Pathien Lekhabu Inthieng Chongtung Thar Hebrews 5

1 Ochai Inlaltak ngei ngân chu sietnangei sika inbôlna le neinunpêkngei pêk ranga miriemngei ruthûla Pathien sintho ranga a miriem champuingei renga thangin phun an ni. 2 Ma ngei khom hah lam tamtaka an râtloina sikin, ite rietloi ngei le an sietnangei chunga han an phûk ânuoi thei ngâi ani. 3 Male ha an râtloina sika han sietnangei sika inbôlna hah mingei ta rang vaia pêk loiin anni ngei ta rang khom an pêk sa anâng ani. 4 Miritna chang rang nuomin tute atheiin ochai inlaltak chang thei ngâi mak ngei. Aaron anga Pathien koi ngei vai kêng ochai inlaltak an chang thei ngâi.

5 Ma angdên han, Khrista khomin ochai inlaltak ani sika miritna hah ama ta rangin lâk mak. Manêkin, Pathien'n a kôm,

“Nangma ka Nâipasal ni ni;

aviensûn hin na Pa ko hongni zoi,” a ti ani.

6 Mun danga,

“Nangma chu Melchizedek angin

kumtuongin ochai nîng ni tih,” a ti sa.

7 Pilchunga a ring lâi han Jisua'n thina renga ama sanminring theipu Pathien kôm inringtaka iniekin le mitrithi tâk pumin chubaithona le ngêna a neia. Rangâichîn taka ân pêkna sikin Pathien'n a rangâi pe ani. 8 Aniatachu Pathien Nâipasal tatak nikhomsenla a tuongna ngeia han chongjômna ânchu ani. 9 Achukphar a hongni tena chu a chongjôm ngei ta rangin kumtuong sanminringna nâr a hongni zoi. 10 male Pathien'n Melchizedek * angin kumtuong ochai inlaltak ni rangin a phuong zoi.

Taksônna mâk loina ranga inningna

11 Ma chungroia hin misîr rang tamtak ei dôn, aniatachu a misîr minthâr ântak nin rietthei loi sikin. 12 Azora mindonin chu minchupu nithei rak ta ungla ânhoia, hannirese Pathien chongbul tak la minchu nin nâng nôk zoi ani. Burum nêk nêkin runutui nêk kêng nin la nâng rêk. 13 Tukhom runutui nêk a la nâng chu nâipang, adik le adikloi ite la riet loi ani. 14 Burum rêk chu ulienngei an thôn zong sika asalesie sensâi thei ngei ta rang ani.

5:3 5:3: Och 9:7

5:4 5:4: Jôk 28:1

5:5 5:5: Lap 2:7

5:6 5:6: Lap 110:4

5:7 5:7: Mat 26:36-46; Mk 14:32-42; Luk 22:39-46

*5:10 5:10: Melchizedek ... angin (5:6 en roh).

5:12 5:12,13: 1 Kor 3:2