Pathien Lekhabu Inthieng Chongtung Thar 1 Timothy 1

TIMOTHY

Kôma Paul Lekhamuthuon Inkhatna

Chongmaruoi

Timothy, Asia Te taka khristien ruotharte, hi a nu chu Juda ania, a pa chu Greek ani. Paul missionary sinthona hin Timothy hih a champui le nuoidoi a hongni. Paul'n Timothy kôma Lekhamuthuon Inkhatna hin abipuitak inthum akhîn uola.

Amotontaka hi lekhamuthuon hih koiindanga minchuna dikloi aom ngâi roia inningna ani. Hi minchuna, dikloi hih Judangei le Juda niloi ngei ânpolngei mindonnangei, taksatienga rammuol hih asaloi ania, sanminringna chang theina rangin chu rietna inthup liek dôna, sâk ngâi senkhat ngei ngêia, in khom neiloi rang ani ti iemna chunga ânngam ani. Hi lekhamuthuon hin koiindang inpêlna roi le Pathien biek rang roi ngei le koiindang ruoipungei le an insanpuingei nunchan dôn rang tie ngei khom a chuongsa ani. Azoinataka Jisua Khrista tîrlâm asa Timothy hih a hongni rang tie le iempungei pâl tamtak ngei tienga a roipêlnangei chungroia rilna ani.

Asûnga chongtângpuingei

Chongmaruoi 1:1-2

Koiindang le ulienngei ta ranga rilnangei 1:3—3:16

Timothy kôm a sintho chungroia rilnangei 4:1—6:21

1 Paul, Pathien mi Sanminringpu Khrista Jisua ei sabeina chongpêka Khrista Jisua tîrton renga han,

2 Taksônna jâra ka nâipasal diktak, Timothy kôm:

Pathien ei Pa le ei Pumapa Khrista Jisua han moroina, inriengmuna le inngêina nang pêk rese.

Minchuna dikloi doia inningnangei

3 Macedonia rama ke se rang lâia Ephesus taka om ranga nang ke ngên anghan atûn khom nang ke ngên nôk. Mi senkhat chongrin dikloi ngei minchu an oma, male an mong ngêt rangin chongpêk ngei roh. 4 Thurchimuruongei le suizoijât niloi richibulngei thurchi hah mâk rangin ril ngei roh; ma ngei han taksônna min rieta om, Pathien mintuo hih sin minsa nêkin inkhalnangei vai kêng an musuo ngâi. 5 Ma chongpêkin a neinunkhîn tak hih chu mulungrîl inthieng, sielesarietna ânthâr le taksônna diktak renga hong suok ngâi lungkhamna hah an dôn theina rangin ani. 6 Mi senkhatngei chu mangei lampui renga hah an pêta, amo ngei injêknangei tieng lam an invâi zoi ani. 7 An chongngei aninônchu ngamtaka an thurchi misîr nanâk luo hah riettheina dôn loiin Pathien balam minchupungei ni rang an nuom ngâi.

8 Balam hih mîn ani rang anghan a mangin chu asa ngâi ti ei riet. 9 Mahi riettit rang ani, balamngei chu misa ngei ranga sin nimaka, hannirese, balampalpungei le mipuoloingei rang, pathien dônloingei le mi nunsiengei rang, sakhuotienga mi niloi ngei aninônchu rathatienga mi niloi ngei rang, pangei mo nûngei mo athatngei rang, mithatngei rang, 10 nunchan saloingei rang, pinkuohurngei rang, mimurukpungei rang, milak thoa an thurchi dikloi taka misîr ngei rang, chongrin dik minchuna aletienga ti le sintho murdi ngei ranga sin ani. 11 Pathien roiinpuitak le satvura ompu renga Thurchi Sa phuong ranga, mi minkolpu renga ha minchuna hah man ani.

Pathien inriengmu chunga râisânachong

12 Ki sinthona râtna ni pêkpu, Khrista Jisua ei Pumapa kôm han râisânchong ki misîr. Achuk angin mi bêa, male a sinthopu'n mi phun sikin a kôm râisânchong ki misîr sa ani, 13 tiena han chu a rokôk minnapu le a nunuomlopu le a êropu lei ni khom ronga. Aniatachu taksônna ka la dôn mâna riet loia ko tho ani sikin Pathien'n inrieng mi la mu ani. 14 Male ei Pumapa'n a moroina tamtak hah taksônna le lungkhamna Khrista Jisua leh inzoma eita hah ku chunga a bun zoi. 15 Khrista'n mi nunsiengei sanminring rangin rammuola hin a juong ti hih iem a omin pomthei tatak ania: mangei lâia nunsie tak chu keima ki ni, 16 hannirese hi sika hin ani, inrieng mi mua, Jisua Khrista'n mi nunsie tak keima hin a diertie murdi minlang a nuom ani, atûn renga kumtuong ringna man ranga ama la hong iem rang ngei minenna rangin. 17 Kumtuong Rêngpa, thitheiloi le mutheiloi, Pathien kôm vai — han miritna le roiinpuina tuonsôt tuonsôtin om rese! Amen.

18 Ka nâi, Timothy, tiena nu chungroia chongphuong lei ti sai chongbâingei dungjûia hi chongpêk hi nang ki minkol ani. Indoina no doi minsa theina rangin hi chongbâingei hi râlrovongeiin mang inla, 19 male na taksônna le sielesarietna ânthâr hah dôn tit roh. Mi senkhat ngeiin an sielesarietna rangâi loiin an oma, an taksônna an siet ngâi. 20 Ma ngei lâia han Hymenaeus le Alexander ngei hah an nia, Pathien rilsiet an bângna rangin; Soitan sinthotheina kuta pêkin dûk ko tho ngei ani.

1:2 1:2: Sin 16:1

1:13 1:13: Sin 8:3; 9:4-5