3
Yaya ka kawandili kɛ
1 Nba, Rɔmu mansa ba Tiberi la mansaya san tan ni looluna, Ponse Pilate tɛrɛ ye Jude mara kun na, ni Herodi tɛrɛ ye Kalile mara kun na, ni a kɔrɔcɛ Filipe tɛrɛ ye Iture ni Tirakoniti marailu kun na, a ni Lisaniyasi tɛrɛ ye Abilɛni mara kun na. 2 Anasi ni Kayifasi tɛrɛ ye sarakalasela kuntiibaya la.
Wo tuma, Alla ka a la kuma lase Sakariya dencɛ Yaya ma wula kɔndɔ. 3 Yaya wulira wo rɔ, ka wa kawandili kɛ Juridɛn ba fan dɔ. A ka a fɔ mɔɔilu yɛ ko alu ye sun ji rɔ tubi kanma, sa Alla ri yafa ie julumun dɔ. 4 Wo kɛra iko Nabi Esayi ka a sɛbɛ ɲa mɛn ma ko:
«Mɔɔ do ri na a kan nabɔ wula kɔndɔ
ka a fɔ mɔɔilu yɛ ko alu ye sila ba rabɛn Maari yɛ,
ka ban ka sila denni bɛɛ latelen a yɛ.
5 Dinban kɔndɔla bɛɛ ye lafa.
Koyinkɛ ni tindi bɛɛ ye rakanya.
Sila rakundunilu ye latelen.
Sila juu ye rabɛn ka nunku.
6 Wo wa kɛ, adamadenilu bɛɛ ri Alla la kisi ko yen.»
7 Jama tɛrɛ ye nala Yaya ma sun ji rɔ kanma. A ka a fɔ doilu yɛ ko: «Aileilu fɔnfɔnni, yon ka Alla la kititɛɛ ɲafɔ ai yɛ? 8 Ai ye kewali kɛ ikomin jiri den mɛn da yiraka ko ai tubini. Ai kana a fɔ ai jɛrɛ yɛ ko ‹Iburahima ye an fa le ri.› Baa n ye fɔla ai yɛ ko Alla ri se kaba ɲin kɛla Iburahima denilu di. 9 Sisen, tɛɛran da wuli jiri lulu tɛɛ kanma. Jiri mɛnilu tɛ den ɲuma kɛla, woilu ri tɛɛ ka lafili ta rɔ.»
10 Mɔɔilu ka Yaya maɲininka ko: «An ye nfen de kɛ wo rɔ?» 11 Yaya ka ie jabi: «Duruki fila ye mɛn bolo, wo ye fɛriyatɔ sɔ duruki kelen na. Damunun fen tii, wo fanan ye mɔɔ sɔ wo ɲa ma.» 12 Nisɔnkɔmirala doilu fanan nani sun ji rɔ kanma. Alu ka Yaya maɲininka ko: «Karanmɔɔ, an ye nfen de kɛ wo rɔ?» 13 A ka a fɔ ie yɛ ko: «Ai ka kan ka jate mɛn mira mansa yɛ, ai ye dan wo ma. Ai kana foyi la wo kan.» 14 Sorodasi doilu fanan nara a maɲininka ko: «Andeilu don? Andeilu ka kan ka nfen de kɛ wo rɔ?» A ka ie jabi: «Ai kana mɔɔ bolofen si mira a la fanka la. Ai kana maborili kɛ wuya la fanan. Ai ye ai wasa don ai sara rɔ.»
15 Alu bɛɛ tɛrɛ ye imirila ie jusu rɔ ko: «Alla la Mɔɔ Ɲenematɔmɔnin mɛn ko fɔni, Yaya le wo ri wo rɔ wa?» Baa, mɔɔilu tɛrɛ ye wo kisiba makɔnɔla. 16 Ka bɛn ie miriya wo ma, Yaya ka a fɔ ie yɛ ko: «Nde ye ai sunna ji rɔ, kɔni dɔgbɛrɛ natɔ n kɔ, mɛn fanka ka bon n ta ri. Hali ka n birin ka a la sanbara julu fuli a yɛ, wo ka bon nde ma. Ale natɔ ai sunna Alla la Nin Sɛniman dɔ, a ni ta! 17 A la fɛrɛ ye a bolo, a ri a la sɛnɛ suman bu ni a fofo ni a kisɛ bɔ a ɲɔɔn dɔ fɛrɛ mɛn na. A wa wuli wo baara kanma, a ri suman kisɛ ni a bu bɔ ɲɔɔn dɔ. A ri suman kisɛ kɛ bondon kɔndɔ, ka ban ka bu bɛɛ janin ta la. Ta wo ye ta sabali ri, mɛn tɛ ban habadan.» 18 Yaya ka fen siyaman fɔ ie yɛ, ka ie kawandi, ka Alla la kibaro ɲuma lase ie ma.
19 Yaya ka jamanatii Herodi jalaki fanan, ka a masɔrɔn a tun da a kɔrɔcɛ muso Herodiyasi mira a la. Yaya ka Herodi jalaki kojuu siyaman dɔ. 20 Jalakili wo gbara Herodi la, foo ka Yaya mira ka a bila kaso la. Herodi ka kojuu kɛ wo rɔ, ka wo fanan la a la kojuu tɔilu bɛɛ kan.
Isa sun ji rɔ ko
21 Mɔɔilu ye nala sun ji rɔ kanma tuma mɛn na, Isa fanan nara a sun diya ji rɔ* Wo tuma, Yaya ma bila kaso la burun.. Ka Isa to Alla matarala sun ji rɔ diya ye, sankolo lakara. 22 Alla la Nin Sɛniman ka kanba fari ɲɔɔn ta ka jii Isa kan. Kuma kan do bɔra sankolo rɔ ka a fɔ ko: «N ninkan dencɛ le i ri. I duman n yɛ kosɛbɛ!»
Isa buruju
23 Isa bɔra sun ji rɔ diya ka a la baara damira. Wo ka a tɛrɛn a ra san bisawa ɲɔɔn sɔrɔn. Mɔɔilu tɛrɛ a jatela Yusufu dencɛ le ri.
Yusufu tɛrɛ Heli den de ri.
24 Heli tɛrɛ Matati den de ri.
Matati tɛrɛ Lebi den de ri.
Lebi tɛrɛ Mɛlɛki den de ri.
Mɛlɛki tɛrɛ Janayi den de ri.
Janayi tɛrɛ Yusufu den de ri.
25 Yusufu tɛrɛ Matatiyasi den de ri.
Matatiyasi tɛrɛ Amɔsi den de ri.
Amɔsi tɛrɛ Nahɔmu den de ri.
Nahɔmu tɛrɛ Esili den de ri.
Esili tɛrɛ Nakayi den de ri.
26 Nakayi tɛrɛ Maati den de ri.
Maati tɛrɛ Matatiyasi den de ri.
Matatiyasi tɛrɛ Semi den de ri.
Semi tɛrɛ Joseki den de ri.
Joseki tɛrɛ Joda den de ri.
27 Joda tɛrɛ Jowanan den de ri.
Jowanan tɛrɛ Resa den de ri.
Resa tɛrɛ Sorobabɛli den de ri.
Sorobabɛli tɛrɛ Salatiyɛli den de ri.
Salatiyɛli tɛrɛ Nɛri den de ri.
28 Nɛri tɛrɛ Mɛlɛki den de ri.
Mɛlɛki tɛrɛ Adi den de ri.
Adi tɛrɛ Kosamu den de ri.
Kosamu tɛrɛ Elimada den de ri.
Elimada tɛrɛ Eri den de ri.
29 Eri tɛrɛ Yosuwe den de ri.
Yosuwe tɛrɛ Eliyɛsɛri den de ri.
Eliyɛsɛri tɛrɛ Jorimu den de ri.
Jorimu tɛrɛ Matati den de ri.
Matati tɛrɛ Lebi den de ri.
30 Lebi tɛrɛ Simeyɔn den de ri.
Simeyɔn tɛrɛ Juda den de ri.
Juda tɛrɛ Yusufu den de ri.
Yusufu tɛrɛ Jonamu den de ri.
Jonamu tɛrɛ Eliyakimu den de ri.
31 Eliyakimu tɛrɛ Mɛliya den de ri.
Mɛliya tɛrɛ Mɛna den de ri.
Mɛna tɛrɛ Matata den de ri.
Matata tɛrɛ Natan den de ri.
Natan tɛrɛ Mansa Dawuda den de ri.
32 Mansa Dawuda tɛrɛ Jɛsɛ den de ri.
Jɛsɛ tɛrɛ Obedi den de ri.
Obedi tɛrɛ Bowosi den de ri.
Bowosi tɛrɛ Salimɔn den de ri.
Salimɔn tɛrɛ Nasun den de ri.
33 Nasun tɛrɛ Aminadabu den de ri.
Aminadabu tɛrɛ Adimɛn den de ri.
Adimɛn tɛrɛ Arini den de ri.
Arini tɛrɛ Hɛsirɔn den de ri.
Hɛsirɔn tɛrɛ Pɛrɛsi den de ri.
Pɛrɛsi tɛrɛ Juda den de ri.
34 Juda tɛrɛ Yakuba den de ri.
Yakuba tɛrɛ Isiyaka den de ri.
Isiyaka tɛrɛ Iburahima den de ri.
Iburahima tɛrɛ Tera den de ri.
Tera tɛrɛ Nakori den de ri.
35 Nakori tɛrɛ Seruki den de ri.
Seruki tɛrɛ Rakawu den de ri.
Rakawu tɛrɛ Falɛki den de ri.
Falɛki tɛrɛ Ebɛri den de ri.
Ebɛri tɛrɛ Sala den de ri.
36 Sala tɛrɛ Kanaan den de ri.
Kanaan tɛrɛ Arifasadi den de ri.
Arifasadi tɛrɛ Sɛmu den de ri.
Sɛmu tɛrɛ Nuhan den de ri.
Nuhan tɛrɛ Lamɛki den de ri.
37 Lamɛki tɛrɛ Metusalemu den de ri.
Metusalemu tɛrɛ Enɔki den de ri.
Enɔki tɛrɛ Yarɛdi den de ri.
Yarɛdi tɛrɛ Malalɛli den de ri.
Malalɛli tɛrɛ Kenan den de ri.
38 Kenan tɛrɛ Enosi den de ri.
Enosi tɛrɛ Sɛti den de ri.
Sɛti tɛrɛ Adama den de ri.
Adama tɛrɛ Alla den de ri.