Pathien Lekhabu Inthieng Chongtung Thar John 1

Thurchisa

JOHN

Miziek Dungjûiin

Chongmaruoi

Thurchisa John miziek dungjûiin Jisua hih kumtuonga Pathien Chong, “Munisi juong changa ei lâia a omsaipu hih ani,” ti mi min riet ani (1:14). Hi lekhabu lelê hin ati anghan, hi Thurchisa hih miziek anina, abitak chu aporepungei murdi'n Jisua hih Sanminringpu leikhâmsai Pathien Nâipasal, ani ti an iem theina rang le ma an iemna sika ringna an man theina ranga ani (20:31).

Kumtuonga Pathien Chong leh Jisua nina ânzom tie roi hi chongmaruoia ânlang suole chu hi lekhabu bul tienga ei mu Jisua hi Sanminringpu leikhâmsai, Pathien Nâipasal ani minlangna sininkhêl tamtak ngeia minlang ani. Mangei ha sininkhêl minlanga omin rilminthârna chongin ajûi sa. Hi muna hin chu mi senkhatin Jisua an iema, ama jûipungei an hong nitie ngei le senkhatin chu ama an doia, iem nuom mak ngei tiin a misîr ani. Abung 13-17 sûnga hin chu Jisua sûra a omni jâna a ruoisingei leh an intûp khomna roi le jêmdela a om rangtoa an kôma incherêlna chong le mohôkna chong a pêk ngei hah achuong ani. Abung mongna tieng ngeia hin chu Jisua sûra a om roi le a chungroi an jêkna roi ngei, an jêmdelna roi le ânthoinôkna roi le ânthoinôk suonûka a ruoisingei kôm ânlârna thurchi ngei hih misîrin aom ani.

Nupangnu ânre lâitaka an sûrnu thurchi (8:1-11) hi chu kuolkhum sûnga dar ani, asik chu kuta miziek tamtak ngeia le chongmelet masa ngeia han an lei minchuong loi sika ani, senkhat nôkin chu mun danga an miziek minchuong ani.

John hin Khrista jâra kumtuong ringna manboipêk, Jisua chu lampui, chongtak le ringna ani, tia ama iem ngei kaiin atûn renga an man rang manboipêk lunghâng a tho ani. Hi Thurchisa John miziek hih rathatienga adiktaka riet minthârna ei dôn theina rangin anîngtin ringnuna ei mang uol ngâi neinunngei, tui, vâipôl, vâr, belripu le a belringei, male graperâng le amarangei mangin chong mi mintêk pe sika ani.

Asûnga chongtângpuingei

Chongmaruoi 1:1-18

Baptispu John le Jisua ruoisi masa ngei 1:19-51

Jisua mipuingei ranga sintho 2:1—12:50

Sûn mongna tienga Jerusalem sûnga le akôla Jisua sintho 13:1—19:42

Pumapa inthoinôkna le ân lârnangei 20:1-31

Chongkhârna: Galilee rama ân lâr nôkna 21:1-25

Ringna chong

1 Aphutna taka han chong alei oma; ma chong ha Pathien kôm aoma, Chong ha ke Pathien ani. 2 Aphutna tak renga han chong hah Pathien kôm ke aom ani. 3 Neinunngei murdi Pathien sin riempet an nia, ama sin loi neinun inkhat luo omak. 4 Ma Chong ha ke ringna* bulpui ani, male ma ringna hah munisi ngei minvârpu ani. 5 Ma vâr han ijîng a êlminvâra, ijîng han lei khap thei mak.

6 Pathien'n a thangtheipu inkhat a juong tîra, a riming chu John ani, 7 ha mi han vâr thurchi mingei min riet ranga juong ani, ama sikin mitinin an iem theina rangin. 8 Ama hah vâr chu nimaka; vâr thurchi mingei min riet ranga juong ani. 9 Mahi vâr diktak chu ani; rammuola a juonga mingei murdi minvârpu hi.

10 Chong hah rammuola aoma, male Pathien'n Chong mangin rammuol ha sin khomsenla, rammuolin lei riet thei maka. 11 A mingei nanâk kôm a juonga, aniatachu a mingeiin lei modôm mak ngei. 12 Hankhoma ama modôm ngei kai le ama iem ngei chu Pathien nâi nina a pêk ngei zoi. 13 Ha mingei hah chu thisena inzir nimak ngeia, taksa nuomlama ânzir khom nimak ngeia, munisi ngei pa nuomlama ânzir khom ni uol mak ngei; Pathien ha kêng an Pa ani.

14 Hanchu, Chong hah munisi juong changin, moroina le chongtaka sipin ei lâia a juong om zoi. A roiinpuina ei mua, Pathien Nâikhât roiinpuina a man hah.

15 John'n a chungroi a misîra, ân ieka, Hi mi thurchi hih ki misîr ani, “Ku nûka juong rangpu hi keima nêka lien uol ani, kên zir mâna a lei om sai ani sikin,” a tia.

16 A lungkham satvurna akipin ei rêngin ei changa, moroina chunga moroi nôkna. 17 Pathien'n Balam chongpêk Moses a pêka, aniatachu moroina le chongtak chu Jisua Khrista sikin ahong om ani. 18 Tutên Pathien la mu mak ngeia. A Nâikhât vai, Pathien ân angpui le Pa tienga om ngêt han, a thurchi a min riet zoi.

Baptispu John chongbê

(Mat 3:1-12; Mk 1:1-8; Luk 3:1-18)

19 Jerusalema Juda rachamneipungei han, “John, hah tumo ani?” ti rekel rangin ochaingei le Levi richisuonpârngei an tîra. 20 John'n ânthârtakin, “Messiah chu ni mu-ung” a lei tipe ngeia.

21 “Nônte, Tumo ni ni? Elijah mo ni ni?” tiin an rekela.

“Ni mu-ung,” tiin a thuon ngeia.

“Dêipu† mo ni ni?” tiin an rekela.

“Ni mu-ung,” tiin a thuona.

22 “Nônte tumo ni ni? mi hongtîr ngei chong kin mele theina rangin mi ril roh. Nu thurchi hi i angin mo ni ti?” an tia.

23 John'n dêipu Isaiah chong mangin a thuona:

“Keima hi ramchâra mi inkhat tânghâipu ha ki ni:

Pumapa lônna rang lampui mintûn roi!”

24 Ma thangtheipungei, Phariseengei hongtîr ngei han John an rekel nôka, 25 hanchu‡ “Messiah ni ni noa, Elijah mo, Dêipu mo luo ni ni nônte ithomo mi na baptis ngâia?” tiin an rekela. 26 John'n a thuona, “Keiman chu tui leh ka baptis'a, hannirese nin lâia hin nin riet loi mi inkhat ânding chiena. 27 Ama hah ku nûka a juong rang ania, kei chu a kekokrûi sût rang luon inhoi mu-ung,” a tia.

28 Mangei hah Bethany khuo nisuo tieng Jordan tuidung râla, John'n a baptisna ngâi muna atung ani.

Pathien Belrite

29 Anangtûka chu John'n Jisua a kôm hongin a mua male, “En ta u, Pathien Belrite rammuol sietna pêl rangpu soh,” a tia. 30 Hi mi chungroi hih ani, “Mi ku nûka a juong a oma, aniatachu keima nêka lien uol ani, keima kên zir mâna a omsai ani sikin, ki ti hah. 31 Tumo ani rang riet mu-ung, nikhomsenla, Israel mingei min riet rangin tuia baptis rangin ku juong ani.”

32 Male John'n hi thurchi hih a misîra: “Ratha hah invân renga juong chumin vasu angin a chunga a juong chum ku mu. 33 Atûntena keiman chu la riet thei mu-ung, nikhomrese tuia mi baptis ranga mi tîrpu Pathien'n, Ratha hah invân renga juong chumin mi inkhat chunga chuongin mini mûng na ta; ama hih Ratha Inthienga leh mi baptis rangpu ha ani.” 34 John'n, “Ama hah ku mu zoi, Nangni ki ril, ama hah Pathien Nâipasal ani,” a tia.

Jisua ruoisi masa ngei

35 Anangtûka chu mahan John ha a ruoisi inik ngei lehan ânding nôka, 36 Jisua lôn lâitak a mu lehan. “En ta u, Pathien Belrite soh!” a tia.

37 Ma ruoisi inik ngei han a thurchi misîr an rieta Jisua leh an se kelena. 38 Jisua ân heia, an hongjûi a mûn chu an kôm, “Khoimo nin rok?” a tipe ngeia.

Anni han, “Rabbi, khonmo no om ngâi,” tiin an thuona. (Rabbi ti chu “Minchupu” tina ani).

39 Ama han, “Hong ungla en roi,” tiin a thuona. (ma zora ha chonûktieng dâr minli inring dôr ani.) Masuole chu an jûia a omna an mua, male mani sûna zora kai chu ama leh an mang minhek zoi.

40 An lâia inkhat ha chu Andrew, Simon Peter lâibungpa ani. 41 Ama han a upa Simon a mu kelena a kôm, “Messiah hah kin mu zoi,” a tia. (hi chongbâi aomtie chu “Khrista” tina ani.) 42 Hanchu ama'n Simon hah Jisua kôm a tuonga.

Jisua'n Simon hah a lei ena, “Ni riming chu Simon, John nâipasal ni ni, hannirese Kephas, tiin nang koi an ti zoi,” a tia. (Ma hih Peter tina leh munkhat ania, aomtie chu “lungpui” tina ani.)

Jisua'n Philip le Nathanael a koi ngei

43 Anangtûka chu Jisua Galileea se rangin a masata, Philip a mua, “Ni jûi roh a tipea!” 44 (Philip ha Andrew le Peter omna khopui Bethsaida mi ani.) 45 Philip han Nathanael a mua a kôm, “A thurchi Moses'n Balam lekhabua a lei miziek le dêipungei khomin an miziek Joseph nâipasal Nazareth Jisua hah kin mu zoi,” tiin a rila.

46 Nathanael'n a kôm, “Nazareth taka neinun sa asuok thei mini?” tiin a rekela.

Philip'n a kôm, “Hongin la, en roh,” tiin a thuona.

47 Jisua'n Nathanael a kôma hong a mua, a chungroi a misîra, “Ama hi Israel mi diktak; dikloina reng dôn loi ani!” a tia.

48 Nathanael'n, “Kho angin mo mi ni riet?” tiin a rekela.

Jisua'n a kôm, “Philip'n nang a koi mân theichang kung nuoia no om lâihan nang ku mu zoi,” tiin a thuona.

49 Nathanael'n a kôm, “Minchupu,” “Pathien Nâipasal ni ni! Israelngei Rêngpa ni ni!” tiin a thuona.

50 Jisua'n a tia, “Theichang kung nuoia no om lâia nang ku mu kêng ani zoi nang ki ti sikin ni iem mini? Hi nêka neinun roiinpui uol ok la mûng ni tih!” a tipea. 51 Male Jisua'n an kôm, “Chongtak nangni ki ril: invân ajuon onga, Miriem Nâipasal chunga vântîrtonngei an juong chum le an kal, la mûng nin tih,” a tia.

John
<
1
>

*1:4 1:4: Chong ha ke ringna bulpui ani; aninônchu Sina omngei ha chong leh inzomin ringna an dôn ani.

1:6 1:6: Mat 3:1; Mk 1:4; Luk 3:1,2

1:21 1:21: Bal 18:15,18; Mal 4:5

†1:21 1:21: dêipu ha: A juon lang ranga lei sabeipu inkhat ha male Messiah juong ranga lei phuong ha.

1:23 1:23: Isa 40:3 (LXX)

‡1:25 1:25: hanchu, ma thangtheipungei, Phariseengeiin an hongtîr ngei hah; aninônchu Phariseengei hongtîra omngei ha; anni ngei.

1:51 1:51: Aph 28:12