12
1 Othanda ukuqondiswa uthanda ulwazi,
kodwa ozonda ukukhuzwa uyisithutha.
2 Umuntu olungileyo uthola umusa kuThixo,
kodwa uThixo uyamlahla owakha amacebo amabi.
3 Umuntu angazake amiswe yibubi,
kodwa olungileyo angeke aquphuke.
4 Umfazi olesimilo ungumqhele womkakhe,
kodwa umfazi oyangisayo unjengokubola kwamathambo akhe.
5 Izimiso zabalungileyo ziqondile,
kodwa izeluleko zababi ziyinkohliso.
6 Amazwi ababi alindele ukuchitha igazi,
kodwa inkulumo yabalungileyo iyabakhulula.
7 Abantu ababi bayachithwa bangabe besaba khona,
kodwa indlu yolungileyo imi izinzile.
8 Umuntu udunyiswa ngokuhlakanipha kwakhe,
kodwa abantu abalengqondo ezimbi bayeyiswa.
9 Kungcono ukungabi ngubani kodwa ulesisebenzi,
kulokuzitshaya ulutho kodwa uswela lokudla.
10 Umuntu olungileyo uyayinanzelela imfuyo yakhe
kodwa okuhle komuntu omubi yilunya.
11 Lowo osebenza nzima emasimini akhe uzathola ukudla okunengi,
kodwa lowo ophika ngezifiso eziyize akalangqondo.
12 Ababi bahawukela impango yezigangi,
kodwa impande yabalungileyo imi iqinile.
13 Umuntu omubi uthiyeka ngenkulumo yakhe yesono,
kodwa umuntu olungileyo uyaphepha enkathazweni.
14 Umuntu uzuza okuhle ngamazwi omlomo wakhe,
umsebenzi wezandla zakhe umnika inzuzo.
15 Indlela yesiwula ikhanya iqondile kuso,
kodwa umuntu ohlakaniphileyo uyalalela izeluleko.
16 Isiwula siyaphangisa ukuthukuthela,
kodwa umuntu olengqondo kananzi loba ethukwa.
17 Umfakazi oleqiniso upha ubufakazi obuqondileyo,
kodwa umfakazi ongathembekanga ukhuluma amanga.
18 Amazwi okubhuda agwaza njengenkemba,
kodwa ulimi lohlakaniphileyo luyelapha.
19 Izindebe zeqiniso zimi lanini,
kodwa ulimi olulamanga luma umzuzwana nje.
20 Inhliziyo zabaceba ububi zigcwele inkohliso,
kodwa kulokuthokoza kwabaletha ukuthula.
21 Akukho ngozi ewela abalungileyo,
kodwa izigangi zikhulelwa zinhlupho.
22 UThixo uyazenyanya izindlela ezilamanga,
kodwa uyathokoza ngabantu abaleqiniso.
23 Umuntu olengqondo kazitshengiseli ulwazi lwakhe,
kodwa iziwula ziyabutshengisela ubuthutha bazo.
24 Izandla ezikhutheleyo zizaletha inhlalakahle,
kodwa ubuvila budonsela ekugqilazweni.
25 Inhliziyo ekhathazekileyo iyamcakisa umuntu,
kodwa ilizwi elilomusa liyamthokozisa.
26 Umuntu olungileyo ukhetha abangane ngonanzelelo,
kodwa indlela yababi iyabaphumputhekisa.
27 Umzingeli olivila kazuzi nyama yokosa,
kodwa umuntu okhutheleyo uyazibula ngenotho yakhe.
28 Endleleni yokulunga kulokuphila,
kuleyondlela kulokuphila okungapheliyo.