1 Eto kivujo, God Mamo na ungotena osa pajire be ere ua avoeto ungotena amita meniundi ke eaguja avoeto ungotena amita meniundira te enda embomeni God kiae avoeto ungotenamote tapa kiaera. 2 Eto nau tunga humbari embomeni ungotena eha emo God ta meniundira te ambota embo ta hamo uhu hajire do ainge asuja amo God na ae ingae rate ungotena kiari amo Keriso amo hajire do ainge ere ua amo egerembeto puvurou tihi na be kesora avoeto amita tombu vahai ainge aisora. 3 Eto Keriso amo tongopa ambu avoeto Keriso ainge dombo asi simba mihia embo amina amita vasiri ta tongopa irae eaguja. 4 Eto embo amuna ari sapura aisuja amo God ta ke pepeni poekasuja eto ke be amo ari sasapura tapa amo God ta ke peni avo poekasora. 5 Eto ungo kiarira amo Keriso na embo ta ari sapura humbuto pambasi enda ta puvuna eto amita degi ari sapura tapa amo irae 6 avoeto embo amita jo ta iresuja amo ari sapura mahainge aisuja embo amo God kiae be kiaera. 7-8 Nau meniundi ungo embo nei ta ke ambo ambo ue degi aemo ta pambavojo, Keriso amo ari javotoho ari embo eto embo ari javotoho aisuja amite tapa God ta tihi ta embo javotoho aisuja, rate Satan na ihikari ta eto ari sapura ere ova ainge embo amuna ari sapura mahainge aisuja amo Satan ta tohora. Rate Satan ta pure sosou asi God ta Meni enda ta puvuna. 9 Eto God ta meniundi na ari sapura mane aisora amo God hajire avoeto, eto God amo enana ta Mamo avoeto ari sapura amo toasora. 10 Eto God ta meniundi davore Satan ta meniundi davore amita etokiari erevira, eto embo na ari sapura eto namei osa ae asuja embo amo God ta meni manera.

11 Eto ke peni ihikari ta ingihava amo ungo osa mine ara evujo 12 amo embo Cain na ena ainge mane aisova amo Satan ta toho ena avoeto namei tenu pehena. Eto tenu pehena amita be amo Cain na amo ari sapura ere uahija eto namei Abel amo ari javotoho uoi kogue tunga osaga ere uahija avoeto tenu pehena 13 ainge dombo ungo ari javotoho ere ova avo enda embo na kito ungo uje ae ururoro kito hotembari nei avojo. 14 Eto ungotena namei osa eagora avoeto ungotena pehari toto vasiri ta embari embopo amo ungotena kogora, rate namei osa ae embo amo pehari ta mahainge iraguja. 15 Eto namei uje ae eaguja embo amo embo teore pehagora ainge ra eto tari pehari embo amina vasiri te daroho mane iresuja. 16 Eto namei osa ari amo eingera: eto Iesu na ungotena avoeto vasiri amita avo toto pehena ainge eto ungotena ue namei kamei avoeto ungotenau vasiri toari haite aisora 17 eto namei donda te amina namei nei donda ambu avo kito jo ae aisuja amina God ta osa ari amita jo ta daingeto irou? 18 Avoeto nau meniundi teho pe na ivivi na ijirou mane osa aisora te ari be avo ururo ke be aisora.

19 Eto ari ainge ue amo ungotenau hotembari jo ta avo pehumba mane aisora te God ta meniundi be hotembasora. 20 Eto ungotenau jo ta hotembari avo pehumba ururo God sovera isapamane te amina ungotenau hotembari tapa avo kito hondate aisuja. 21-22 Avoeto nau osa ari embomeni ungotenau hotembari jo ta amita pehumba irae kito God ta degi pari ijie amita tombu ta heteto pari ue jopapa mane aisora te ungotena amita uje tapa eto amita ke tapa amo agi ereora avoeto do penunu aisora amo ikau humbasora. 23 Eto ungotena do ara amita ke peni ikehija amo erevira: Ungotena God ta Meni Iesu Keriso hotembihe ke be ijie osa mine ara ue irora ehija 24 eto amuna God ta ke agi eaguja embo amo God ta jo ta mihia eto God amo embo amita jo ta mihia, eto amuna ungotenau jo ta iraguja amita hajire amo amita Ahihi Otohu avo ungotenau jo ta ikaguja.