Ⅺ
Ⅰ අනන්තරං පරිමාණදණ්ඩවද් ඒකෝ නලෝ මහ්‍යමදායි, ස ච දූත උපතිෂ්ඨන් මාම් අවදත්, උත්ථායේශ්වරස්‍ය මන්දිරං වේදීං තත්‍රත්‍යසේවකාංශ්ච මිමීෂ්ව|
Ⅱ කින්තු මන්දිරස්‍ය බහිඃප්‍රාඞ්ගණං ත්‍යජ න මිමීෂ්ව යතස්තද් අන්‍යජාතීයේභ්‍යෝ දත්තං, පවිත්‍රං නගරඤ්ච ද්විචත්වාරිංශන්මාසාන් යාවත් තේෂාං චරණෛ ර්මර්ද්දිෂ්‍යතේ|
Ⅲ පශ්චාත් මම ද්වාභ්‍යාං සාක්‍ෂිභ්‍යාං මයා සාමර්ථ්‍යං දායිෂ්‍යතේ තාවුෂ්ට්‍රලෝමජවස්ත්‍රපරිහිතෞ ෂෂ්ඨ්‍යධිකද්විශතාධිකසහස්‍රදිනානි යාවද් භවිෂ්‍යද්වාක්‍යානි වදිෂ්‍යතඃ|
Ⅳ තාවේව ජගදීශ්වරස්‍යාන්තිකේ තිෂ්ඨන්තෞ ජිතවෘක්‍ෂෞ දීපවෘක්‍ෂෞ ච|
Ⅴ යදි කේචිත් තෞ හිංසිතුං චේෂ්ටන්තේ තර්හි තයෝ ර්වදනාභ්‍යාම් අග්නි ර්නිර්ගත්‍ය තයෝඃ ශත්‍රූන් භස්මීකරිෂ්‍යති| යඃ කශ්චිත් තෞ හිංසිතුං චේෂ්ටතේ තේනෛවමේව විනෂ්ටව්‍යං|
Ⅵ තයෝ ර්භවිෂ්‍යද්වාක්‍යකථනදිනේෂු යථා වෘෂ්ටි ර්න ජායතේ තථා ගගනං රෝද්ධුං තයෝඃ සාමර්ථ්‍යම් අස්ති, අපරං තෝයානි ශෝණිතරූපාණි කර්ත්තුං නිජාභිලාෂාත් මුහුර්මුහුඃ සර්ව්වවිධදණ්ඩෛඃ පෘථිවීම් ආහන්තුඤ්ච තයෝඃ සාමර්ථ්‍යමස්ති|
Ⅶ අපරං තයෝඃ සාක්‍ෂ්‍යේ සමාප්තේ සති රසාතලාද් යේනෝත්ථිතව්‍යං ස පශුස්තාභ්‍යාං සහ යුද්ධ්වා තෞ ජේෂ්‍යති හනිෂ්‍යති ච|
Ⅷ තතස්තයෝඃ ප්‍රභුරපි යස්‍යාං මහාපුර‍්‍ය්‍යාං ක්‍රුශේ හතෝ (අ)ර්ථතෝ යස්‍යාඃ පාරමාර්ථිකනාමනී සිදෝමං මිසරශ්චේති තස්‍යා මහාපුර‍්‍ය්‍යාංඃ සන්නිවේශේ තයෝඃ කුණපේ ස්ථාස්‍යතඃ|
Ⅸ තතෝ නානාජාතීයා නානාවංශීයා නානාභාෂාවාදිනෝ නානාදේශීයාශ්ච බහවෝ මානවාඃ සාර්ද්ධදිනත්‍රයං තයෝඃ කුණපේ නිරීක්‍ෂිෂ්‍යන්තේ, තයෝඃ කුණපයෝඃ ශ්මශානේ ස්ථාපනං නානුඥාස්‍යන්ති|
Ⅹ පෘථිවීනිවාසිනශ්ච තයෝ ර්හේතෝරානන්දිෂ්‍යන්ති සුඛභෝගං කුර්ව්වන්තඃ පරස්පරං දානානි ප්‍රේෂයිෂ්‍යන්ති ච යතස්තාභ්‍යාං භවිෂ්‍යද්වාදිභ්‍යාං පෘථිවීනිවාසිනෝ යාතනාං ප්‍රාප්තාඃ|
Ⅺ තස්මාත් සාර්ද්ධදිනත්‍රයාත් පරම් ඊශ්වරාත් ජීවනදායක ආත්මනි තෞ ප්‍රවිෂ්ටේ තෞ චරණෛරුදතිෂ්ඨතාං, තේන යාවන්තස්තාවපශ්‍යන් තේ (අ)තීව ත්‍රාසයුක්තා අභවන්|
Ⅻ තතඃ පරං තෞ ස්වර්ගාද් උච්චෛරිදං කථයන්තං රවම් අශෘණුතාං යුවාං ස්ථානම් ඒතද් ආරෝහතාං තතස්තයෝඃ ශත්‍රුෂු නිරීක්‍ෂමාණේෂු තෞ මේඝේන ස්වර්ගම් ආරූඪවන්තෞ|
ⅩⅢ තද්දණ්ඩේ මහාභූමිකම්පේ ජාතේ පුර‍්‍ය්‍යා දශමාංශඃ පතිතඃ සප්තසහස්‍රාණි මානුෂාශ්ච තේන භූමිකම්පේන හතාඃ, අවශිෂ්ටාශ්ච භයං ගත්වා ස්වර්ගීයේශ්වරස්‍ය ප්‍රශංසාම් අකීර්ත්තයන්|
ⅩⅣ ද්විතීයඃ සන්තාපෝ ගතඃ පශ්‍ය තෘතීයඃ සන්තාපස්තූර්ණම් ආගච්ඡති|
ⅩⅤ අනන්තරං සප්තදූතේන තූර‍්‍ය්‍යාං වාදිතායාං ස්වර්ග උච්චෛඃ ස්වරෛර්වාගියං කීර්ත්තිතා, රාජත්වං ජගතෝ යද්‍යද් රාජ්‍යං තදධුනාභවත්| අස්මත්ප්‍රභෝස්තදීයාභිෂික්තස්‍ය තාරකස්‍ය ච| තේන චානන්තකාලීයං රාජත්වං ප්‍රකරිෂ්‍යතේ||
ⅩⅥ අපරම් ඊශ්වරස්‍යාන්තිකේ ස්වකීයසිංහාසනේෂූපවිෂ්ටාශ්චතුර්විංශතිප්‍රාචීනා භුවි න්‍යඞ්භූඛා භූත්වේශ්වරං ප්‍රණම්‍යාවදන්,
ⅩⅦ හේ භූත වර්ත්තමානාපි භවිෂ්‍යංශ්ච පරේශ්වර| හේ සර්ව්වශක්තිමන් ස්වාමින් වයං තේ කුර්ම්මහේ ස්තවං| යත් ත්වයා ක්‍රියතේ රාජ්‍යං ගෘහීත්වා තේ මහාබලං|
ⅩⅧ විජාතීයේෂු කුප්‍යත්සු ප්‍රාදුර්භූතා තව ක්‍රුධා| මෘතානාමපි කාලෝ (අ)සෞ විචාරෝ භවිතා යදා| භෘත්‍යාශ්ච තව යාවන්තෝ භවිෂ්‍යද්වාදිසාධවඃ| යේ ච ක්‍ෂුද්‍රා මහාන්තෝ වා නාමතස්තේ හි බිභ්‍යති| යදා සර්ව්වේභ්‍ය ඒතේභ්‍යෝ වේතනං විතරිෂ්‍යතේ| ගන්තව්‍යශ්ච යදා නාශෝ වසුධායා විනාශකෛඃ||
ⅩⅨ අනන්තරම් ඊශ්වරස්‍ය ස්වර්ගස්ථමන්දිරස්‍ය ද්වාරං මුක්තං තන්මන්දිරමධ්‍යේ ච නියමමඤ්ජූෂා දෘශ්‍යාභවත්, තේන තඩිතෝ රවාඃ ස්තනිතානි භූමිකම්පෝ ගුරුතරශිලාවෘෂ්ටිශ්චෛතානි සමභවන්|