5
Waa Njee nu ɛ kocɛn keebacɛ bilay bi bisooshwiy
1 10:2; Yɛsa 29:11; Ɛsek 2:9-10; Dan 12:4, 9Ɛ me mbvuu nɛ n'yɛn ŋwa' mvu le ɛ̂ ɛbo ke ɛcɛɛy ke wee wvù to shilɛɛ yî kawla wɛ le, ɛ bó ɛ saŋ ɛnte bô ɛkfuŋ ɛ kɛwe lo, ɛ lacɛ mondvuum mosooshwiy bô kelay. 2 Ɛ me nɛ n'yɛn tɛn nceendaa Nyo' mvu wvù tɛmyi le ɛ wvú wamte foweɛwe biite lɛ, “Ɛ̀ nu yɛɛ dvú wvù nu ɛ kocɛn keebacɛ bilay bin, efay ŋwa' wvun?” 3 Ɛ wee faŋɛ yaa nu dvú fowe kɛnɛɛ yî nshɛ le kɛnɛɛ ɛkuse jo nshɛ, wvù nulo efay ŋwa' wvudvu kɛnɛɛ etaa ɛnte jo ŋwa' wvudvu kɛ. 4 Ɛ me mbee kpwe baay lɛ wee to baa nu dvú wvù nu ɛ kocɛn wvù nulo eyene ŋwa' wvudvu kɛnɛɛ taa ɛnte jodvu kɛ. 5 4:4; Keŋ 49:9; Mat 1:1; Lum 1:3-4; Ibu 7:14Ɛ wee mvu ŋgoo bocɛ' bo bonyii le ba gay ɛ̂ me lɛ, “Fo wo ebeelè kɛ. Yekɛ eyuw, wee wvù bó teŋe lɛ Bvule wvu ɛ̂ kfuu di Juda le bvuu teŋe tɛn lɛ Biay yì san ɛ̂ kfuu di Nfon Dawe le nu ɛ so wase, ɛ ɛ̀ nu wvú wvù nulo ebacɛ bilay bi bisooshwiy bidvu efay ŋwa' wvudvu.” * Wee wvun wvù bó teŋe lɛ Bvule wvu ɛ̂ kfuu di Juda le noo lɛ Biay yì san ɛ̂ kfuu di Nfon Dawe le, nu Mboyse wvù Nyo' to kawɛɛ.
6 4:6-7; 5:9, 12; 6; 7:17; 12:11; 13:8; Yɛsa 53:7; Yɛli 11:19; Jon 1:29; 1Bi 1:19; 4:5; Saka 3:9Ɛ me nɛ n'yɛn Waa Njee le ɛ wvú leeme ɛntelɛŋ jo kawla bô mwɛɛm mvu mvuyuum mvu mvunɛm mwɛ noo bocɛ' bo bonyii le ba, ɛ wvú nu kɛ diɛwɛ bó nu ɛ sɛɛ. Wvú to kɛŋke bitoŋ bisooshwiy bô ɛjisɛ ɛsooshwiy. Ɛjisɛ yodvu nu biyoy bi Nyo' le bi bisooshwiy bì wvú nu ɛ tum bí ɛ buy ɛ gɛn yî ɛkolɛ ke nshɛ le kecii. 7 4:2, 9; 5:1, 13; 6:16; 7:10, 15; 19:4; 20:11; 21:5; 1Bfn 22:19; Yɛsa 6:1; Ɛsek 1:26-28; 10:1Ɛ Waa Njee wvudvu mum gɛn fi ŋwa' wɛ ɛ̂ ɛbo ke ɛcɛɛy ke wee wɛ wvù to nu ɛ shii yî kawla le. 8 8:3-4; Mben 141:2; 15:2No wvú fi ŋwa' wvudvu nonɛn, ɛ mwɛɛm mvu mvuyuum mvu mvunɛm mwɛ bô bocɛ' bo bonyii le bo mbaanfiɛɛ ncow bonɛw ba mum gbwe gɛn fokuse fwe dvu Waa Njee wvudvu. Wee mwaaŋ mwaaŋ bó le to kɛŋke kome bô kentee kè bó fɛ bô ketwaa ke bigew e kè yɛɛle, ɛ jiin nu ɛ dí ɛ yiŋsɛn jó. Ɛ jiin din nu bunle yi bonyii bò ɛ̀ nu bo Nyo' le. 9 4:11; 5:6; 7:9; 14:3; Mben 96:1Ɛ mwɛɛm mwɛ bô bocɛ' bo bonyii le ba mum yem ŋkiee mvu wvu fwɛ ɛ wvú jemyi lɛ,
“Ɛ̀ nu wo wvù nu ɛ kocɛn keefi ŋwa' wvudvu
ebacɛ bilay bidvu,
njefo bó to nu ɛ sɛɛ wo ɛ ɛlɛmɛ kuw sum bonyii
can kebefɛ le nya bó ɛ̂ Nyo'.
Ɛ bonyii ban buy ɛ̂ dikfuu le dicii, díɛw yicii,
dikfuu di bonyii le dicii noo bitum e bicii.
10 1:6Wo nu ɛ nya bó bvunfon ɛ ge bó ɛ no nu bocee ncese
bo Nyo' wesebeene le.
Ɛ bó nu ke esaake yî nshɛ le.”
11 Job 1:6; Dan 7:10; Ibu 12:22Ɛ me ndioo mbvuu ntaale, nɛ n'yuw diɛw bonceendaa bo Nyo' le ɛ bó nu lo bontfuke le bontfuke le bô bomala le bomala le. Bó to nu ɛ leemɛn kɛɛkɛɛ kawla bô mwɛɛm mvu mvuyuum mwɛ noo bocɛ' ba. 12 4:11Bó to yemte foweɛwe gayte lɛ,
“Waa Njee wvù bó to sɛlɛɛ,
ɛ̀ nu wvú wvù nu ɛ kocɛn keekɛŋkɛ
mvuŋgay bô kpwaw noo bvufee bvu baay
noo diee dì kuuke noo n'wvum noo bvukukɛ noo mbense.”
13 Mben 150:6; Fili 2:10Ɛ me nɛ n'yuw ɛ mwɛɛm mvunciim mvù Nyo' to bomɛɛ mvù nu fowe noo yî nshɛ le noo ɛkuse jo nshɛ noo ɛ̂ joo yi baay e, naa mwɛɛm mvunciim mvù nu mondvuum man e, ɛ mvú yemte lɛ,
“Mbense bô n'wvum noo bvukukɛ noo mvuŋgay
nu ɛ ɛ̀ kɛŋke wvú wvuwɛ wvù nu ɛ shii yî kawla le
noo Waa Njee wvun sekecii sɛ ŋka!”
14 No mvú yem nonɛn, ɛ mwɛɛm mvu mvuyuum mvu mvunɛm mwɛ bee lɛ, “Fí enù nonɛn!” Ɛ bocɛ' bo bonyii le ba gbwe gɛn fokuse nya mbense wvu baay.
5:1 10:2; Yɛsa 29:11; Ɛsek 2:9-10; Dan 12:4, 9
5:5 4:4; Keŋ 49:9; Mat 1:1; Lum 1:3-4; Ibu 7:14
*5:5 Wee wvun wvù bó teŋe lɛ Bvule wvu ɛ̂ kfuu di Juda le noo lɛ Biay yì san ɛ̂ kfuu di Nfon Dawe le, nu Mboyse wvù Nyo' to kawɛɛ.
5:6 4:6-7; 5:9, 12; 6; 7:17; 12:11; 13:8; Yɛsa 53:7; Yɛli 11:19; Jon 1:29; 1Bi 1:19; 4:5; Saka 3:9
5:7 4:2, 9; 5:1, 13; 6:16; 7:10, 15; 19:4; 20:11; 21:5; 1Bfn 22:19; Yɛsa 6:1; Ɛsek 1:26-28; 10:1
5:8 8:3-4; Mben 141:2; 15:2
5:9 4:11; 5:6; 7:9; 14:3; Mben 96:1
5:10 1:6
5:11 Job 1:6; Dan 7:10; Ibu 12:22
5:12 4:11
5:13 Mben 150:6; Fili 2:10