyamakin min joi non jato yoinon.

30 Ja min atipana koshi jato oinmawe, ja isinaibo benxoai meranxon, itan ja min jakon yonoti Jesussen janenko ja oinxon onantibo, itan ratéti jawékibo akai meranxon”, akin akana iki.

31 Moa orankin senenhakanketianra, jain tsinkíkanainko shakota iki, jaskáketian jatíbi jain ikanabo Diossen Shinan bochoya banékana iki; jaskara ixonra, rakéyamakin Diossen joi yoikana iki.

32 Jatianra moa icha joi akaibo jakana iká iki, jabora jaskara shinanyabires ikax, jatobi keskáakin shinannaiboribi ikana iki; tsoabira natora nokonabicho ikibo iamakana iki, jaton jawékibo iká iki jatíxonbi akinanankin ati.

33 Jatian ja raanabaonra, bebonbires koshi shinanyaxon, ja non Ibo Jesús jiria joi yoikin jeneyamakana iki. Jaskákanaitian Diossen jatíbi jato jakon imaa iki.

34 Tsoabi jato xaran maxkákanabo yamaa iki; jaton mai itan jaton xobobo marokana iki.

35 Jatian jaton jawéki marokana koríkibora ja raana jonibo menikana iki, abanon ja maxkáirakanabo jato menikin, ixon.

36 Jatianra Josekan jaskáa iki, jara iká iki ja raanabaon Bernabé akin janekana, (ja riki: “Jan jato tantiti jakon shinan bimati bake”, iki iká). Ja Chipreainoaxbi pikota Levikan rarebo.

37 Ja jonira maia ikax, marotaanan koríki bixon, ja raana jonibo jato menia iki.