1 Nate ma꞉nda꞉na꞉ mo hande dakisi mani mu haemeke haliweki make mo hoke haliweki make paeyaoma꞉ Yesuma꞉ leeke pimanu opuluekema꞉ ipiki pa꞉ta꞉ a꞉pa mombelemekepate 2 hande Pa꞉tisi haliwekima꞉ make mo hande Lo Pi walo haemeke haliwekima꞉ make kotoeki handaata꞉ pi la la pitolo hata꞉ ika꞉ kone alota꞉ Do halima꞉ta꞉ mo hoke haliweki handa꞉ mea꞉tiki pea ne kone homeke pa꞉ta꞉ netiki pitelememe laa lemeke handa 3 Yesuma꞉ ika꞉ pi hombo peaaso onkoluma꞉ dupa leekeme. 4 Iki pa꞉ta꞉ hala꞉ hali homekema꞉ ipika꞉ sipisipi ma꞉na꞉ titi 100 halia꞉pate homeke alu pia꞉ka꞉na꞉ta꞉ pa eki pilia꞉pe. Mo pa hala꞉ 99 sipisipi ma꞉na꞉ manuta꞉ ambu nalo haena꞉ mo hande alupia꞉ ekita꞉ ota꞉ handa꞉ uluekema꞉ weilu pelieke leekeme. 5 Kutupa handa꞉ wiata꞉ ta꞉na꞉ma꞉ homolo hata꞉ hande sipisipi ma꞉na꞉ hopula꞉ mea 6 peiyokona꞉ tia da pelieke. Kutupa ipika꞉ yankeke titi make ipika꞉ da wanda꞉hali make paeyao ipupe laa wi alota꞉ Hande alupia꞉ ma꞉na꞉ homeketa꞉ handa꞉ ua꞉ma꞉ niki paeyaoma꞉ ta꞉na꞉ma꞉ homomana꞉e laa lelieke. 7 I̱ma꞉ iki pa꞉ta꞉ ota꞉ pi alome. Koto tupa꞉ kone oli hepeni naneta꞉ pa mandane 99 hone ma꞉nda꞉ na la꞉ka꞉lapeke epeke tupa꞉ haleme wanda꞉hali pa꞉ta꞉ ta꞉na꞉ma꞉ make homelemepate pa mo hoke hali homekema꞉ hone la꞉ka꞉lea꞉ka꞉na꞉ta꞉ kota꞉ oli hepeni naneta꞉ ota꞉ ta꞉na꞉ tiekema꞉ homilimikie laa leekeme.

8 Kutupa make wanda꞉ homeke ma꞉nda꞉ma꞉ ipika꞉ silipa mani kiki yaapo wia halia꞉pate homeke ma꞉nda꞉ alu paeya꞉ka꞉na꞉ta꞉ eki piliepe laa leekeme. Ipikana꞉ma꞉ta꞉ handa꞉ ulueke alo ola꞉pake ka꞉wata꞉ sisimei mea da panda꞉ kila bao weilieke. 9 Kutupa hande mani siki handa꞉ wiata꞉ ipika꞉ yankeke make ipika꞉ da wanda꞉hali make paeyao ipupe laa wi alota꞉ Hande alupia꞉ mani homeketa꞉ handa꞉ ua꞉ma꞉ niki paeyaoma꞉ ta꞉na꞉ma꞉ homomana꞉ pipe laa lelieke. Koto ekina꞉ I̱ma꞉ iki pa꞉ta꞉ ota꞉ pi dupa alome. 10 Koto tupa꞉ kone hoke hali homekema꞉ Koda꞉ pa꞉ta꞉ hone ma꞉nda꞉ la꞉ka꞉lea꞉ka꞉na꞉ta꞉ kota꞉ oli Koda꞉na꞉ enisolo manuma꞉ koto ekina꞉ta꞉ ta꞉na꞉ tiekema꞉ homilimikie laa leekeme.

11 Kutupa Yesuma꞉ pi ma꞉nda꞉ alo hata꞉ alota꞉ Hali homeke ma꞉nda꞉ ipika꞉ eiyeke yaapo ame̱le̱ haemekepate 12 mo wetepe wekima꞉ ateke pa꞉ta꞉ alota꞉ Apa꞉o I̱ma꞉ wetepena꞉ naka꞉ anke teke mulu polo ala꞉ta꞉ ala꞉ta꞉ ame do kone telipa kuelena꞉e laa honke leekeme. Koto ekina꞉ hande atekema꞉ ipika꞉ ala꞉ta꞉ ala꞉ta꞉ mo weki yaapo pa꞉ta꞉ teli paeyekeme. 13 Kutupa mo wetepe wekima꞉ta꞉ nate tepomanu haota꞉ ipika꞉ mieke ekita꞉ ma꞉nda꞉ma꞉ hambena꞉ laata꞉ koto mani mea da mina꞉pa꞉lao da yu ma꞉nda꞉ papate hayeke da nane peekeme. Koto nane puata꞉ na tiaake haumanu pitolo hata꞉ 14 ipika꞉ mani paeyao batiki pu hayekeme. Kotoeki pu paeyao haena꞉ta꞉ koto kenke pa꞉ta꞉ tea꞉ ki tieke epeeketa꞉ mo wekita꞉ ala꞉ta꞉ ma꞉nda꞉ na miniki pa hayekeme. 15 Koto ekina꞉ mo da nane hayeke hamoko hali ma꞉nda꞉ pa꞉ta꞉ ti lao haluekema꞉ peekepate mo hali tiekema꞉ ipika꞉ e poko hayeke yu nane ipika꞉ ma꞉na꞉manu handeteke halo pena꞉ tapaeyekeme. 16 Kutupa mo wekita꞉ mo ma꞉na꞉ manuma꞉ nemeke pato ambuku manuta꞉ ipika꞉ weleke haena꞉yeke noluekema꞉ taapeekepate hali ma꞉nda꞉ma꞉ ipiki pa꞉ta꞉ ne ma꞉nda꞉ a꞉nda꞉ na haleekeme.

17 Kotoeki puoopu hao wetepena꞉ ipika꞉ hone lumba witolo hata꞉ ipika꞉ honema꞉ alota꞉ Ya apa꞉na꞉ e pokaaseme haliwekima꞉ ne ana꞉na꞉ nalo hata꞉ mandaneeki pa wina꞉ lo halemepate I̱ta꞉ do pa꞉ta꞉ hata꞉ta꞉ tea꞉ma꞉ homoluekema꞉ taapolome hone wiekeme. 18 I̱ tiao puaata꞉ yaka apa꞉ pa꞉ta꞉ pua dupa lolueke. Apa꞉o. Koda꞉ pa꞉ta꞉ make neke pa꞉ta꞉ make hoke hau polome. 19 Koto polo ekima꞉ I̱ta꞉ naka꞉ weki au lapeke na ya꞉la꞉me. Koto ekina꞉ naka꞉ e pokalo polo hali hano lolena꞉e laa lolueke hone wiekeme. 20 Koto ekina꞉ta꞉ mo wekita꞉ koto da yu mina꞉pa꞉lao atekena꞉ da poluekema꞉ peekeme. Da a̱i̱ na opolo peeke pota꞉na꞉ pulu haena꞉ kone atekema꞉ eiyeke epeekeeki handaata꞉ ipika꞉ pukima꞉ a꞉ta꞉ma꞉ homolo hata꞉ a̱i̱ya puaata꞉ ipika꞉ weki hopula꞉ mea nunu piekeme. 21 Hande eiyekema꞉ ateke pa꞉ta꞉ alota꞉ Apa꞉o. Neke pa꞉ta꞉ make Koda꞉ pa꞉ta꞉ make hoke hau polome. Koto polo ekima꞉ I̱ta꞉ naka꞉ weki au lapeke na ya꞉la꞉me leekepate 22 pa atekema꞉ ipika꞉ e pokao haemeke haliweki pa꞉ta꞉ wi la alota꞉ A̱i̱ pua hande ota꞉ epeke dau mea a꞉pa yamaota꞉ ipika꞉ kikina꞉ lini pitao ankedake make pambawapa꞉peke. 23 Kutupa hande imeke wotu piki kao ikiki mulu pua liata꞉ ta꞉na꞉ma꞉ homolo hata꞉ ne pambomana꞉ loa꞉me laata꞉ 24 Pa ekipeke. Do yaka wekita꞉ amba꞉ homea꞉pate kone ameta꞉ paa tiala꞉me. Alu pia꞉pate kone ameta꞉ handa꞉ ula꞉me leekeme. Kutupa koto kone ikana꞉ma꞉ ta꞉na꞉ma꞉ homolo hata꞉ mo ne pamba꞉la꞉eki kini pimikime.

25 Koto hau paeyao pitolo haena꞉ta꞉ hande mupeke wekita꞉ e ma꞉nda꞉ pa꞉ta꞉ pua paa da la꞉ka꞉la teke pa꞉ta꞉ ipulu haena꞉ hande ta꞉na꞉ma꞉ homolo hata꞉ dupale emelimanu lemekeeki opiekeme. 26 Kutupa mo e pokao hayeke hali homeke wi la꞉ mea alota꞉ Mota꞉ eki pitolo hata꞉ alemepe laa lota꞉ piekeme. 27 Mo e pokao hayeke halima꞉ ipiki pa꞉ta꞉ alota꞉ Ameta꞉ naka꞉ hande kame da la꞉ka꞉la epeeke handa naka꞉ apa꞉ma꞉ ipika꞉ weki epeke tupa꞉ la꞉ka꞉la da a꞉pa꞉la꞉me laata꞉ mo hande imeke wopu piki kao ikiki lia ne pambolo ala꞉me leekeme. 28 Hande mupeke wekima꞉ koto leekeeki opuata꞉ mineke wopu pankolo hata꞉ da pua꞉peketa꞉ kiaeyekeme. Koto ekina꞉ ipika꞉ atekema꞉ hama opolu bao pua mo hande mupeke weki da tukiki nane epena꞉ yeke honke leekeme. 29 Kutu piekepate mo hande wekima꞉ ipika꞉ atekena꞉ pi hombo peaaso alota꞉ Opima. Bapi paeyao I̱ma꞉ta꞉ naka꞉ e pokao hala꞉ hali leke hata꞉ e poka꞉tiki pu hata꞉ naka꞉ pi hoto homeke a꞉nda꞉ na tunkulua꞉pate pa nanikosi homeke a꞉nda꞉ kone yaka yankeke titi ame̱le̱ nomono yeke ma꞉nda꞉ na lia kime. 30 Pate koto hande naka꞉ wekima꞉ naka꞉ mani mea puata꞉ mo hambo haleme wandiki titi pa꞉ta꞉ ba tapao pua paa da a꞉pa꞉leke kone nakana꞉ma꞉ hande imeke wotu piki kao ikiki liaaleme leekeme.

31-32 Koto leeke handa atekema꞉ ipika꞉ pi hombo peaaso hata꞉ alota꞉ Yaka wekio. Neketa꞉ do pa꞉ta꞉ diki mandake hata꞉ I̱ma꞉ wia halo alemanu paeyaota꞉ naka꞉ ekie. Koto pa꞉la꞉pate naka꞉ kameta꞉ amba꞉ homea꞉pate kone ameta꞉ paa tiaala꞉me. Alupia꞉pate kone ameta꞉ paa handa꞉ ulume. Koto ekina꞉ta꞉ ne pambolo hata꞉ ta꞉na꞉ma꞉ homoloma꞉ ekita꞉ ota꞉ pea꞉peke ekina꞉ puma꞉me laa leekeme leekeme.