John Diang
CHONGMALAR
Chonglamsaat
Chongmalar larik hi Inzootna Kathar (NT) insuona larik eii. Hiwa larik hi Jisu Christa inneisuo kum soomkuo leira-nga pheiweiya tirton John in imajia eii (1:1). Tirton John in John Dungjuiya Chongkahoi, 1 John, 2 John halli 3 John larik hi-um amajia. John hi “Jisu'n iminriang pa” tia injetna (Jn. 13:23). John in Jisu Christa jarra chongkahoi aril jarra ama hi Patmos inti tuiram khan insurra inruoi, hiwa larik hi Patmos makheiya imajia eii (1:9).
John in hiwa larik amajiana jarchu hiwa larik kateel mi rakip diang Jisu Christa diang huoikajou eru halli ngamnaru ajarchu Jisu Christa juokirnasik apha kha anaijei (1:3; 22:7). Hiwa larik hi christian rakipdiang imajia eii takkha arup 2-3 hichu koisuok sari diang imajia eii. John imajia hiwa larik hi chongmalar eii (1:3), John in mangtalarra imu rakip ngaikha hiwa larik suunghin majia nasik bit-ah ramil angjet inliingna. Hiwa larik hi Inzootna Maruo (OT) larik Zachariah 6:1-8 chong khale in-ang. Hiwa larik hinna inchel tampalooi sari li kheengkam sari hi Pathian in Egypt mi ngai rachak nasik-ah ijuopeii rirai khale in-ang (Suok. 7-9). Hiwa larik in aheknasi nikhuo jarra aril halli ahekna nikhuoni khan Jisu'n raal matorsik eii halli Jisu diang ngamna kanei mi rakip in Jisu le kumsoot inom sik eii tijarra um aril. Ahekna khet-ah hiwa larik in Jisu innottheiya juosik eii tia rilna anei.
Asuungnga kaom Chong
1. John in ama hi tu ka-eme halli mangtalar ngaihi angtho tholi kimume tijarra rilla phutna anei (1:1-20)
2. Jisu diangnga chong ngaihi koisuok sari diang pena anei (2:1–3:22)
3. Madanna jetnabi sari indeeng larik khat-um tampalooi sari jarra rilna anei (4:1–8:5; 8:6–11:19)
4. Pasal naiteii inkhatli Saraikhuo alu sari indou in raal intho jarra John in rilna anei (12:1–14:20)
5. Rirai kheengkam sari jarra John in rilna anei (15:1–16:18)
6. Pathian in inhalpui ngaikha marwaanna raal i-mator jarra John in rilna anei (17:1–20:15)
7. Ahekna nikhuoni kajuosik akathar marwaan li akathar nuoipil jarra John in rilna anei (21:1–22:21)
1
1 Hiwa larik hin Jisu Christa in imalar ngaikha injia. Pathian in ama suokngai diang innot theiya kasuoksik ngaikha minmunasik Christa diang amalar. Christa in asuok John diang ama marwaan tirton inkhat ajuotirra aminjetjei, 2 Halli John in imu rakip ngaikha arilsuokjei. Hiwa hi-eii Pathian diangnga inphut chongpui khat-um Jisu Christa in imalarjei akadik ngaikha. 3 Hiwa larik akateel mi kha rawaan katha eii, hiwa larik suungnga injia chongmalar chongpui ngai karangai khat-um akajui mi ngaikha rawaan katha in-eii! Ajarchu hiwa rakip suoknasik apha kha anaijei.
Koisuok Sari diang Chong majia
4 John diangnga inphut Asia ramsuungnga kaom koisuok sari ngaidiang:
Tuun Pathian ka-eii, matiang um Pathian ka eii, khat-um akajuosik Pathian diangnga inphut, halli ama reng in-ongna ma-ah kaom ratha sari diangnga inphut, Suok 3:14; Chonglar 4:5
5 khat-um ngamna kaom sakhi ka-eii, akathi karra akaring masa, manmasituol reng rakip chungnga wai roonna kaom Jisu Christa diangnga inphut riangwai li kadai kha nangni chungnga omrase.
Ama'n eini anaminriang, halli ama thisen khan manu ah inphut eini kha anakatan, Isa 55:4; Minpkla 89:27
6 halli ama Pathian khat-um Apa sepa katho sik-ah rengram thiampu ngaikha anamin-eii. Jisu Christa diang lurna khat-um ranak kha hektik kaboi erase! Amen. Suok 19:6; Chonglar 5:10
7 Enru, suumphai le inruoiya ama ajuojei! Mi rakip in ama inmusik eii, kaseiya ama kasun ngai innum inmusik eii. Nuoipil chungnga kaom mi rakip in ama chungnga insirna inneisik eii. khawa takkha erase! Amen. Dan 7:13; Zech 12:10; Matt 24:30; Mk 13:26; Luk 21:27; Jn 19:34,37; 1 Thes 4:17
8 “Kei Inphutna (Alpha) khat-um Insuona (Omega) kha ka-eii,” Akaraatkhet Pumi Pathian in ati, “Tuun Pathian ka-eii, matiang um Pathian ka eii, khat-um akajuosik Pathian.” Chonglar 22:13; Suok 3:14
Christa jarra Mangtalar
9 Kei John ka-eii, nangni le suopui inchang, Christa nuk kajui ni-eii jarra ama rengram mi ka-eii nangni le kangaaklal omlekleiya poongraal kadaisuom inkhat kha ka-eii. Kei'n Pathian chong khat-um Jisu in akadik innamalarpi chongngai karil jarra Patmos inti tuiram khan kei innada. 10 Pumi nikhuoni khan kei'n ratha-ah kaleiom, halli tampalooi rasa inringtak ka-ang rasa inkhat in kanuktiang makheiya aheiti. 11 Hin ati, “Nimu ngaikha nang majiaro, halli nimajia larik kha koisuok sari ngaidiang minchoiro: Ephesus, Smyrna, Pergamum, Thyatira, Sardis, Philadelphia, khat-um Laodicea.”
12 Kei'n tume karil kha munasik katia nuktiang kalei-en, khawa phakhan kei'n soonna meiserkeii sari kaleimu,
13 halli soonna meiserkeii sari karra miring sapa ka-ang inkhat kaleimu, akepar katung inchuol songkol inkhat inluk halli soonna koongkhit inkhat aroop-ah inwaal. Dan 7:13; 10:5
14 Ama sam kha keelngam mul angnga abang, kawur angnga achek, halli ama mit kha meimachuon ang; Dan 7:9; 10:6
15 ama keii kha meiya inrou thir-inling ang, halli ama rasa kha toongtui tarasa ang. 16 Ama kutchang tiang arsi sari om, halli amur makheiya ariam inni indou chempui ka-ngei asuok. Ama meel kha kani khan aranak rakip-ah ina-eel angnga ana-eel.
17 Kei'n ama kaleimu phakhan akeii kuungnga akathi ka-angnga kajuopur. Ama'n akut changtiang kha kachungnga duongnga aleiti, “Chimaro! Kei Inphutna li Insuona kha ka-eii.” Isa 44:6; 48:2; Chonglar 2:8; 22:13
18 Kei akaring chak ka-eii! Kei kaleithi, takkha tuunchu kei kumsoot sik-ah karing kha ka-ejei. Kei'n akathi khat-um kathiram chungnga wai roonna ranak kanei. 19 Majiaro, nimu ngaihi, tuunna kasuok khat-um nuktiang kasuoksik ngaihi. 20 Kakut changtiangnga kaom arsi sari khat-um soonna meiserkeii sari ngai ichoi tina khachu hi-eii: Arsi sari ngaihi koisuok sari ngai marwaan tirton ngaikha in-eii, halli soonna meiserkeii sari ngaihi koisuok sari ngaikha in-eii.