18
Babilonia ushacänanpaj cashan
1 Chaypitanami ricarä munayniyoj anjil fiyupa achicyaycar janajpita uraycämojta. Chay achicyayninmi intëru pachata achicyaran. 2 Chay anjilmi sinchipa nimuran:
«¡Ushacashanami Babilonia!
¡Ushacashanami jatuncaray siudä!* Isa. 21.9; Jer. 51.8; Apoc. 14.8
Cananga dyablucunallanami chaycho tiyaycan.
Chaychöga ganra äbicunallanami, asyaj animalcunallanami tiyaycan.* Isa. 13.21; Jer. 50.39
3 Mañösa car juchata rurashanwanmi llapan nasyuncuna machasha.* Isa. 23.17; Jer. 51.7
Tucuy nasyuncunapa raynincunapis paywan cacusha.
Cay pachacho caj nigusyanticunapis fiyupa rïcuyasha
tucuy munashanta payta ranticushpan.»
4 Chaynöpis yapay wiyarä janaj pachapita cayno nimojta:
«Acrashä runacuna, chay siudäpita aywacuy* Isa. 48.20; Jer. 50.8; 51.6, 45
pay juchata rurashanno mana ruranayquipaj,
juchata rurashanpita castïgu chayashan gamcunata mana chayashunayquipaj.
5 Payga pasaypa juchasapami caycan.* Gén. 18.20–21; Jer. 51.9
Mana alli rurashancunataga Tayta Dios llapantami musyaycan.
6 Imanömi jucta ruraran chayno paytapis ruray.
Rurashanpita masta cutichiy.* Sal. 28.4; 137.8; Jer. 50.29
Juccunata machächir ñacachishan bäsunman quiquintaga mas aypallata camaripay.
7 Payga ima-aycayojpis car fiyupa alli-tucushpanmi cawaran.
Chayno alli goyashanpita cananga payta ñacachiy, llaquicachiy.
Payga shonguncho caynömi nej:
‹Nogaga raynanömi caycä.
Manami biyüdachu cä.
Manami imaypis ñacashächu› nir.
8 Chayno cashanpitami juc junajllacho fiyupa ñacaycuna payman chayanga.* Isa. 47.7–9
Wañuypis, ñacaypis, yargaypis illajpitami chayanga.
Nircurnami rupar fiyupa ushacanga.
Paytaga llapanpaj munayniyoj Tayta Diosmi castigangapaj.»
9 Chay siudäpita goshtay jatariycajta ricarmi llapan nasyuncunapa mandajnincuna llaquicur waganga. Chay mandajcunaga paywan cacushpanmi pasaypa juchata ruraran. Tayta Diospa contran imatapis mana manchacuypa ruraran. 10 Fiyupa castigashanta ricarmi carullapita ricarpanga. Cayno nirmi gapachaconga:
«¡Ay, ay Babilonia!
¡Munayniyojchaj carayquega!
¡Cananga illajpitachaj juc rätulla ushacäcushcanqui!»* Eze. 26.16–17
11 Chaynömi llapan nigusyanticunapis waganga chay siudä ushacashanpita. Manami canganachu pipis nigusyuncunata rantinanpaj.* Eze. 27.31, 36 12 Chay nigusyanticunaga ranticunanpaj apaj gorita, guellayta, cuyayllapaj rumicunatapis, lïnupita tëlata, sëdapita tëlata, puca chicnu tëlata, cuestaj guerupita tucuy-niraj tablacunata, cuyayllapaj marfilpita, runsipita, fyërrupita, marmolpita rurasha cajcunata, 13 canëlata, insinsuta, mïrrata, tucuy alli asyaj jachacunata, bïnuta, asëtita, jarinata, rïguta, cargacuna caj uywacunata, uyshata, cawallucunata, carrëtacunatapis. Uywaycunatapis ranticoj aruchinanpaj.* Eze. 27.12–13, 22 14 Nigusyanticunami cantapanga cayno nir:
«Cananga alli sillu micuyta manami micunquipänachu.
Shonguyqui munashanta manami tarinquipänachu.
Alli goyayniquipis ushacashanami.
Guellayniquipis llapanmi ushacasha.»
15 Babiloniata ranticur rïcuyaj nigusyanticunaga rupaycajta ricaycur wagar carullapita manchacasha ricarpanga* Eze. 27.31, 36
16 «¡Ay jatuncaray siudä!
Cuyayllapaj car lïnupita rurasha puca chicnu alli röpashami caran.
Goriwan, perlascunawan, cuyayllapaj rumicunawan adurnashami caran.
17 ¡Llapan ima-aycayquipis illajpita ushajpämi ushacasha!» nir.
Büqui manijaj runacuna, büquicho llapan arupacojcunapis carullapita ricaraycar quëdaconga.* Isa. 23.14; Eze. 27.26–30 18 Chay marcapita goshtay jatarejta ricar fiyupa waganga «Chay siudäno ¿mayllachöga cashachuraj juc siudä?» nir.* Eze. 27.32 19 Nircorga fiyupa wagar gapararmi allpatapis umanman wiñacur nenga:
«¡Ay jatuncaray siudä!
Chaychömi büquiyojcuna nigusyunta ranticur llapanpis rïcuyasha.
Cananga illajpitachaj juc rätulla ushacäcusha.»* Eze. 27.30–34
20 Syëlucho cajcuna, fiyupa cushicuy.* Deut. 32.43; Jer. 51.48
Tayta Diospa apostulnincuna, profëtancuna, llapan yäracojcunapis cushicuy.
Gamcunata ñacachishushayquipitami Tayta Dios chay siudäta ushacächisha.
21 Chaura munayniyoj anjil mulinu rumita-niraj jogarcur lamarman jitarir niran:
«Chaynömi päsashunquipaj jatuncaray Babilonia siudätaga.* Jer. 51.63–64
Mananami imaypis ricashunquipänachu.* Eze. 26.21
22 Mananami cantashancunapis wiyacangapänachu.
Mananami imaypis wiyacanganachu cälliquicunacho arpa, pincullu ni trompëta wagashanpis.* Isa. 24.8; Eze. 26.13
Gam cajchöga mananami ima aruyta yachajcunapis canganachu.
Mulinu agashanpis manami wiyacanganachu.
23 Pipis mana tiyaptin achquipis mananami achicyanganachu.
Casaray fistapis mananami canganachu.* Jer. 7.34; 25.10
Munayniyoj nigusyanticunapis manami canganachu.
Brüju car may-chaychöpis tiyaj runacunata engañashayquipitami chayno ushacanquipaj.»
24 Chay siudä runacunami juchayoj caycan Tayta Diospa profëtancunata, yäracojcunata may-chaychöpis wañuchishanpita. Chaypitami paycunaga castigasha canga.* Jer. 51.49
*18:2 Isa. 21.9; Jer. 51.8; Apoc. 14.8
*18:2 Isa. 13.21; Jer. 50.39
*18:3 Isa. 23.17; Jer. 51.7
*18:4 Isa. 48.20; Jer. 50.8; 51.6, 45
*18:5 Gén. 18.20–21; Jer. 51.9
*18:6 Sal. 28.4; 137.8; Jer. 50.29
*18:8 Isa. 47.7–9
*18:10 Eze. 26.16–17
*18:11 Eze. 27.31, 36
*18:13 Eze. 27.12–13, 22
*18:15 Eze. 27.31, 36
*18:17 Isa. 23.14; Eze. 27.26–30
*18:18 Eze. 27.32
*18:19 Eze. 27.30–34
*18:20 Deut. 32.43; Jer. 51.48
*18:21 Jer. 51.63–64
*18:21 Eze. 26.21
*18:22 Isa. 24.8; Eze. 26.13
*18:23 Jer. 7.34; 25.10
*18:24 Jer. 51.49