Pathien Lekhabu Inthieng Chongtung Thar Romans 9

Pathien le a mingei

1 Chong diktak ki ril ani; Khrista taka kini milak ril mu ung. Ki sielesarietna Ratha Inthieng ruoina han khom milak tho mu ung ti mi minthâr ani. 2 Ku mulung dûktongna lientak le mulung nanah boi theiloi ko dôn tie ki ti zora hin, 3 Ki mingei, taksa tienga ki richibulngei ruthûla hin Pathien khomâksâmin Khrista renga minsenin om inlang chu ku nuom ngâi. 4 Pathien mingei an nia, aman a nâingeiin a sin ngeia, an kôm a roiinpuina ngei a minlanga; chonginkhitngei* a sinpui ngeia male Balam ngei a pêk ngeia; Sava diktak an dônna; Pathien chonginkhâmngei an man ani; 5 Richibulngei inthang tak Hebrew jâisuon an nia, taksa tieng roia chu Khrista reng khom hah an rûia mi ani. Jâttin chunga roijêkpu Pathien chu tuonsôtin! minpâkin om rese, Amen.

6 Pathien chonginkhâm hah ite asena ommak ki tina ni riek mak. Israelngei nâm hah anrêngin Pathien mi ni zit mak ngei. 7 Abraham richi murdi khom anrêngin Pathien nâingei ni let uol mak ngei, “Isaac hin nu rûi isûi nîng atih,” Pathien'n a ti pe ani. 8 Ma hah taksa lama† a nâingei hah Pathien nâingei nimak ngei, chonginkhâm nâingei hah kêng Abraham richi diktaka be an ni tina ani. 9 Pathien chonginkhâm hah mahi ani “Azora taka juong nôk ka ta, Sarah'n nâipasal nei atih,” ti hi.

10 Ma vai hah nimaka, Rebecca han ei richibul Isaac renga nâi inphîr a neia. 11-12 Nâite ngei an la suok mân, sielesa an tho thei mân Pathien'n a lungdo angin inkhat lam a thang ani ti ânlang. Sintho sik ni loiin a koipu lungdo sikin Rebecca kôm, “A ulienpu'n nâipangpu sin thông atih,” Pathien'n a ti hah. 13 Pathien lekhabu'n, “Jacob ku lungkhama, aniatachu Esau chu ke heng,” ati anghan.

14 Hanchu, imo ei ti rang ani zoi? Pathien han dik zoi loina aom mini? Nitet mak. 15 Ama han Moses kôm han, “Ku nunuom moroi ka ta, ku nunuom chunga inriengmu ki tih a ti anghan.” 16 Masikin, miriem nuom sika le sin tho sika niloiin Pathien inriengmuna sikin kêng ani. 17 Pathien lekhabu'n Pharaoh kôm, “Ki sinthotheina ki minlang theina rang le rammuol pumpuia ki riming ânthang theina rang pielin rêngin nang ku phun ani,” a ti. 18 Ma anghan Pathien'n a nuom kai inriengmuna a neia, a nuom kai a mulung a minngar ngâi ani.

Pathien taksina le inriengmuna

19 Ma anghan aninte, “Pathien'n irangin mo mi a lei dem tit rêka? A lungdo hah tumo a makhal theia?” mi nin ti thei. 20 Hannirese, O miriem, Pathien makhalpu hah tumo ni ni? bêlpil han a sinpu rekel ngâi mak, “Irangin mo hi anghin mi ni sin?” ati rang mini? 21 Bêlpil tangkhat renga bêl a lut uol, anem uola sin rangin bêl sinpu han bêlpil chunga racham a dôn nimak mo?

22 Ma anghan Pathien'n a tho ngâi, a taksina le a sinthotheina minlang nuom khomrese, a taksina changpu bêl inmang kelen ruo ngei chu a tuong zajâma. 23 Hanchu, a inriengmuna bêl a roiinpuina chang ranga a minsûk, eini ngei kôma hin a roiinpuina tamtak a juong vur ani. 24 Ma anga bêlngei hah eini Judangei lâia vai niloiin Jentailngei lâi renga a koi ngei khom ei ni sa. 25 Hosea lekhabua,

“Ki mi ni ngâi loi ngei hah

‘ki mingei’ tîng ka ta.

Lungkham ku mu ngâi loi nu hah

‘Lungkhamnu’ tîng ki tih.

26 ‘Ki mingei nimak chei’ a tina mun lelê

han Pathien a ring nâingeiin bên om an tih,” tia a lei misîr anghan.

27 Isaiah khom han Israelngei chong hêt puiin “Israelngei hah tuikhangliena sietsai dôr tam khomrese ngei, mi tômte kêng sanminringa om rang an ni. 28 Pumapa'n pilchunga a roijêkna rang hah a jêk kelen rang sikin,” a ti hah. 29 Isaiah nanâkin, “Pumapa Râtinchung han suonpâr mi lei hôih pe no rese chu, Sodom anghan nîng ei ti zoia. Gomorrah angtakin nîng ei ti zoi,” tia a lei ril anghan.

Israel le Thurchisa

30 Imo ei ti rang ani zoi? Jentailngei, Pathien taka dikna zong loi ngei hah taksônna sikin dik an hong intum zoi ani. 31 Balam jôma adik chang rang bôk Pathien mi Israelngei hanchu balam angtakin dik chang makngei. 32 Itho sikin mo? Taksônnân minngam loiin sintho nân an zong sika ani. Masikin “Inpalna rang lunga” an inpal zoia. 33 Pathien lekhabu'n,

“En roh! Keiman Ziona han lungpui ka dara

mahan mingei minpal a ta,

ma lungpui han minlet ngei atih.

Tutu khom ama iem murdi'n chu mâimôkinshakin om noni ngei,” tia inziek anghan.

Romans
<
9
>

9:4 9:4: Jôk 4:22

*9:4 9:4: chonginkhitngei; miziek senkhat ngeia chu chonginkhit.

9:7 9:7: Aph 21:12

†9:8 9:8: Ma hah taksa lama a nâingei hah: Mahi Abraham richisuonpârngei Ishmael renga, Hagar a nâipasalin (Gal 4:22-23 en roh).

9:9 9:9 Aph 18:10

9:11-12 9:11-12 Aph 25:23

9:13 9:13 Mal 1:2,3

9:15 9:15 Jôk 33:19

9:17 9:17Jôk 9:16

9:20 9:20Isa 29:16; 45:9

9:25 9:25 Hos 2:23

9:26 9:26 Hos 1:10

9:27 9:27,28 Isa 10:22,23

9:29 9:29Isa 1:9

9:33 9:33 Isa 28:16