3
Hilu ndramat kanhilingi nongna Ngindrai pwi
1 Pe mwat ara kan hamou mwelenga hu kan masikene mepo Yapan Ngindrai imbusiy, pe kultuw tan para kisuhuhuri nongan ara namandran iya. Pe mwat isike pihin ipa, “Kiya, Ngindrai ipwai ndrokonan isata walu tehe andre walu kaniyan mbuwakei masih iripo piyang iye pwi?”
2 Pwen pihin ipwai iyata mwat ipa, “Yolu andre kayan mbuwakei masikene ita piyang. 3 Hapeko Ngindrai ipwatisingiy isa kili yolu tehe yolu mbuna kayan mbuwakei para kei hakou o iripo ndrokolo piyang. Ngindrai kinpwatisingiy pwen kinsa kili yolu toro: ‘Walu mbunakayan ndre mbunakambultuwe mbuwakei ara. Kapa walu kambusiy, andre walu kamat.’ ”
4 Pwen mwat ipwai iya kili pihin ipa, “Walu andre kanmat pwi! 5 Ngindrai tanan kapa walu kayan andre mara walu kileu, pe walu karayah tehe yiy opu, pe andre walu kapahasani hiyan pe mwomwan.”
6 Pwen pe pihin inime mbuwakei ara mwayih para kaniyai pe lahayan iya, iya maran, pe ihingorowei tehe mbuwakei ara andre kiyki lohongai hiyan kiya kili yiy. Pwen pe irihi sih pe iyniy, pe iyki haroh iya kili nambuyun. 7 Pwen pe mara hilu malmou kene ara ileu, pe hilu nimei tehe mwaye hilu ara pwi. Pwen pe hilu rihi hu yowi pik* Eng: fig leaves hayah, hilsoruwei, pe hilrahasi hilu iyaliy.
8 Kol ipiyah pe inowu, pwen hilu hilingi ngasa Yapan Ngindrai isa iho rikai nalpiyang. Pe hilu malohowe iya iho mwelenga hu kei para piyang. 9 Pwen Yapan Ngindrai iyoh Atam pe ipa, “Wou ataleheh?”
10 Pwen Atam isomwiy ipa, “Yo uhulingi ngasam iripo piyang, pe yo ara mwaye pwi, pwen pe unoh pe ukohoni yo.”
11 Pe Yapan Ngindrai isikei ipa, “Hiyeh ipwai satam tehe mwayem pwi? Wou pwokene aniyan mbuwakei nepo upwatisingiy satam para mbunayan ara.”
12 Pwen Atam ipa toro: “Pihin nepo aiki yiy isa iripo kili yo ara, iyki mbuwakei ara isano pe uniy.”
13 Pwen pe Yapan Ngindrai isike pihin ipa, “Paratapeh arakultuw tehen tora?”
Pe ipwai iyatan ipa, “Mwat ara ipwahihiri yo pe uniy.”
Ngindrai ipwatisingi nongnan iya kili hilu ndramat pe mwat
14 Pwen pe Yapan Ngindrai ipwai iyata mwat ipa, “Wou ambusiy tehen tora,
pwen pe mahapo uten anam tehe wou andre akuni nopwaran namandran iya mwalinga hu kan
pe hu melit masih!
Pe andre aro selek kiya pundriyam
pe aroyan kohu pwan tehen torako lang masih.
15 Pe yo andre kumbusi mwelem pe mwele pihin,
pe mwele ndrayem hu pe ndraye pihin ara andre kiroho mwomwan.
Pe ndraye pihin hamou ara andre kiraluluwi payam,
pe wou andre ayantani mbutindrikan.”
16 Pe yiy ipwai iya kili pihin ipa,
“Yo andre kuiki nopwaran namandran kisa kili wou kiro mwonen mapwindriyam.
Pe kiro mwonen lang para amwalahiy ta mbunah, andre akuni ngandran namandran.
Hapeko wou andre aro namili nambuyum manau,
pe wou andre aro pahandran.”
17 Pe Yapan Ngindrai ipwai iya kili Atam ipa, “Nahapo anhilingi nongna nambuyum, pe anyani mbuwakei nepo uiki songot iyaliy para walu mbunakayan. Mwomwan tam o ambusiy,
pwen uten ana pwan tehe
mbulyam masih narombusi andre aro pisingat
lang sih tehe sih tehen torako.
18 Hu malkei maporon pe hu mwisi maskei handra-handra andre hu kalek pe karamburuhi pingem.
Pe wou andre aroyan mbuwakei para yangiy opu.
19 Andre apombulen pe apisingat kiya mwomwan,
pe tehen torako pwen anandrinam andre kirayah pe ayan ipo aya mat.
Yo umangsani wou iya pwan,
pe andre amat pe andre amui aya pwan i.”
20 Pe Atam iyoh ngala nambuyun ara Ewa, paratesah, andre yiy kisarayah tinahu ndramat masih mwalehu.† Iya nongna kolo hu Hipuru, ngalan “Ewa” ara ipa “mwalen”; Eng: “Eve” means “living”; TP: Long tok Hibru, nem “Iv” i klostu wankain olsem dispela tok “... i gat laip.”
21 Pe Yapan Ngindrai imbusi koiwe hilu iya kapilo kan, pe iykiy iya kili Atam pe nambuyun pe hilrahasi hilu iyaliy.
Ngindrai irase Atam hilu Ewa hilya mawen piyang Yiten
22 Pe Yapan Ngindrai ipwai ipa, “Ndramat mahapo kinsarayah tehe worou opu, pe ipahasani hiyan pe mwomwan. Hilu ara, kanna hiyan para hilu kambultuwe mbuwakeye taleh pe hilu kayan pe hilu kaleh koro lang masih, ara pwi.” 23 Pwen pe Yapan Ngindrai irase hilu ya mawen piyang Yiten, para hilu kaya pe kapo mbulen ka pwan nepo hilu tayah toliy. 24 Iyamulan para irase hilu ya mawen piyang Yiten, iyki angelou hamou iwiri semen hapai tehe mwan ngannganan iya iro tine iya pwen te kup para piyang Yiten pe iro rapaiwani haroh iya haroh para memerani hilu andre kansa pakeh kili keye taleh ara pwi.