1 Eto jangu indari iji vahai Iesu na Pharisee ari embo peni amita bande ta pondo indesi pambuto mihinu embomeni areto Iesu kogue mihio 2 embo vahai amo ingeni te utu te buru karu ari avo mihinu kito 3 ke pepeni kiari embopo te Pharisee ari embopo te ta degi ke einge ena, “Eto embo na jangu indari iji te embo kojasuja amo ke pepeni poekaute mo mane poekau?” ainge enu 4 embomeni ke mine ae eo kito embo amita utu ingeni buru karu ari avo enu isikenu, ikenu veto pahunu 5 embomeni mihia amita degi ke einge eto ingina, “Eto ungo embo amita meni retemo o cow rete avo umo timbari hoto ta veasuja ungo embo amuna jangu indari iji te amo jigito gorukau vihou?” ainge eto inginu 6 enana ke mine ari inono ae ea.

7 Eto pondo indora oru ea embomeni na bande jo ta horeto embo peni ta arumbari besi avo kito arumbihio Iesu na kito embomeni ta degi timu hatirari ke einge ena, 8 “Ungo pondo ta puvuto na embo peni ra ainge ijie embo peni ta avo arumba ai ta arumbavojo. Eto ainge aisoa amo embo peni be avo puvutohururou 9 pondo mamo na kito no avo arumba avo amita degi ta ikasi ue umo au ereto ku ta pambuto arumbihe me kesoa. 10 Rate umo pondo indoa oru aro pambuto kito pondo bande ta horeto ku hena ta arumbejo eto pondo mamo na puvuto umo kito au umo embo ta tihi buju ta arumbihirou embomeni na kito jakeka aisora. 11 Eto amita be amo embo amuna na araha embora ainge ijie puvuresuja amo au maevo aisuja rate embo amuna na embo mane maevo ra ijie puvuresuja amina araha embo aisuja.” ainge ijie 12 Iesu na pondo mamo ta degi ke einge ena, “No pondo amo peni retemo isaparami no namei kamei te no da vahai embomeni te javo vahai embomeni te haja vaja embopo te oru mane aisoa, amo no pondo mine ikaro iraesuja avoeto. 13 Rate pondo asi uje eto kito amo popora embo hoivo embo tihi kuru ari embo kini humbari embo pondo mine ikari haite mane embo avo oru ao puvuto no pondo indesora 14 eto ambota embo jajavotoho vasiri te erasora iji no pondo ta mine humbuhe tunga javotoho aisoa” ainge ijinu.

15 Embo vahai gaga ta arumbeto mihina amina ingito ke einge ena, “Eto embo amuna God ta tihi jigari degi ta horeto pondo indesuja amina tunga javotoho be aisuja,” ainge enu 16 Iesu na amita degi hihi einge tirina, “Embo vahai na pondo pajire be humbuto embo isapamane oru ena 17 eto pondo iji puvunu pondo mamo na pure embo vahai ikenu pambuto oru ari embo ta degi ke einge ena, ‘Pondo mahu nununga ehija indesi have’ ainge enu 18 enana pondo indari uje ae ue degi serikari ke ijie embo vahai amina ke nei einge ena, ‘Ajato erena na enda vahai avo koro na ombuto humbuto pambuto kesi uje ere ona avoeto mane pambasona’ ainge enu 19 embo nei na einge ena, ‘Aja to erena rate na nau pure ta enda kovari o cow tapa 10 ainge koro na ombuto humbuto pambuto kesi uje ere ona avoeto mane pambasona,’ ainge enu 20 embo nei na ke einge ena, ‘Aja to erena rate na kakara eha jimbena avoeto mane pambasona.’ ke ainge pere eo 21 ingito egerembeto pambuto pondo mamo ta degi enu ingito tumo ue amita pure embo ta degi ke einge ena, ‘Aravora te degi ari na ue hoivo embopo te kini humbari embopo te popora embopo te tihi kuru ari embopo te tapa ejo pondo ta hurore,’ ainge enu 22 pambuto egerembeto puvuto pondo mamo ta degi ke einge ena, ‘Ke ehea avo tapa ehene irae ehija rate pondo pajire be avoeto pe nei mihia’ ainge enu 23 ke einge ena ‘Na nau bande avo embo na enetaja uje ere ona avoeto pure degi tapa ta pahue ke sovera na eto ejo puvurore 24 eto erena ingijo, embomeni tapa mahu oru uena amina nau pondo ta seha gamo mane indito kesora’.” ainge ena.

25 Eto embomeni isapamane Iesu ga degi ta pahuo Iesu na ahereketo embomeni ta degi ke einge ena, 26 “Eto embo amuna na ambo ambo asi uje aisuja rate amita mama te aja te meniundi te namei kamei te du emone te amita vasiri te tapa toari inono ae aisuja amo ambotani nau ari haite manera.

27 Eto embo amuna amita ji atahu bouka koho ta humbuto na ambo ambo ari uje ae aisuja amo nau ambotani mane aisuja. 28 Ari amo eingera, Eto embo na bande pajire be ihiketo gerikasi ue amita koro heka eto inonora ijie gerikasuja. 29 Eto kihi koro heka ae sio gerikasuja amo tutuvi hurukasuja te koro irae au toau irirou embo na kogue urumbihe 30 ke einge aisora, ‘Embo na bande peni ikasi tutuvi hurehija rate ari inono ae ra.’ 31 Eto ke nei amo king emita isoro embopo tapa 10,000 amina king nei amita isoro embopo tapa 20,000 amiga isoro sio mane aisuja te kihi amita kiari embopo ga hihi tirito kito inono eto isoro aisuja, 32 rate hihi tirihie dembari inono ae kito peka humbari embopo ikau pambuto king nei ga peka humbari ta hihi tiresora. 33 Avoeto erena amo embo vahai amuna amita donda te vasiri te tapa toari uje ae aisuja amo nau ambotani ari inono manera.

34 Ungo kiarira, haso ta gamo irae sigeto veto pambasuja amo haso ta gamo egerembeto puvurari inono aera. 35 Eto mu veto pambasuja amita soka amo enda ta gamo ikari inono ae ra eto se hoto ta sivo ari inono ae avoeto gosukagora. Ungo ojete kito ingivujo” ainge ena.